ពលរដ្ឋមួយចំនួនដែលរងការបណ្តេញចេញពីដីភូមិអូរអាមាន់ នៅក្នុងឃុំកូនក្រៀល ក្រុងសំរោង ខេត្តឧត្តរមានជ័យ បានថ្លែងអះអាងប្រាប់វិទ្យុអាស៊ីសេរីថា កាលពីរសៀលថ្ងៃសុក្រ ទី៩ ខែតុលា ឆ្នាំ២០០៩នេះ ក្រុមសមត្ថកិច្ចចម្រុះដែលរួមមានប៉ូលិស ប៉េអឹមនិងទាហាន ប្រដាប់ដោយអាវុធវែងខ្លី បាននាំគ្នាទៅបណ្តេញពលរដ្ឋអ្នកភូមិរាប់រយគ្រួសារឲ្យចេញពីដីដែលពលរដ្ឋរស់នៅជាយូរមកហើយ ដើម្បីយកដីប្រគល់ឲ្យក្រុមហ៊ុន ANGKOR SUGAR ថាដើម្បីវិនិយោគទុនដាំអំពៅ។
ពលរដ្ឋរាប់រយគ្រួសារដែលបាត់បង់ទីជម្រកត្រូវរស់នៅក្រោមដំណក់ទឹកភ្លៀង បន្ទាប់ពីក្រុមប្រដាប់អាវុធទាំងនោះបានបញ្ជាឲ្យគ្រឿងចក្រឈូសឆាយរំលំនិងដុតបំផ្លាញផ្ទះសម្បែងរបស់ពលរដ្ឋ។
ពលរដ្ឋខ្មែរអ្នកក្រីក្រទាំងនោះស្រែកទ្រហោយំអំពាវនាវរកអន្តរាគមន៍ពីមេដឹកនាំរដ្ឋាភិបាលកម្ពុជាដើម្បីឲ្យជួយបញ្ឈប់សកម្មភាពប្រើអំណាចធ្វើបាបពលរដ្ឋជាតិសាសន៍របស់ខ្លួន ដោយគ្មានក្តីមេត្តានោះផង ៖ «ដុតផ្ទះខ្ញុំអស់រលីងទៀតហើយ គេចាប់អស់ហើយ កូនខ្ញុំ ប្ដីខ្ញុំ គេដេញចេញ កំពុងតែធ្វើសកម្មភាពហ្នឹងឯង។ នេះដល់ដំណាក់កាលខ្មែរដេញខ្មោចហើយ មកឈូសឆាយរបស់គ្នាអស់រលីង គ្មានស្រូវគ្មានអីហូបទេ។ លោកអើយមេត្តាជួយផង! សម្ដេចនាយករដ្ឋមន្ត្រីលោកជួយ! កូនខ្ញុំដេកហាលភ្លៀង ហាលសន្សើម»។
គណៈកម្មាធិការអង្គការសមាគមការពារសិទ្ធិមនុស្សមួយក្រុមបានបញ្ជូនបុគ្គលិកទៅកាន់កន្លែងកើតហេតុដើម្បីតាមពិនិត្យមើលសកម្មភាពនៃការបណ្តេញពលរដ្ឋចេញពីលំនៅឋានកាលពីថ្ងៃសុក្រកន្លងមកនេះ ប៉ុន្តែត្រូវបានក្រុមសមត្ថកិច្ចរារាំងមិនឲ្យចូលទៅកាន់ទីនោះបានទេ។
អ្នកស៊ើបអង្កេតរបស់គណៈកម្មាធិការប្រព្រឹត្តិកម្មនៃអង្គការសមាគមការពារសិទ្ធិមនុស្សកម្ពុជា លោក ចាន់ សុវ៉េត មានប្រសាសន៍ថា យ៉ាងហោចណាស់គេឃើញមានកម្លាំងប៉ូលិស ប៉េអឹមនិងទាហានប្រមាណ៥០នាក់ ត្រូវបានបញ្ជូនឲ្យទៅហ៊ុមព័ទ្ធជាច្រើនថ្ងៃ តាំងពីមុនថ្ងៃបណ្តេញពលរដ្ឋអ្នកភូមិឲ្យចេញពីដីនោះ។
លោក ចាន់ សុវ៉េត មានប្រសាសន៍បន្តថា ចាប់តាំងពីថ្ងៃដាក់កម្លាំងប្រដាប់អាវុធហ៊ុមព័ទ្ធអ្នកភូមិនោះមក សមត្ថកិច្ចបានចាប់ខ្លួនតំណាងអ្នកភូមិចំនួន៣នាក់ និងបានវាយដំបុរសម្នាក់ផ្សេងទៀតឲ្យរងរបួសធ្ងន់បាក់ដៃ។
លោក ចាន់ សុវ៉េត បានបញ្ជាក់ថា ៖ «បានទទួលព័ត៌មាន បានប្រមូលព័ត៌មានមួយចំនួន ប៉ុន្តែយើងអត់ទាន់បានទាក់ទងឲ្យជិតស្និទ្ធជាមួយអាជ្ញាធរទេ គឺគេបានដាក់កម្លាំងហ៊ុមព័ទ្ធតំបន់ដីទំនាស់ ដែលជាក្រុមហ៊ុន Angkor Sugar ហ្នឹងណា៎។ គេដាក់កម្លាំងហ៊ុមព័ទ្ធហ្នឹងគឺតាំងតែពី៤ថ្ងៃមុនម៉្លេះ ហើយចាប់តាំងពីដាក់កម្លាំងហ៊ុមព័ទ្ធតំបន់ដីទំនាស់ហ្នឹង គឺគេបានចាប់ខ្លួនប្រជាពលរដ្ឋចំនួន៣នាក់រួចហើយ មិនតែប៉ុណ្ណោះគេបង្ករបួសស្នាមទៅលើបុរសម្នាក់ផ្សេងទៀត បាក់ដៃ»។
ក្រុមអ្នកការពារសិទ្ធិមនុស្សនៃអង្គការក្រៅរដ្ឋាភិបាលបានរកឃើញថា យោងទៅតាមពាក្យបណ្តឹងគឺមានប្រជាពលរដ្ឋចំនួនជាង២១០គ្រួសារដែលពាក់ព័ន្ធនឹងការបណ្តេញឲ្យចេញពីដីនោះ ប៉ុន្តែថា អាជ្ញាធរព្រមទទួលស្គាល់និងត្រៀមដោះដូរសំណងជាដីកន្លែងផ្សេងឲ្យពលរដ្ឋតែចំនួនជាង៨០គ្រួសារប៉ុណ្ណោះ ដោយសំអាងថា សងទៅតាមការពិនិត្យជាក់ស្តែង ចំពោះអ្នកដែលកំពុងមានវត្តមានរស់នៅលើដីដែលកំពុងមានបញ្ហា។
វិទ្យុអាស៊ីសេរីនៅមិនទាន់អាចទាក់ទងបានដើម្បីសុំសេចក្តីបំភ្លឺពីបញ្ហានេះពីមន្ត្រីនៃអាជ្ញាធរខេត្តឧត្តរមានជ័យនៅឡើយទេមកដល់ពេលនេះ៕