លោក សេង ផល្លី ប្រធានក្រុមកម្ទេចយុទ្ធភណ្ឌមិនទាន់ផ្ទុះរបស់កងឯកភាពកម្ចាត់មីនទី៦នៃមជ្ឈមណ្ឌលសកម្មភាពកម្ចាត់មីនកម្ពុជា CMAC ដែលបានទៅយកគ្រាប់ទាំងនោះដើម្បីកម្ទេចចោល បានមានប្រសាសន៍ថា គ្រាប់កាំភ្លើងធំទាំង៥គ្រាប់នេះជាប្រភេទកាំភ្លើងផ្លោងធុន១០៥មីលីម៉ែត្រដែលផលិតនៅប្រទេសអាមេរិក ដែលវាជាគ្រាប់សេសសល់ពីសម័យលន់ នល់។
លោក សេង ផល្លី មានប្រសាសន៍ឲ្យដឹងដូច្នេះ ៖ «ជាគ្រាប់១០៥មីលីម៉ែត្រ។ គ្រាប់នេះមិនមែនជាគ្រាប់សម័យថ្មីៗនេះទេ វាសល់ពីសម័យ លន់ នល់ មកហើយ។ គ្រាប់នេះបើសិនជាយើងយកទៅបាញ់វាពិបាកដែរ វាច្រេះ ប៉ុន្តែប្រាកដជានៅផ្ទុះ ព្រោះវាមានរំសេវនៅក្នុងហ្នឹង»។
លោកវរសេនីយ៍ទោ ឆេត ញ៉ា ប្រធានការិយាល័យគ្រប់គ្រងអាវុធជាតិផ្ទុះនិងជាតិពុលនៃស្នងការនគរបាលខេត្តសៀមរាប បានមានប្រសាសន៍ថា កន្លែងស្តាតចាស់នេះធ្លាប់ជាអតីតកន្លែងកាំភ្លើងធំរបស់ទាហានសាធារណរដ្ឋខ្មែររបស់លោកសេនាប្រមុខ លន់ នល់ ដែលមានគ្រាប់កាំភ្លើងធំជាច្រើននៅសេសសល់កប់ក្រោមដី ហើយកាលពីប៉ុន្មានឆ្នាំមុនខាង CMAC ធ្លាប់បានរាវរកឃើញប្រមាណជាង៥០គ្រាប់នៅក្នុងតំបន់នោះ៕