១. គេកើតនិងរស់នៅស្រុកស្រែ ស្បែកខ្មៅជាប់ស្លែសក់អង្កាញ់
ដកស្ទូងច្រូតកាត់មិនដែលចាញ់ ជញ្ជាត់កូនក្រាញ់ស្លទំពាំង។
២. ដល់ពេលក្រមុំចង់រកប្រាក់ ទារទៅរោងចក្រមិនអាចឃាំង
ពេលនោះធ្វើការនៅផ្នែកឃ្លាំង រលះរលាំងនឹងកិច្ចការ។
៣. ធ្វើការយូរទៅមានលុយកាក់ ឡើងទាំងឋានៈសាច់ឈាមថ្លា
ស្រាប់តែពេលនេះមានស្នេហា ក្លាយជាបុប្ផាផ្កាទីក្រុង។
៤. មើលចុះឥឡូវសាច់សខ្ចី នាងធ្វើឫកហីអារម្មណ៍ស្លុង
លែងជាន់ស្រុកស្រែព្រោះខ្លាចឆុង ស្រីស្រស់ខ្លាចផុងប្រឡាក់ភក់។
៥. លាហើយលាហើយលាស្រុកស្រែ ឈប់ជាន់ឈប់ក្បែររឿងភ្លើងភ្នក់
ភ្លេចស្រុកភ្លេចស្រែដេកលង់លក់ ពេលនេះស្រីឈ្លក់នឹងស៊ីចាយ។
៦. ទោះបីម្ដាយឈឺនាងមិនមក ស្រីស្រស់ពន្លកគ្មានខ្វល់ខ្វាយ
គិតតែផឹកស៊ីសើចសប្បាយ ពេលនេះយកកាយធ្វើដើមទុន។
៧. មើលចុះឥឡូវនាងហក់លោត ហាយឡាយសក់ពោតខុសពីមុន
ដឹងតែសប្បាយភ្លេចទោសគុណ ម៉ែប្រឹងរែកពុនគ្រុនយប់ថ្ងៃ។
៨. មិត្តភក្ដិប្រុសស្រីច្រើនស្អេកស្កះ សប្បាយខ្លាំងណាស់លេងអស់ដៃ
ព្រោកប្រាជ្ញលែបខាយគ្មានសំចៃ សប្បាយពេកក្រៃនឹងល្បែងស្នេហ៍។
៩. ស្រីប្រើសម្រស់អូសទាញប្រាក់ ចាយមិនបណ្ដាក់ចេញហូរហែ
អាងលើប្រាក់ធីបដល់រាល់ខែ សាច់គោឱ្យឆ្កែស៊ីប្រចាំ។
១០. ក្រឡេកមើលចុះនៅឯស្រុក ម្ដាយហូបប្រហុកពិតជាកម្ម
ព្រោះចំណូលតិចក្នុងមួយឆ្នាំ ទិញម្ហូបទិញថ្នាំក្នុងគ្រួសារ។
១១. ពេលដែលមានប្រាក់នាងមិនគិត សប្បាយម៉ាកមិត្តឫកហ៊ឺហា
គេចាយសព្វថ្ងៃប្រាក់ដុល្លារ ម្ដាយវិញខ្លោចផ្សាហៅលែងឮ។
១២. កាលមុនស្រីស្រស់សប្បាយក្រៃ ពេលនោះស្រីថ្លៃឫកគេឌឺ
ដល់ពេលស្រីនាងធ្លាក់ខ្លួនឈឺ ស្រែកថ្ងូរហ៊ឺៗទើបនឹកម៉ែ។
១៣. ពេលមកដល់ស្រុកមិនប៉ុន្មាន នាងក៏ចែកឋានព្រោះខ្មោចស្នេហ៍
សប្បាយខ្លាំងពេកជ្រុលហួសកែ លាស្រុកលាស្រែលារហូត៕