លោក ព្រំ វីរៈ ប្រធានការិយាល័យពិធីការរបស់ខុទ្ទកាល័យរដ្ឋសភាបានមានប្រសាសន៍នៅថ្ងៃទី៩ កញ្ញា ឲ្យដឹងថា ការរៀបចំប្រជុំនោះបានដំណើរការដោយមានយាងព្រះមហាក្សត្រជាព្រះអធិបតី និងមានអញ្ជើញអង្គទូតបរទេសដែលមានស្ថានទូតនៅប្រទេសកម្ពុជា រួមជាមួយតំណាងអង្គការអន្តរជាតិ និងសមាជិកសភាថ្មីតាមការប្រកាសរបស់គណៈកម្មាធិការជាតិរៀបចំការបោះឆ្នោតចំនួន១២៣រូបចូលរួមផង។
លោក ព្រំ វីរៈ បានឲ្យដឹងថា ៖ «ថ្ងៃ២៤ហ្នឹងហើយ។ អញ្ជើញតំណាងរាស្រ្ដ អង្គទូតអីហ្នឹង អង្គការអន្តរជាតិអី។ ព្រះករុណាលោកយាងជាព្រះរាជអធិបតីខ្ពង់ខ្ពស់បើក»។
ទាក់ទងជាមួយការប្រជុំសភានៅថ្ងៃទី២៤ កញ្ញានេះដែរ លោកបណ្ឌិត ជាម យៀប សមាជិកសភានិងជាសមាជិកគណៈអចិន្រ្តៃយ៍របស់គណបក្សប្រជាជនកម្ពុជាបានមានប្រសាសន៍ឲ្យដឹងថា សមាជិកសភាដែលត្រូវចូលរួមការប្រជុំលើកទីមួយនោះបានត្រូវអញ្ជើញដោយព្រះមហាក្សត្រ។
លោកបណ្ឌិត ជាម យៀប បានមានប្រសាសន៍ថា ៖ «យោងទៅតាមច្បាប់អត់មានទាស់អីទេ គឺថាព្រះមហាក្សត្រលោកឡាយព្រះហស្ដលេខា អញ្ជើញទាំង១២៣ បើលោកអញ្ជើញតែ៩០ អាហ្នឹងខុស បើលោកអញ្ជើញទាំង១២៣ហើយ ប៉ុន្តែត្រង់អ្នកដែលមិនទៅគឺជាសិទ្ធិរបស់អ្នកមិនទៅ។ អ៊ីចឹងទេអត់មានខុសនឹងច្បាប់រដ្ឋធម្មនុញ្ញ ខុសស្អីទេ»។
លោក សុន ឆ័យ សមាជិកសភាមកពីគណបក្សសមរង្ស៊ីបានមានប្រសាសន៍ឲ្យដឹងថា មកទល់ពេលនេះគណបក្សសមរង្ស៊ីនៅតែប្រកាន់ជំហរមិនចូលរួមប្រជុំជាមួយសមាជិកសភាមកពីគណបក្សប្រជាជនកម្ពុជា ហើយថ្មីៗនេះបានសុំព្រះមហាក្សត្រស្បថដោយឡែកនៅថ្ងៃទី២៥ កញ្ញាទៀតផង តែមិនទាន់បានទទួលចម្លើយពីព្រះមហាក្សត្រនៅឡើយ។
លោក សុន ឆ័យ បានឲ្យដឹងថា ៖ «មកទល់ពេលនេះយើងមិនទាន់មានការដូរអីទេ យើងនៅចាំមើលចម្លើយពីព្រះមហាក្សត្រដែរ ព្រោះគណបក្សសមរង្ស៊ីសុំឲ្យមានការស្បថថ្ងៃ២៥ ស្បថដោយឡែក។ ហើយការសម្រេចបែបណាទៀតយើងនឹងធ្វើនៅពេលយើងទទួលជាកិច្ចឆ្លើយតបពីព្រះមហាក្សត្រ លោកចារមកយ៉ាងណានោះ ទើបគណបក្សយកសេចក្ដីនូវការឆ្លើយតបរបស់ព្រះមហាក្សត្រនេះ យកទៅពិនិត្យមើលថាតើសម្រេចយ៉ាងណា?»។
តាមមាត្រា៨២នៃរដ្ឋធម្មនុញ្ញបានចែងថា រដ្ឋសភាបើកសម័យប្រជុំដំបូង៦០ថ្ងៃយ៉ាងយូរក្រោយពេលបោះឆ្នោត តាមការកោះប្រជុំរបស់ព្រះមហាក្សត្រ។ មុនពេលចាប់ផ្តើមការងាររបស់ខ្លួនរដ្ឋសភាត្រូវអនុម័តបទបញ្ជាផ្ទៃក្នុង សម្រេចអំពីសុពលភាពនៃអាណត្តិរបស់សមាជិកនីមួយៗ និងត្រូវបោះឆ្នោតរើសដាច់ដោយឡែកពីគ្នានូវប្រធាន និងអនុប្រធានរដ្ឋសភា និងសមាជិកទាំងអស់នៃគណៈកម្មាការនានារបស់រដ្ឋសភា ដោយមតិ២ភាគ៣នៃសមាជិករដ្ឋសភាទាំងមូល។តំណាងរាស្រ្តទាំងអស់ត្រូវធ្វើសច្ចាប្រណិធានមុនពេលចូលកាន់តំណែង៕