កម្ពុជានិងប្រយោជន៍ពីការចូលជាសមាជិកអាស៊ាន
2010.05.10
ថ្ងៃទី៣០ ខែមេសា គឺជាថ្ងៃដែលប្រទេសកម្ពុជាបានចូលជាសមាជិកសមាគមសហប្រជាជាតិអាស៊ីអាគ្នេយ៍ ដែលហៅកាត់ជាភាសាអង់គ្លេសថា ASEAN (អាស៊ាន)។
ប្រទេសកម្ពុជាបានចូលជាសមាជិកទី១០ នៃអាស៊ាន ពីថ្ងៃទី៣០ ខែមេសា ឆ្នាំ១៩៩៩ នៅឯទីក្រុងហាណូយ ប្រទេសវៀតណាម។ ក្នុងរយៈពេល ១១ឆ្នាំ ដែលប្រទេសកម្ពុជាបានចូលជាសមាជិកសមាគមសហប្រជាជាតិអាស៊ីអាគ្នេយ៍នេះ មន្ត្រីជាន់ខ្ពស់របស់ក្រសួងការបរទេសនៃប្រទេសកម្ពុជា បានថ្លែងឲ្យដឹងថា កម្ពុជាបានទទួលផលប្រយោជន៍យ៉ាងច្រើនពីការចូលជាសមាជិកនេះ រួមមាន កត្តានយោបាយ កត្តាសន្តិសុខ ការបង្កើតធនធានមនុស្ស វិស័យពាណិជ្ជកម្ម សេដ្ឋកិច្ច ទេសចរណ៍ និងផលប្រយោជន៍ជាច្រើនទៀតដែលមិនអាចវាស់ស្មានបាននោះ។
លោកបណ្ឌិត កៅ គឹមហួន រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ឲ្យដឹងថា ក្នុងរយៈពេល ១១ឆ្នាំ ដែលប្រទេសកម្ពុជាបានចូលជាសមាជិកអាស៊ាននេះ ប្រទេសកម្ពុជាបានផ្សព្វផ្សាយពីការធ្វើពាណិជ្ជកម្ម និងមានការទាក់ទាញលើវិស័យទេសចរណ៍ ដែលបានធ្វើឲ្យទេសចរណ៍នៅក្នុងប្រទេសមានការកើនឡើង បើទោះបីជាអន្តរជាតិកំពុងតែមានវិបត្តិសេដ្ឋកិច្ចក៏ដោយ។
លោកបណ្ឌិត កៅ គឹមហួន បានថ្លែងទៀតថា ប្រទេសកម្ពុជាធ្លាប់បានធ្វើជាប្រធានអាស៊ានម្ដងហើយកាលពីឆ្នាំ២០០៣ ហើយនឹងធ្វើម្ដងទៀតនៅឆ្នាំ២០១២ខាងមុខ។ កម្ពុជាបានពង្រឹងពង្រីកទំនាក់ទំនងការរកជំនួយសម្រាប់ប្រទេស និងផលប្រយោជន៍នយោបាយផ្សេងទៀត។
លោកមានប្រសាសន៍ទៀតថា តាមរយៈអាស៊ាន ប្រទេសកម្ពុជាបានទាក់ទាញអ្នកវិនិយោគយ៉ាងច្រើនឲ្យបែរមកបណ្ដាក់ទុននៅក្នុងប្រទេសកម្ពុជា ទាំងអ្នកវិនិយោគនៅក្នុងប្រទេសអាស៊ានផង និងប្រទេសដែលជាដៃគូចរចានោះផង ព្រមទាំងអ្នកវិនិយោគអន្តរជាតិផ្សេងៗទៀត ក្នុងនាមជាតំបន់អាស៊ាន ដោយសហគមន៍អាស៊ានទាំងអស់បានជំរុញឲ្យមានទីផ្សារតែមួយ និងកន្លែងផលិតតែមួយនោះ។
រដ្ឋលេខាធិការនៃក្រសួងការបរទេស លោក កៅ គឹមហួន មានប្រសាសន៍ទៀតថា កត្តានយោបាយវិញនោះ គឺប្រទេសកម្ពុជាអាចទាក់ទងជាមួយប្រទេសមហាអំណាចមួយចំនួន តាមរយៈក្របខ័ណ្ឌអាស៊ាននោះ ដូចជាជំនួបកំពូលថ្នាក់ដឹកនាំអាស៊ាន និងសហរដ្ឋអាមេរិក ប្រទេសចិន សហគមន៍អឺរ៉ុប ប្រទេសរុស្ស៊ី ជាដើមនោះ។
លោកបានថ្លែងទៀតថា ប្រទេសកម្ពុជាក៏បានពង្រីកខ្លួនលើវិស័យការទូតផងដែរ តាមរយៈប្រទេសជាសមាជិកអាស៊ាន តាមរយៈដៃគូចរចា បើទោះបីជាប្រទេសកម្ពុជាមិនមានស្ថានទូតរបស់ខ្លួននៅតាមប្រទេសមួយចំនួនក៏ដោយ។
