លោក គង់ គាំ ជាប្រធានស្ដីទីគណបក្ស សម រង្ស៊ី។ លោកបានឲ្យដឹងថា នៅព្រឹកថ្ងៃទី១៧ ខែមេសា ឆ្នាំ២០១២ បក្សខ្លួននឹងរៀបចំពិធីរាប់បាត្រ បង្សុកូល ឧទ្ទិសដល់វិញ្ញាណក្ខន្ធអ្នកស្លាប់ក្នុងសម័យខ្មែរក្រហម។ ពិធីនោះប្រារព្ធធ្វើនៅមជ្ឈមណ្ឌលប្រល័យពូជសាសន៍ជើងឯក និងមានមនុស្សជិត ១ពាន់នាក់ចូលរួម។
លោកឲ្យដឹងថា ពិធីបុណ្យនោះ មន្ត្រីគណបក្ស សម រង្ស៊ី នឹងថ្លែងសារនយោបាយទៅកាន់ថ្នាក់ដឹកនាំគណបក្សប្រជាជនកម្ពុជា កុំឲ្យលូកដៃចូលក្នុងកិច្ចការផ្ទៃក្នុងរបស់តុលាការខ្មែរក្រហម និងស្នើឲ្យតុលាការ ឬចៅក្រមជាតិ និងអន្តរជាតិ ត្រូវបន្តបេសកកម្មរបស់ខ្លួនឲ្យមានឯករាជ្យ ដើម្បីរកយុត្តិធម៌ជូនជនរងគ្រោះ។
កាលពីថ្ងៃទី១៣ ខែមេសា គណបក្ស សម រង្ស៊ី បានដាក់លិខិតជូនដំណឹងទៅសាលារាជធានីភ្នំពេញ ជុំវិញការរៀបចំពិធីបុណ្យថ្ងៃទី១៧ ខែមេសា ប៉ុន្តែលោក គង់ គាំ បានឲ្យដឹងថា មកដល់រសៀលថ្ងៃទី១៥ ខែមេសា នេះ សាលារាជធានីមិនទាន់មានការឆ្លើយតបទេ។
វិទ្យុអាសេរីសេរីមិនអាចទាក់ទងមន្ត្រីរដ្ឋាភិបាល ដើម្បីបំភ្លឺជុំវិញការលើកឡើងរបស់មន្ត្រីបក្សប្រឆាំងដែលថា មានមន្ត្រីបក្សកាន់អំណាចកំពុងជ្រៀតជ្រែកចូលកិច្ចការរបស់តុលាការខ្មែរក្រហមបានទេ នៅរសៀលថ្ងៃអាទិត្យ ទី១៥ ខែមេសា ឆ្នាំ២០១២។ ប៉ុន្តែកន្លងមក មន្ត្រីរដ្ឋាភិបាលបានបដិសេធថា មិនបានចូលជ្រៀតជ្រែកកិច្ចការរបស់តុលាការដូចការចោទប្រកាន់នោះទេ។
ទោះជាយ៉ាងនេះក្តី លោក គង់ គាំ ចង់ឃើញតុលាការខ្មែរក្រហមបើកការស៊ើបអង្កេតលើសំណុំរឿង ០០៣ និង ០០៤ បន្តទៀត ដើម្បីធ្វើជាគំរូ និងផ្ដល់យុត្តិធម៌ជូនគ្រួសារជនរងគ្រោះ។ លោកឲ្យដឹងថា ថ្ងៃ១៧ មេសា ឆ្នាំ១៩៧៥ ជាថ្ងៃដែលខ្មែរក្រហមឡើងកាន់អំណាច នាំឲ្យមានការសម្លាប់ពលរដ្ឋខ្មែរយ៉ាងរង្គាលរហូតដល់ជិត ២លាននាក់ ដូច្នេះតុលាការខ្មែរក្រហមត្រូវតែបន្តបេសកកម្មរបស់ខ្លួនឲ្យបានត្រឹមត្រូវ បន្តកិច្ចការរបស់ខ្លួនដោយឯករាជ្យ។
ទាក់ទងបញ្ហានេះដែរ រាជរដ្ឋាភិបាលកម្ពុជា តាមរយៈសាលារាជធានីភ្នំពេញ តែងបានប្រារព្ធពិធីរលឹកវិញ្ញាណក្ខន្ធអ្នកស្លាប់ ក្នុងសម័យខ្មែរក្រហមនៅវាលពិឃាតជើងឯក នៅថ្ងៃទី២០ ខែឧសភា ជារៀងរាល់ឆ្នាំ។
ពិធីរលឹកខួបដែលរដ្ឋាភិបាលជ្រើសយកថ្ងៃ២០ ខែឧសភា ដើម្បីរៀបចំពិធី ក៏ព្រោះតែនៅពេលពួកខ្មែរក្រហមឡើងកាន់អំណាច ពួកគេបានកំណត់យកថ្ងៃទី២០ ខែឧសភា ឆ្នាំ១៩៧៥ ជាថ្ងៃចាប់ផ្ដើមអនុវត្តគោលនយោបាយធ្វើទារុណកម្មរហូតឈានដល់ការសម្លាប់ពលរដ្ឋខ្មែរអស់ជិត ២លាននាក់ ក្នុងសម័យខ្មែរក្រហម ចន្លោះពីឆ្នាំ១៩៧៥ ដល់ឆ្នាំ១៩៧៩៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។