ពលរដ្ឋ​ខេត្ត​កំពត ខ្វះ​ទឹក​បូម​ដាក់​ស្រែ​ប្រាំង​ជាង​១០០​ហិកតារ

ប្រជាពលរដ្ឋ ២​ឃុំ នៅ​ស្រុក​បន្ទាយមាស ខេត្ត​កំពត ដែល​ធ្វើ​ស្រែ​ប្រាំង​ជាច្រើន​រយ​ហិកតារ កំពុង​ខ្វះ​ទឹក​បូម​ដាក់​ស្រែ។ ក្នុង​រដូវ​វស្សា​កន្លង​ទៅ ប្រជាពលរដ្ឋ​ទាំង​នោះ​ធ្វើ​ស្រូវ​មិន​បាន​ផល​ឡើយ ដោយ​សារ​មាន​គ្រោះ​រាំង​ស្ងួត។
ដោយ អ៊ុក សាវបូរី
2012-12-27
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ដូច្នេះ បើ​គាត់​មិន​បាន​ទទួល​ផល​ស្រូវ​ប្រាំង​ទៀត ប្រជាពលរដ្ឋ​ទាំង​នោះ​មុខ​ជា​ខ្វះ​ស្បៀង​ជា​មិន​ខាន។

ប្រជាពលរដ្ឋ​ស្រុក​បន្ទាយមាស ខេត្ត​កំពត អំពាវនាវ​សុំ​ឲ្យ​មន្ត្រី​កសិកម្ម និង​មន្ត្រី​ធនធាន​ទឹក​ជួយ​បូម​ទឹក​ពី​ប្រឡាយ​មេ ឈ្មោះ​កៅវ៉ាក់ បង្ហូរ​ទឹក​តាម​កូន​ប្រឡាយ ដើម្បី​ពួក​គាត់​បូម​ទឹក​បន្ត​មក​ស្រោច​ស្រែ​ប្រាំង​ជាង ១០០​ហិកតារ ដែល​កំពុង​ខ្វះ​ទឹក ខណៈ​ស្រូវ​ប្រាំង​កំពុង​ចេញ​ផ្កា។

អ្នក​ភូមិ​ឃុំ​ស្ដេច​គង់​ខាង​ត្បូង និង​ឃុំ​ស្ដេច​គង់​ខាង​ជើង កំពុង​ប្រញាយ​ដណ្ដើម​បូម​ទឹក​ពី​ប្រឡាយ​តូចៗ​ដែល​នៅ​ក្បែរ​ស្រែ​របស់​ពួក​គេ បូម​ដាក់​ស្រូវ​ប្រាំង ព្រោះ​ស្រូវ​កំពុង​ក្រៀម​ខ្លោច​ខ្វះ​ទឹក។

លោក ណម ជឿន នៅ​ឃុំ​ស្ដេច​គង់​ខាង​ត្បូង ថ្លែង​ថា ស្រូវ​ប្រាំង ៣​ហិកតារ​របស់​គាត់​នឹង​ងាប់​នៅ​ក្នុង​សប្ដាហ៍​នេះ ព្រោះ​ទឹក​ប្រឡាយ​មេ​ឈ្មោះ​កៅវ៉ាក់ នៅ​ឆ្ងាយ​ជិត ២​គីឡូម៉ែត្រ​ពី​ស្រែ​គាត់។ គាត់​សុំ​ឲ្យ​មន្ត្រី​ពាក់ព័ន្ធ​ជួយ​បូម​ទឹក​ពី​ប្រឡាយ​មេ​កៅវ៉ាក ទម្លាក់​មក​ប្រឡាយ​តូចៗ ដើម្បី​ប្រជាពលរដ្ឋ​បូម​បន្ត​ដាក់​ស្រែ​រៀង​ខ្លួន៖ «ច្រើន​រយ​ហិកតារ​ណាស់ ហើយ​ឥឡូវ​ហ្នឹង​ស្រូវ​ហ្នឹង​កំពុង​តែ​ខ្វះ​ទឹក។ ស្រូវ​ប្រភេទ​អ៊ីអ៊ែរ​ហ្នឹង ចង់​ចេញ​ហើយ វា​បាន​អាយុ ២​ខែ​ហើយ នៅ​មួយ​ខែ​ទៀត ខ្វះ​ទឹក​ឥឡូវ​ហ្នឹង។ ម៉ាស៊ីន​នៅ​ដេក​រាប់​អាទិត្យ​ហើយ នៅ​តែ​ចាំ​បូម​ទឹក​ហ្នឹង»

