មនុស្ស៤នាក់ស្លាប់និង២នាក់របួសដោយសារផ្ទុះមីនតោននៅបាត់ដំបង
mn.mp3
មូលហេតុដែលបណ្ដាលឲ្យផ្ទុះមីនតោននោះ ដោយសារជនរងគ្រោះទាំងនោះបានបរម៉ាស៊ីនគោយន្តដឹកពោតចេញពីដីចម្ការមួយកន្លែង ស្ថិតនៅក្រុមទី៥ ភូមិដូនព្រឹក ឃុំតាសាញ់ ស្រុកសំឡូត ខេត្តបាត់ដំបង។
លោក នួន មុត នាយសេនាធិការ អធិការដ្ឋាននគរបាលស្រុកសំឡូត បានថ្លែងនៅថ្ងៃច័ន្ទ ទី៨ ខែតុលា ថា នៅមុនពេលកើតហេតុ ក្រុមអ្នកភូមិបានបើកម៉ាស៊ីនគោយន្តចំនួនពីរគ្រឿង ដឹកពោត ចេញពីចម្ការ។ លុះដល់កន្លែងកើតហេតុ មានម៉ាស៊ីនគោយន្តមួយគ្រឿងមានអ្នកជិះ ៦នាក់ បាន ជាប់ផុង។ នៅពេលនោះ អ្នកជិះលើគោយន្តបីនាក់បានចុះរុញ ក៏កិនចំលើគ្រាប់មីនតោនសេសសល់នៅក្រោមដី កាលពីសម័យសង្គ្រាមបណ្ដាលឲ្យផ្ទុះឡើង។
លោក នួន មុត៖ «ដឹកពោត ព្រោះផ្លូវគាត់ដឹកចេញមកពីរបីសាហើយ ផ្លូវក្បែរផ្ទះ...។ ដឹកពោតមកដល់ហ្នឹង គោយន្តទី១ បានឆ្លងទៅផុត គោយន្តទី២ ជាប់ផុង នាំគ្នាចុះរុញ។ រុញទៅវាផ្ទុះមីនហ្នឹងទៅ ពេលរុញកិនលើមីន ហើយផ្ទុះសាកសព ពីរនៅល្អ សាកសពម្នាក់ទៀត បែកជាបំណែក គោយន្តខ្ទេចអស់...»។
ការផ្ទុះគ្រាប់មីនតោននេះ បានសម្លាប់មនុស្សបីនាក់នៅនឹងកន្លែងកើតហេតុ និងម្នាក់ទៀតរបួសធ្ងន់ តែបានស្លាប់នៅពេលបញ្ជូនដល់មន្ទីរក្នុងខេត្តបាត់ដំបង។
ជនរងគ្រោះដែលស្លាប់ទាំង ៤នាក់ មានឈ្មោះ ចេង ឌីន អាយុ ៣៦ឆ្នាំ ឈ្មោះ ណុប នួន អាយុ ២២ឆ្នាំ ឈ្មោះ ណុប នុន អាយុ ១៩ឆ្នាំ និងម្នាក់ទៀតដែលស្លាប់នៅមន្ទីរពេទ្យមានឈ្មោះ ទឹម ណន អាយុ ៤៥ឆ្នាំ។ ចំណែកជនរងរបួសពីរនាក់ទៀត មានឈ្មោះ ណុប ណាត អាយុ ២៥ឆ្នាំ និងឈ្មោះ ចេង ដា អាយុ ២៥ឆ្នាំ។ អ្នកស្លាប់ និងអ្នករងរបួស ជាអ្នករស់នៅភូមិដូនព្រឹក ឃុំតាសាញ ស្រុកសំឡូត ខេត្តបាត់ដំបង។
នេះជាករណីផ្ទុះគ្រាប់មីនតោនដែលសេសសល់ពីសម័យសង្គ្រាមថ្មីមួយករណីទៀតនៅក្នុងខេត្ត បាត់ដំបង។ កាលពីថ្ងៃទី៣០ ខែកញ្ញា កន្លងទៅ គ្រាប់មីនតោនបានផ្ទុះសម្លាប់មនុស្សចំនួន ៦នាក់ និងរបួសពីរនាក់ ខណៈដែលជនរងគ្រោះទាំង ៨នាក់ បាននាំគ្នាជិះគោយន្តកាត់តាមផ្លូវលំមួយ ស្ថិតក្នុងភូមិបាណង់ ឃុំស្ដៅ នៅស្រុករតនៈមណ្ឌល ខេត្តបាត់ដំបង។
សមត្ថកិច្ចប៉ូលិសបានបញ្ជាក់ថា រណ្ដៅផ្ទុះគ្រាប់មីនតោនទាំងពីរករណីនៅស្រុកសំឡូត និងស្រុករតនៈមណ្ឌល ខេត្តបាត់ដំបងនេះ មានទំហំធំ ហើយទំនងគ្រាប់មីនតោននោះ ត្រូវបានគេដាក់ត្រួតលើគ្នា ដើម្បីប្រឆាំងទៅនឹងរថពាសដែកនៅក្នុងសម័យសង្គ្រាម រវាងកងទ័ពខ្មែរក្រហម និងកងទ័ពនៃរបបសាធារណរដ្ឋប្រជាមានិតកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
