តំណាងអង្គការសង្គមស៊ីវិលជួបពិភាក្សាចងក្រងអនុសាសន៍ជូនដៃគូអភិវឌ្ឍន៍កម្ពុជា
h092512ts.mp3
កន្លងមក លោកនាយករដ្ឋមន្ត្រី ហ៊ុន សែន បានប្រកាសលើកពេលកិច្ចប្រជុំពិគ្រោះយោបល់នេះ រហូតដល់ឆ្នាំ២០១៤។
កិច្ចប្រជុំរបស់តំណាងអង្គការមិនមែនរដ្ឋាភិបាលនោះ គឺក្រោមប្រធានបទថា បញ្ហាអភិវឌ្ឍន៍នៃប្រទេសកម្ពុជា ក្នុងឆ្នាំ២០១០-២០១២។
តំណាងអង្គការមិនមែនរដ្ឋាភិបាលជាង១០០ នោះ នឹងដាក់ជូនអនុសាសន៍ និងគោលជំហររបស់ខ្លួនចំនួន ២២ចំណុច ជូនកិច្ចប្រជុំនៃគណៈកម្មាធិការសម្របសម្រួល រវាងរដ្ឋាភិបាល និងដៃគូអភិវឌ្ឍន៍លើកទី១៩ ដែលគ្រោងធ្វើឡើងនៅថ្ងៃទី២៦ ខែកញ្ញា ឆ្នាំ២០១២ នៅឯក្រុមប្រឹក្សាអភិវឌ្ឍន៍កម្ពុជា ក្រោមអធិបតីរបស់ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក គាត ឈន់។
តំណាងអង្គការចំនួនបី នឹងត្រូវបានអនុញ្ញាតឲ្យចូលរួមក្នុងកិច្ចប្រជុំនោះដែរ នៅក្នុងចំណោមអង្គការមិនមែនរដ្ឋាភិបាល សរុបជាង ៣ពាន់ នៅប្រទេសកម្ពុជា។
ប្រធាននៃគណៈកម្មាធិការចាត់ចែងរបស់វេទិកាអង្គការមិនមែនរដ្ឋាភិបាល ស្ដីពីកម្ពុជា អ្នកស្រី ប៉ុក បញ្ញាវិចិត្រ បានមានប្រសាសន៍ថា មតិ និងយោបល់នានា ដែលគ្រោងដាក់ជូននៅក្នុងកិច្ចប្រជុំនោះ គឺជាលទ្ធផលនៃការតាមដានដោយឯករាជ្យកន្លងមក អំពីដំណើរការអភិវឌ្ឍន៍នៅកម្ពុជា ដែលនៅមានការចន្លោះប្រហោង៖ «ការអនុវត្តក្របខណ្ឌច្បាប់ដែលមានស្រាប់ និងការបង្កើនតម្លាភាព គឺជាស្នូលធានាឲ្យបាននូវគ្រឹះប្រជាធិបតេយ្យ ដែលអនុញ្ញាតឲ្យមានការចូលរួមពិភាក្សាក្នុងលក្ខណៈស្ថាបនា និងសម្រេចបាននូវអភិបាលកិច្ចល្អ»។
កិច្ចប្រជុំរបស់តំណាងអង្គការមិនមែនរដ្ឋាភិបាលជាង១០០ នោះ មិនត្រូវបានចូលរួមដោយមន្រ្តីតំណាងរដ្ឋាភិបាលទេ ប៉ុន្តែមន្ត្រីរដ្ឋាភិបាលបានមានប្រសាសន៍ថា អនុសាសន៍របស់អង្គការមិនមែនរដ្ឋាភិបាលនោះ គឺជាអ្វីដែលរដ្ឋាភិបាលបានកែទម្រង់រួចទៅហើយកន្លងមក។
មន្ត្រីអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានមានប្រសាសន៍ថា គោលជំហររបស់ក្រុមអង្គការសង្គមស៊ីវិលនោះ លោកយល់ថា មាននិន្នាការនយោបាយច្រើនជាងវិជ្ជាជីវៈ៖ «គណៈកម្មាធិការជាតិរៀបចំការបោះឆ្នោតហ្នឹង ប្ដូរពីរ ឬបីដងរួចស្រេចទៅហើយ អាហ្នឹងមួយ។ យើងបានធ្វើបច្ចុប្បន្នភាព ដើម្បីឆ្លើយតបនឹងប្រសិទ្ធភាពនៃដំណើរការបោះឆ្នោតហ្នឹងឯង»។
នៅក្នុងចំណោមសេចក្តីព្រាងអនុសាសន៍ចំនួន ២២ចំណុចរបស់តំណាងអង្គការមិនមែនរដ្ឋាភិបាលជាង ១០០អង្គការនោះ មានដូចជា ការស្នើសុំឲ្យកែទម្រង់គណៈកម្មាធិការរៀបចំការបោះឆ្នោត (គ.ជ.ប)។ ការស្នើសុំឲ្យកែទម្រង់ប្រព័ន្ធតុលាការ រាប់ទាំងឲ្យមានច្បាប់ស្ដីពីការរៀបចំតុលាការ អយ្យការ និងច្បាប់ស្ដីពីលក្ខន្តិកៈចៅក្រម និងព្រះរាជអាជ្ញា និងឧត្តមក្រុមប្រឹក្សា នៃអង្គចៅក្រមជាដើម។
ក្រៅពីនេះ គឺមានការស្នើសុំឲ្យមានការកែទម្រង់ដីធ្លីដោយតម្លាភាព និងការគ្រប់គ្រងចំណូលធនធានប្រេង ឧស្ម័ន និងរ៉ែ ដោយច្បាប់មួយដែលល្អ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