អ្នក​ភូមិ​សង្កែដួច លោក យិន សារិន ថ្លែង​ថា អ្នក​ភូមិ​រំពឹង​តែ​ស្រែ​ប្រាំង​នេះ​ទេ ព្រោះ​ស្រូវ​វស្សា​គ្រប់​គ្នា​មិន​បាន​ដាំ​ស្រូវ​បាន​ឡើយ មក​ពី​គ្រោះ​រាំង​ស្ងួត។ បន្ទាប់​មក នៅ​ចុង​រដូវ​វស្សា​បែរ​ជា​មាន​ភ្លៀង​ទឹក​ជន់ ទើប​តែ​ចុង​ខែ​តុលា អ្នក​ភូមិ​នាំ​គ្នា​ធ្វើ​ស្រូវ​ពង្រោះ។ ឥឡូវ​ស្រូវ​ប្រាំង​អ៊ីអ៊ែរ​៥៦ កំពុង​ចេញ​ផ្កា បែរ​ជា​ខ្វះ​ទឹក​ស្រោច៖ «បូម​ពីរ​ត បី​ត បាន​ដល់​ស្រែ។ អីចឹង វា​វេទនា​ដែរ​ហ្នឹង»

មេ​ភូមិ​សង្កែដួច លោក អោម ហាក់ អះអាង​ថា ក្នុង​ភូមិ​នោះ​ស្រែ​ប្រាំង ៥៦​ហិកតារ កំពុង​ខ្វះ​ទឹក។ លោក​ថា អ្នក​ភូមិ​នឹង​ខ្វះ​ស្បៀង ប្រសិន​បើ​ស្រូវ​ប្រាំង​នោះ​ងាប់​ដោយ​ខ្វះ​ទឹក​ស្រោច​ស្រព៖ «ប៉ុន្តែ​ថ្ងៃ​ខាង​មុខ បើ​សិន​ណា​មិន​បាន​ទឹក​នោះ​មក​ទេ វា​រឹត​តែ​ខូច»

ជំទប់​ទី១ ឃុំ​ស្ដេច​គង់​ខាង​ត្បូង លោក ខៀវ ស៊ី ថ្លែង​ថា អាជ្ញាធរ​បាន​ធ្វើ​សេចក្តី​រាយការណ៍​ទៅ​សាលា​ស្រុក​ឲ្យ​អន្តរាគមន៍​ជួយ​បូម​ទឹក​ពី​ប្រឡាយ​កៅវ៉ាក់ ទម្លាក់​មក​ប្រឡាយ​តូចៗ។ ទើប​មន្ត្រី​ធនធាន​ទឹក​បាន​បូម​ទឹក​ពី​ប្រឡាយ​មេ​ទម្លាក់​មក​ប្រឡាយ​តូចៗ​ខ្លះ​ដែរ តែ​អ្នក​នៅ​ក្បាល​ទឹក គាត់​សម្រុក​បូម​យក​ទឹក​អស់ ធ្វើ​ឲ្យ​អ្នក​មាន​ស្រែ​នៅ​ខាង​ក្រោម អត់​ទឹក​បូម​ដាក់​ស្រូវ៖ «បូម​មក​ដាក់​មក អ្នក​នៅ​ខាង​ដើម​ខ្សែ​ហ្នឹង គេ​បូម​យក​អស់​ទៅ​ហើយ។ អីចឹង​អ្នក​នៅ​ចុង​ខ្សែ​ហ្នឹង វា​តែង​តែ​មាន​ការ​ខ្វះ​ខាត​អីចឹង​ហើយ ប្រហែល​ជា ១០០​ហិកតារ​អី​ហ្នឹង»