លោក កៅ គឹមហួន បានបញ្ជាក់ទៀតថា កម្ពុជាបានដើរតួនាទីស្នូលក្នុងការពង្រឹងកិច្ចសហប្រតិបត្តិការនៅក្នុងតំបន់ និងអន្តរជាតិ និងកាត់បន្ថយគម្លាតរវាងសមាជិកអាស៊ានចាស់ និងថ្មីផងដែរ រួមទាំងចូលរួមក្នុងការកសាងសហគមន៍អាស៊ាន ដើម្បីសម្រេចទិសដៅរួមនៅឆ្នាំ២០១៥។ កម្ពុជាក៏ជាប្រទេសដែលមានតួនាទីស្នូលក្នុងការសម្របសម្រួលរវាងអាស៊ាន និងប្រទេសសំខាន់ៗមួយចំនួនទៀតដែរ និងជំរុញឲ្យមានការអភិវឌ្ឍនៅក្នុងប្រទេសមហាអនុតំបន់ទន្លេមេគង្គ ដែលមានកម្ពុជា ជាដើម។
កម្ពុជាក៏ជំរុញឲ្យមានការនាំផលិតផលកសិកម្មរបស់ប្រជាពលរដ្ឋ ចេញទៅលក់នៅទីផ្សារក្នុងតំបន់នៃប្រទេសអាស៊ាន និងទៅបណ្ដាប្រទេសនានាផ្សេងទៀត តាមរយៈទីផ្សារអាស៊ាន។
ប៉ុន្តែការលើកឡើងរបស់មន្ត្រីរដ្ឋាភិបាលនេះ អ្នកតំណាងរាស្ត្ររបស់គណបក្ស សម រង្ស៊ី លោក យឹម សុវណ្ណ មានប្រសាសន៍ថា ក្នុងរយៈពេល ១១ឆ្នាំដែលប្រទេសកម្ពុជាចូលជាសមាជិកអាស៊ាននេះ គឺបានរីកចម្រើនតិចតួចប៉ុណ្ណោះ ហើយមិនទាន់ទាញយកផលចំណេញបានច្រើននៅឡើយ ហើយចំណុចខ្លះប្រទេសកម្ពុជាបានដើរថយក្រោយទៅវិញ។ ការសហការគ្នាពីសមាជិកអាស៊ាន នៅមិនទាន់ប្រកបដោយសុទ្ធចិត្តនៅឡើយ ដោយឃើញមានប្រទេសជិតខាងនៅមានមហិច្ឆតាលើប្រទេសកម្ពុជា។
អ្នកតំណាងរាស្ត្រ យឹម សុវណ្ណ មានប្រសាសន៍ទៀតថា កម្ពុជាបានចាញ់ប្រៀបប្រទេសសមាជិក ជាពិសេសប្រទេសជិតខាងដូចជា ថៃ និងវៀតណាមជាដើម លើផ្នែកពាណិជ្ជកម្មនោះ ដោយសារតែប្រទេសកម្ពុជាត្រូវចំណាយថ្លៃដើមច្រើន ដើម្បីដំណើរការសិប្បកម្ម ដូចជាសាំង ភ្លើងអគ្គិសនី មានតម្លៃថ្លៃ និងការិយាធិបតេយ្យ រួមជាមួយការនាំចូលផ្ដាច់មុខដែលធ្វើឲ្យមិនមានការប្រកួតប្រជែងឲ្យបានស្មើភាពគ្នានោះ។
បើទោះបីជាមន្ត្រីបក្សប្រឆាំងបានលើកឡើងពីអតុល្យភាពលើការនាំចេញនាំចូលក៏ដោយនោះ រដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ លោក កៅ គឹមហួន បានមានប្រសាសន៍ឲ្យដឹងដែរថា គោលដៅរបស់អាស៊ានគឺបង្កើនឲ្យមានទំនាក់ទំនងខាងផ្នែកគមនាគមន៍រវាងប្រទេសជាសមាជិកទាំងអស់ ទាំងផ្លូវអាកាស ផ្លូវគោក មានហេដ្ឋារចនាសម្ព័ន្ធផ្លូវថ្នល់ និងផ្លូវដែកជាដើម ដើម្បីបង្កលក្ខណៈងាយស្រួលដល់ប្រជាពលរដ្ឋធ្វើដំណើរចេញចូលនៅក្នុងតំបន់អាស៊ាន និងការដឹកជញ្ជូនភ្ញៀវទេសចរណ៍នានា ព្រមទាំងជាការតភ្ជាប់ផ្នែកសេដ្ឋកិច្ចនោះផងដែរ ហើយទិសដៅរបស់អាស៊ាននោះ គឺពង្រឹងការឯកភាពផ្ទៃក្នុង និងកាត់បន្ថយគម្លាតអ្នកមាននិងអ្នកក្រនៅក្នុងសមាជិកអាស៊ាន រួមទាំងបង្កើនការអភិវឌ្ឍឲ្យបានស្មើគ្នា។
អាស៊ានមានប្រទេសចំនួន ១០ ជាសមាជិក គឺមានប្រទេសប្រ៊ុយណេ ប្រទេសកម្ពុជា ប្រទេសឥណ្ឌូណេស៊ី ប្រទេសលាវ ប្រទេសម៉ាឡេស៊ី ប្រទេសភូមា ប្រទេសហ្វីលីពីន ប្រទេសសិង្ហបុរី ប្រទេសថៃ និងប្រទេសវៀតណាម៕