ទន្លេមេកុង
2015.07.21
កំណាព្យ (ពាក្យ៨)
១. សំណាងស្រុកខ្មែរ មានដងទន្លេ មេកុងចាក់ផ្ទេរ ពីចិនដែនដី
នាំល្បាយនាំល្បាប់ នាំដីមានជី ផ្ដល់ដោយវារី ដល់ស្រូវសំណាប។
២. មកដល់ភ្នំពេញ បែកចេញជាបួន ពីរចែកទៅយួន នាំក្បូនទឹកសាប
មួយបែកទៅស្តាំ ហៅទន្លេសាប ចិញ្ចឹមសំណាប ច្រើនហ្មឺនហិកតារ។
៣. ទន្លេនេះប្លែក ចម្លែកជាងគេ ទឹកហូរចាក់ផ្ទេរ ពីលើធម្មតា
មកដល់ភ្នំពេញ បែកមួយហត្ថា ហូរមិនធម្មតា ហូរច្រាសទៅលើ។
៤. បើជិះជលយាន តាមទន្លេនេះ ហាក់មានតម្រិះ ដួចគេបានធ្វើ
ដំណើរស្រាវជ្រាវ នៅតាមស្រុកលើ ប្រៀបដូចបានទើរ លើដែនជលសា។
៥. ហូរចូលបឹងមួយ មហាសែនធំ ជាបឹងជំរុំ ជម្រកមច្ឆា
ទេសភាពល្អគន់ ដ៏ស្រស់ត្រកាល បក្សីបក្សា មានតូចមានធំ។
៦. ពីដើមបើចង់ បានត្រីមកស្ល ញាំ-អាំង ឬ ខ មិនបាច់ប្រឹងអុំ
ទូកទៅឱ្យឆ្ងាយ ខ្វល់ខ្វាយហើយខំ យកចង្វាដំ (១) ត្រីលោតចូលឯង។
៧. អាស៊ីគ្មានទេ បឹងធំល្វឹងល្វើយ សមុទ្រគ្មានត្រើយ កវីចារចែង
សំបូរត្រីណាស់ គ្មានអ្វីថ្លាថ្លែង ឱ្យរាស្ត្រចំបែង ពីខ្វះម្ហូបឡើយ។
៨. មាតុភូមិបវរ ត្រូវយើងខំថែ ទោះមិននៅក្បែរ កុំនៅកន្តើយ
ផ្តល់ជាគំនិត សម្រេចឱ្យហើយ កុំឱ្យសល់ឡើយ ដល់មិត្តសំឡាញ់។
៩. នៅភូមិកំណើត នៅស្រែចំការ នៅមានមេត្តា នៅក្តីស្រឡាញ់
បើអស់ទឹកដី គ្មានអ្វី ជាអញ (២) ខ្មាសអស់សំឡាញ់ ក្នុងលោកណាស់ទាន។
១០. ដែនដីខ្មែរប្រែថា ដែនសុវណ្ណ នៅគ្រប់ខេត្តខណ្ឌ សម្បូរធនធាន
ទោះក្នុងទឹក-ដី (៣) ក៏សុទ្ធតែមាន មាសពេជ្រជាយាន នាំស្រុកថ្កើងថ្កាន៕
(១)= ដំលើទូកឲ្យត្រីផ្អើល, (២)= ជារបស់ខ្ញុំ, (៣)= ក្នុងដី