ភូមាអនុញ្ញាតឲ្យយន្តហោះអាមេរិកដឹកជំនួយសង្គ្រោះចូល
ដោយ ម៉ាយ៉ារិទ្ធិ
2008-05-14
មន្ត្រីសហរដ្ឋអាមេរិកបានជូនដំណឹងថា អាជ្ញាធរភូមាបានយល់ព្រមឲ្យយន្តហោះយោធាអាមេរិកដឹកជញ្ជូនស្បៀងសម្រាប់ជនរងគ្រោះ ចូលទៅចតក្នុងទឹកដីភូមានៅថ្ងៃច័ន្ទក្រោយនេះ ។
កុមារជាជនរងគ្រោះដោយសារព្យុះនៅភូមាដើរកាត់ផ្ទះដែលត្រូវបំផ្លិចបំផ្លាញដោយព្យុះ។
យន្តហោះយោធាអាមេរិកដឹកជញ្ជូនស្បៀងធុន C-130 ត្រូវគេរាយការណ៍មកថា កំពុងស្ថិតក្នុងវាលយន្តហោះក្នុងប្រទេសថៃ ត្រៀមការចាកចេញដើម្បីការជួយសង្គ្រោះនោះហើយ ។
នៅជាមួយគ្នានេះដែរ មន្ត្រីនៃអង្គការកម្មវិធីស្បៀងអាហារពិភពលោក បាននិយាយនៅថ្ងៃសៅរ៍ថា គេក៏នៅតែបន្តការដឹកស្បៀងចូលទៅក្នុងតំបន់ប្រជាជនភូមារងគ្រោះដោយការលិចទឹកនោះថែមទៀត បើទោះបីជាអាជ្ញាធរក្រុងរ៉ង់ហ្គូននៅតែរារាំងមិនឲ្យបុគ្គលិកបរទេស ចូលទៅចែកអំណោយដោយផ្ទាល់នោះក៏ដោយ ។
សូមជម្រាបថា មុននេះ មន្ត្រីស្បៀងអាហារពិភពលោករបស់អង្គការសហប្រជាជាតិ (អ.ស.ប.) បានថ្លែងថា គេនឹងផ្អាកការដឹកជំនួយនោះសិន ដោយសារតែការខឹងនឹងមន្ត្រីយោធាភូមាដែលបានធ្វើការរឹបអូសស្បៀងចំនួន ៣៨តោនដឹកមកពីប្រទេសបង់ក្លាដេស្ហ និងមកពីប្រទេសសហភាពអារ៉ាប់ អេមីរ៉ាតនោះ ។
មន្ត្រីអង្គការស្បៀងអាហារពិភពលោកបានឲ្យដឹងថា ស្បៀងទម្ងន់៣៨តោននោះ អាចផ្គត់ផ្គង់ដល់មនុស្សបានដល់ទៅ ៩ម៉ឺន ៥ពាន់នាក់ ។
សេចក្តីសម្រេចថា នឹងបន្តការដឹកស្បៀងយកទៅឲ្យអ្នករងគ្រោះភូមា គឺនៅបន្ទាប់ពីមានការព្យាករណ៍ពីក្រុមឧតុនិយមឲ្យដឹងថា នៅសប្តាហ៍ក្រោយរវាងថ្ងៃព្រហស្បតិ៍និងថ្ងៃសុក្រ ខាងមុខនេះ នឹងអាចមានខ្យល់និងការភ្លៀងធ្លាក់យ៉ាងធំមកទៀតដល់ប្រទេសភូមា ហើយគេបារម្ភថា អាកាសធាតុអាក្រក់នៅសប្តាហ៍ក្រោយនោះ នឹងប៉ះទង្គិចដល់តំបន់ទីទំនាប ដែលមានប្រជាជនធ្លាប់បានរងគ្រោះ កាលពីសប្តាហ៍មុនរួចទៅហើយនោះ ។
សូមជម្រាបថា តួលេខដែលនិយាយអំពីការស្លាប់និងបាត់ខ្លួនដោយគ្រោះថ្នាក់ខ្យល់ព្យុះកាលពីសប្តាហ៍មុន មានការខុសគ្នារវាងសេចក្តីរាយការណ៍របស់រដ្ឋាភិបាលភូមា ជាមួយនឹងក្រុមជំនួយ ។
ប្រព័ន្ធឃោសនាក្នុងស្រុកភូមា បានផ្សាយថាមានមនុស្សស្លាប់ចំនួន ២៣.៣៣៥នាក់ និងបានបាត់ខ្លួនចំនួន ៣៧.០១៩នាក់ ប៉ុន្តែក្រុមអ្នកផ្តល់ជំនួយបរទេសនិយាយថា ចំនួនមនុស្សដែលស្លាប់អាចមានរវាងពី ៦៣.០០០នាក់ទៅប្រមាណ ១សែននាក់ ហើយអ្នកដែលបានរងគ្រោះ សេសសល់ពីស្លាប់និងបានបង់ទីជម្រក មានចំនួនប្រមាណជាង១លាននាក់ ។
សេចក្តីរាយការណ៍កាលពីម្សិលមិញបានឲ្យដឹងថា អាជ្ញាធរភូមាបានយកស្បៀងអាហារជំនួយដែលរឹបអូសយកពីអង្គការស្បៀងអាហារពិភពលោកនោះ បានយកទៅចែក ប៉ុន្តែ កញ្ចប់នីមួយៗ សុទ្ធតែបានដាក់ឈ្មោះឧត្តមសេនីយ៍របស់ខ្លួន ។