មេ​ភូមិ​ស្ដេច​គង់ លោក សៅ អួក ថ្លែង​ថា ដី​ស្រែ​នៅ​ក្នុង​ភូមិ​នោះ​មាន​ចំនួន ២២២​ហិកតារ។ នៅ​ឆ្នាំ​២០១២ អ្នក​ភូមិ​ធ្វើ​ប្រាំង និង​វស្សា សរុប​បាន​តែ ១៨៤​ហិកតារ​ទេ។ បច្ចុប្បន្ន ដី​ស្រែ​ប្រាំង​កំពុង​ខ្វះ​ទឹក។ ចំណែក​ទឹក​ប្រឡាយ​មាន​តិច​តួច អ្នក​ស្រុក​ដណ្ដើម​គ្នា​បូម​ដាក់​ស្រែ។ លោក​ថា អ្នក​ដែល​គ្មាន​ម៉ាស៊ីន​បូម​ទឹក​ដាក់​ស្រែ នាំ​គ្នា​ចេញ​ពី​ភូមិ​ជាង ១០០​គ្រួសារ ទៅ​រក​កម្រៃ​ចិញ្ចឹម​ជីវិត ដោយ​សារ​ការ​ធ្វើ​ស្រែ​ឆ្នាំ​២០១២ នេះ មិន​ទទួល​ផល​ល្អ៖ «ចំណាក​ស្រុក​អស់​ហើយ ខ្ញុំ​ចំណាក​ស្រុក​ជាង​១០០​ទៅ​ហើយ ព្រោះ​អត់​មាន​ការងារ​ធ្វើ។ ប្រជាពលរដ្ឋ​ចេះ​តែ​ចំណាក​ស្រុក​ចេញ​ទៅ​រក​ស៊ី​នៅ​ថៃ នៅ​អង្គ​នៅ​អី គ្រប់​បែប​គ្រប់​យ៉ាង​អីចឹង​ទៅ ចេញ​អស់»

ទោះ​ជា​យ៉ាង​ណា លោក ស្រ៊ុន សុខុម អគ្គនាយក​រង​នៃ​អគ្គនាយកដ្ឋាន​ក្រសួង​កសិកម្ម ឲ្យ​ដឹង​ថា ដំណាំ​ស្រូវ​វស្សា​មាន​ស្រូវ​ពង្រោះ និង​សន្ទូង​នៅ​ឆ្នាំ​២០១២ ដាំ​បាន​លើ​ដី​ជាង ២​លាន​ហិកតារ លើស​ផែនការ ១០៤%។ ប៉ុន្តែ​ខេត្ត​នៅ​ប៉ែក​និរតី ប្រទេស​កម្ពុជា មាន​ខេត្ត​កំពត តាកែវ ជាដើម មិន​បាន​ដាំ​ស្រូវ​អស់​ផ្ទៃដី ដោយ​សារ​ទឹក​ភ្លៀង​ធ្លាក់​រាយប៉ាយ​មិន​គ្រប់​កន្លែង។ ទន្ទឹម​នោះ កាល​ពី​ដើម​រដូវ​វស្សា គ្រោះ​រាំងស្ងួត​ក៏​បាន​ធ្វើ​ឲ្យ​ដំណាំ​ស្រូវ​ពង្រោះ​នៅ​ខេត្ត​បាត់ដំបង និង​ខេត្ត​ដទៃ​ខូច​អស់​ជាង ២​ម៉ឺន ២​ពាន់​ហិកតារ​ដែរ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ខ្វះទឹកដាក់ស្រែ ម្តេចមិននាំគ្នាមកពូតទឹកមាត់ដែលសើមក្បាលមីក្រូ បន្ទាប់សម្តេចតេជោនិយាយចប់រាល់ៗថ្ងៃ?។

Dec 28, 2012 02:35 AM

អ្នក​អាន​អនាមិក

ពី Washington, USA

Please come back to your country and vote down the CPP or vote for National Rescue Party.

Dec 27, 2012 04:34 PM

អាកឹងគីម

ពី Columbus

រឿងអស់នេះសាដាត់ដាត់ជោរបានគិតគូរមកជាយូរ គ្រាន់ថា
មិនសូវសំខាន់ រឿងអត់បាយអីៗចាំមានឧិកាសហុចឪ្យសា
ដាត់និងដាក់អឃោសនស័ព្ទបំពងសម្លេងអោយឭខ្លាំងជា
ទីបំផុតសំរាប់ប្រជាភិថុតរកសម្លេងឆ្នោត២០១៣ ពេលនេះគិតគូររឿងអគីសនីយ៏និងក្រុមហុ៑នធើជីសិន អត់
អីអត់ទៅឧ្យតាបានជីនិងភ្លើងភ្លឺធើឪ្យភ្នែកយើងជ្រះថ្លា
ម៉្យាងដែរណា រើសយកសែនទៅសែនមិនឪ្យអត់បាយ
ងាប់ទេ។

Dec 27, 2012 01:52 PM