មនុស្ស៦នាក់ត្រូវចាប់ខ្លួនពាក់ព័ន្ធនឹងការទន្ទ្រានដីព្រៃលិចទឹកនៅកំពង់ធំ
cp.mp3
ជនសង្ស័យទាំងនោះ រួមមានមន្ត្រីមន្ទីរធនធានទឹក និងឧតុនិយមខេត្ត មេឃុំសំព្រោច និងប្រជាពលរដ្ឋ ៤នាក់ផ្សេងទៀត។
ជនសង្ស័យ ៦នាក់ ត្រូវចាប់ខ្លួនយ៉ាងប្រញាប់ប្រញាល់ និងបញ្ជូនខ្លួនភ្លាមៗមកកាន់រាជធានីភ្នំពេញ នៅថ្ងៃទី២៤ កក្កដា។ ការចាប់ខ្លួននេះមិនត្រូវអនុញ្ញាតឲ្យគ្រួសារជនសង្ស័យដឹងនោះឡើយ។
ភរិយាលោកមេឃុំសំព្រោច អ្នកស្រី លាន់ សេងលី ឲ្យដឹងនៅថ្ងៃទី២៥ នេះថា លោក ពាញ ពោល ដែលជាស្វាមីអ្នកស្រី ត្រូវអាជ្ញាធរចាប់ខ្លួន ហើយអ្នកស្រីមិនបានដឹងពីមូលហេតុនៃការចាប់ខ្លួនស្វាមីអ្នកស្រីនោះឡើយ៖ «គេមករក ក៏ខ្ញុំតេទៅបិទទូរស័ព្ទអស់រលីង ក៏ខ្ញុំឆោឡោ ប៉េអឹមគេហៅទៅក៏បាត់ឈឹងចេះឯង។ ខ្ញុំភ័យ ខ្ញុំរកគេរកឯងជូនទៅកន្លែងប៉េអឹម ដល់ជួលដល់កន្លែងប៉េអឹម គេថាគេមិនចាប់ខ្លួនទេ គេយកទៅថា ដឹងយកមុខទៅណា»។
បងប្រុសបង្កើតរបស់មេឃុំសំព្រោច លោក ពាញ ពិន មានប្រសាសន៍ថា ប្អូនប្រុសរបស់លោក គឺលោកឈ្មោះ ពាញ ពោល និងមន្ត្រីនៃមន្ទីរធនធានទឹក និងឧតុនិយម ព្រមទាំងប្រជាពលរដ្ឋ ៤នាក់ផ្សេងទៀត ត្រូវកងរាជអាវុធហត្ថលើផ្ទៃប្រទេសចាប់ខ្លួនថ្ងៃទី២៤ កក្កដា បញ្ជូនទៅរាជធានីភ្នំពេញ។ តែលោកមិនដឹងថា ការចាប់ខ្លួននោះចោទពីបទអ្វីនោះឡើយ ហើយនៅថ្ងៃទី២៥ កក្កដា នេះ អ្នកទាំងនោះត្រូវកងរាជអាវុធហត្ថបញ្ជូនទៅកាន់សាលាដំបូងរាជធានីភ្នំពេញ និងបើកការសាកសួរដោយចៅក្រមសាកសួរសាលាដំបូងលោក សេង នាង។
វិទ្យុអាស៊ីសេរីមិនអាចទាក់ទងមន្ត្រីនាំពាក្យកងរាជអាវុធហត្ថលើផ្ទៃប្រទេស លោក ខេង ទីតូ និងចៅក្រមស៊ើបសួរសាលាដំបូងរាជធានីភ្នំពេញ លោក សេង នាង ដើម្បីបំភ្លឺពីករណីនេះបានទេនៅថ្ងៃទី២៥ កក្កដា។
ទាក់ទងនឹងចំណាត់ការចុះបង្ក្រាបមន្ត្រីរដ្ឋាភិបាលនេះ អង្គការសង្គមសំដែងការសាទរ។
អនុប្រធានផ្នែកអង្កេតសមាគមការពារសិទ្ធិមនុស្សអាហុដ (Adhoc) លោក ចាន់ សុវ៉េត លើកឡើងថា កន្លងមកមន្ត្រីរដ្ឋាភិបាលមួយចំនួនបានប្រព្រឹត្តបទល្មើសព្រៃឈើស្ទើរគ្រប់កន្លែងទូទាំងប្រទេស តែមន្ត្រីទាំងនោះគេពុំសូវឃើញមានការចាប់យកមកផ្ដន្ទាទោសនោះឡើយ ដូច្នេះការបង្ក្រាបនេះនឹងធ្វើឲ្យមន្ត្រីផ្សេងៗទៀតដែលកំពុងប្រព្រឹត្តបទល្មើសអាចខ្លាចរអាជាងមុន ហើយបទល្មើសព្រៃឈើ ឬព្រៃលិចទឹកទាំងនោះនឹងត្រូវកាត់បន្ថយ។
លោក ចាន់ សុវ៉េត៖ «បើតាមអ្វីដែលជាសេចក្ដីរាយការណ៍ខាងដើម បញ្ជាក់ថា អ្នកទាំងអស់នោះសុទ្ធតែធ្លាប់បានប្រព្រឹត្តបទល្មើសពីខាងដើម ទាក់ទងនឹងព្រៃលិចទឹក ហ៊ុមព័ទ្ធយកដីខុសច្បាប់ជាដើម អ៊ីចឹងនៅពេលមានចាប់ខ្លួនអ្នកទាំង ៦ជាបន្តបន្ទាប់នោះ វាមានលក្ខខណ្ឌល្អប្រសើរ»។
ជនសង្ស័យទាំង ៦នាក់ មានទី១ ប្រធានមន្ទីរធនធានទឹកខេត្តកំពង់ធំ លោក ជាតិ សុវុត្ថា អាយុ ៤៨ឆ្នាំ ទី២ មេឃុំសំព្រោច ពាញ ពោល អាយុ ៤១ឆ្នាំ ទី៣ យក់ គឹមឡេន ភេទស្រី អាយុ ៥៩ឆ្នាំ ទី៤ ថាវ ទុំ អាយុ ៣១ឆ្នាំ ទី៥ ធាង ធា អាយុ ៣៣ឆ្នាំ និងទី៦ ម៉េង ផល្លី អាយុ ៥០ឆ្នាំ ទាំង ៤នាក់ ជាកសិករ។
ជនសង្ស័យទាំង ៦នាក់ ត្រូវចៅក្រមសាលាដំបូងរាជធានីភ្នំពេញ ចេញដីកាបង្គាប់ឲ្យចាប់ខ្លួន និងចោទថា បានធ្វើសកម្មភាពបំពាននៅក្នុងតំបន់ហាមឃាត់ដែលជាតំបន់គ្រប់គ្រងដោយស្ថាប័នជលផល និងធនធានទឹក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
