ឥទ្ធិពលដុល្លារ
2014.11.27
១. ឥទ្ធិពលដុល្លារ វាយប្រហារមិនរើសមុខ
មានច្រើនរស់បានសុខ តែមានទុក្ខព្រោះតែវា។
២. វាជាគ្រឿងបញ្ជា ឲ្យគ្រប់គ្នាយល់សេវា
បម្រើសព្វកិច្ចការ តាមប្រាថ្នារបស់គេ។
៣. អំណាចនៃដុល្លារ មានបញ្ហាកុំថាទេ
បុកថែមឲ្យកើនទ្វេ កុំថាទេ ដោះឲ្យបាន។
៤. រឿងខុសក្លាយជាត្រូវ កុំឲ្យនៅនាំរំខាន
ព្រោះគេជាអ្នកមាន ចាយប៉ុន្មានឲ្យបានការ។
៥. សង្គមអនាធិបតេយ្យ គហបតីប្រើដុល្លារ
ធ្វើអ្វីត្រូវបានការ កុំវាចារថាមិនកើត។
៦. បើខ្វះយកថែមទៀត ប្រើគ្រប់ស្នៀតឲ្យបានឆើត
អ្វីៗត្រូវតែកើត បើមិនកើតមិនព្រមឈប់។
៧. ដុល្លារមានអំណាច ឫកកោងកាចគ្មានអ្វីទប់
ធ្វើអ្វីឲ្យខ្លួនសុខ គេកើតទុក្ខធ្វើមិនដឹង។
៨. អ្នកនោះត្រូវបណ្ដាសា រួមទេវតាក៏នឹងខឹង
ដាក់ទោសយ៉ាងតឹងរ៉ឹង តាមបណ្ដឹងអ្នកកើតទុក្ខ។
៩. បើមានអ្នកធ្វើល្អ មិនបង្កឲ្យមានទុក្ខ
ចាយដុល្លារឲ្យគេសុខ តទៅមុខបានថ្កុំថ្កើង៕