បើតាមសេចក្តីរាយការណ៍ពីទីភ្នាក់ងារ អេ.ភី បាននិយាយថា ទូរទស្សន៍ក្នុងស្រុកនៃប្រទេសភូមា បានបញ្ចាំងរូបឧត្តមសេនីយ៍ដែលបានចែកអំណោយ រួមទាំងរូបលោកឧត្តមសេនីយ៍ ថាន់ស្វេ មេដឹកនាំរបបយោធាភូមានោះទៀតផង ។
តាមការបញ្ចាំងនោះ គេបានឃើញថា កញ្ចប់នីមួយៗបានដាក់ឈ្មោះឧត្តមសេនីយ៍យោធាភូមា ហើយនៅលើកញ្ចប់នោះដែរ ជំនួយមកពីប្រទេសនានា ត្រូវគេសរសេរជាអក្សរតូចៗ ។
ទាក់ទងនឹងរឿងចែកជំនួយដែលរឹបយកពីអង្គការស្បៀងអន្តរជាតិនោះទៀត មានសេចក្តីរាយការណ៍ពីសាក្សីបញ្ជាក់ទៀតថា គេបានឃើញរឿងបន្លំយកអំណោយនោះទៀត ។
សាក្សីជាតិភូមាបានរាយការណ៍កាលពីម្សិលមិញមកថា ៖ «មេបញ្ជាការតំបន់នៃប្រទេសភូមាម្នាក់ឈ្មោះ ទន់តេ បានចែកអំណោយស្បៀងអាហាររបស់អ.ស.ប. ដល់ប្រជាជន និងបានថតរូបទុកជាភស្តុតាងទៀតផង ប៉ុន្តែក្រោយពីលោកមេបញ្ជាការនោះ បានចាកចេញភ្លាម ពួកអាជ្ញាធរមូលដ្ឋានបានដើរប្រមូលយកអស់ទៅវិញ» ។
មន្ត្រីអ្នកនាំពាក្យភូមាឈ្មោះ Ye Htut មិនសប្បាយចិត្តនឹងការចោទថា អាជ្ញាធរបានរឹបអូសយកស្បៀងនោះឡើយ ។ មន្ត្រីអ្នកនាំពាក្យភូមា ធ្វើជាបង្ហាញភាពឈឺឆ្អាលរបស់ខ្លួនដោយបញ្ជាក់ថា រដ្ឋាភិបាលភូមាសុខចិត្តធ្វើកិច្ចការនោះដោយការពឹងកម្លាំងខ្លួនឯង ហើយអំណោយជាស្បៀងដែលបានយកទៅនោះ គឺបានយកទៅចែកភ្លាមៗដល់អ្នកស្រុកស្រេកឃ្លានដោយមិនបង្អង់ទុកយូរទេ ។
តាមរយៈទូរទស្សន៍ស៊ី.អិន.អិន គេបានឃើញទស្សនីយភាពដ៏គួរឲ្យតក់ស្លុតនៅពេល ដែលឃើញមនុស្សជាច្រើនបានស្លាប់អណ្តែតចូលទៅនៅក្នុងទឹកសមុទ្រ ។
ស្ត្រីភូមាម្នាក់បាននិយាយថា មេដឹកនាំភូមាមិនមានបំណងស្រង់យកខ្មោចដែលអណ្តែតទឹកនោះ ដាក់លើគោកដើម្បីបញ្ចុះឬបូជានោះឡើយ ៖ «លោករដ្ឋមន្ត្រីក្រសួងព្រៃឈើ បានជិះកាណូតមើលសាកសពដែលអណ្តែតនៅក្នុងទឹក ។ ពេលនោះ មានគេសួរលោករដ្ឋមន្ត្រីថា តើគេគួរធ្វើយ៉ាងណា ចំពោះសាកសពនោះ? លោករដ្ឋមន្ត្រីបានឆ្លើយថា គេមិនចាំបាច់ធ្វើអ្វីនោះទេ ព្រោះត្រីគង់តែនឹងស៊ីសាច់ខ្មោចអណ្តែតទឹក ហើយឆ្អឹងក៏គង់តែលិចបាត់ទៅខាងក្រោមនោះដែរ» ។
កាលពីម្សិលមិញ ក្រុមអ្នកដឹកជំនួយសង្គ្រោះ បានថ្លែងថា គេមានការខឹងសម្បាចំពោះមន្ត្រីយោធាភូមាដែលមិនអនុញ្ញាតឲ្យពួកគេចូលទៅសង្គ្រោះជនរងគ្រោះភូមានោះ ។
នាយកអង្គការស្បៀងអាហារពិភពលោក លោក Tony Bnabury បានថ្លែងអង្វរសូមកុំឲ្យមេដឹកនាំក្រុងរ៉ង់ហ្គូនភ្ជាប់រឿងការជួយជីវិតប្រជាជនរងគ្រោះភូមា ទៅនឹងរឿងនយោបាយ ។
លោកបានថ្លែងថា ពួកគេដែលមានចំនួនប្រមាណ ១លានឬជាង១លានដែលកំពុងតែស្រេកឃ្លាននោះ ត្រូវការជំនួយមនុស្សធ៌ម ហើយលោកសូមឲ្យមន្ត្រីភូមាបើកការអនុញ្ញាតឲ្យក្រុមសង្គ្រោះមនុស្សធម៌អ.ស.ប.បានចូលទៅជួយសង្គ្រោះប្រជាជនទាំងនោះ ។
មន្ត្រីអ.ស.ប.បានធ្វើសេចក្តីអំពាវនាវមួយបន្ថែមទៀតដែរ ដល់បណ្តាប្រទេសជាសមាជិកដើម្បីការរៃប្រាក់អង្គាសសប្បុរសចំនួន ១៨៧លាន៣សែនដុល្លារអាមេរិកថែមទៀតដើម្បីជួយប្រជាជនរងគ្រោះនៅក្នុងប្រទេសភូមានោះ ៕
