អាដហុក ជំរុញ​រដ្ឋាភិបាល​ដក​ហូត​អាជ្ញាប័ណ្ណ​ពី​ក្រុមហ៊ុន​វៀតណាម​ចំនួន​ពីរ

សមាគម​ការពារ​សិទ្ធិ​មនុស្ស​អាដហុក (Adhoc) បាន​ជំរុញ​ឲ្យ​រដ្ឋាភិបាល​បញ្ឈប់​ដំណើរ​ការ​សកម្មភាព​របស់​ក្រុមហ៊ុន និង​ដក​ហូត​យក​មក​វិញ​នូវ​អាជ្ញាប័ណ្ណ​ពី​ក្រុមហ៊ុន​ដី​សម្បទាន​សេដ្ឋកិច្ច​វៀតណាម ចំនួន​ពីរ ដែល​បាន​ប្រព្រឹត្ត​ខុស​គោលដៅ​សម្បទាន។
ដោយ ខែ សុណង
2013-01-05
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
គំនរ​ឈើ​ខុស​ច្បាប់ ខេត្ត​ក្រចេះ ៣០៥
១០-ធ្នូ-២០១២៖ គំនរ​ឈើ​សុក្រំ ផ្ចឹក ត្បែង ទំហំ​មុខ​៥០​ឡើង​ទៅ ប្រមាណ ៦០​ដើម ត្រូវ​ក្រុមហ៊ុន​៧២ បាន​ប្រមូល និង​ដឹក​ចេញ​ភ្លាមៗ​តាម​ច្រក​ប៉ុស្តិ៍​អូរថ្ម ទៅ​ប្រទេស​វៀតណាម។
Photo by ADHOC

ការ​ស្នើ​សុំ​នេះ បន្ទាប់​ពី​កង​កម្លាំង​សមត្ថកិច្ច​ចម្រុះ​ខេត្ត​រតនគិរី ជាមួយ​សមាជិក​សហគមន៍​ការពារ​ព្រៃឈើ បាន​ចុះ​បង្ក្រាប​ការ​កាប់​ឈើ​ខុស​ច្បាប់​រាប់​ពាន់​ដើម ដែល​កើត​មាន​នៅ​ក្នុង​តំបន់​ដី​សម្បទាន​សេដ្ឋកិច្ច​នោះ។

មន្ត្រី​សមាគម​អាដហុក នៅ​ថ្ងៃ​ទី៤ ខែ​មករា ឆ្នាំ​២០១៣ បាន​ស្នើ​សុំ​ឲ្យ​រដ្ឋាភិបាល​ចាត់​វិធាន​ការ​អង្កេត​ឃ្លាំ​មើល​ចំពោះ​បុគ្គល​អាជ្ញាធរ​មូលដ្ឋាន មន្ត្រី​ស្ថាប័ន​ជំនាញ និង​សមត្ថកិច្ច​ដែល​ពាក់ព័ន្ធ ដែល​បង្ក​ឲ្យ​មាន​បទ​ល្មើស​កាប់​បំផ្លាញ​ព្រៃឈើ​នៅ​ខេត្ត​រតនគិរី។

ប្រធាន​ផ្នែក​ដីធ្លី និង​សាលា​ក្ដី​ខ្មែរ​ក្រហម​នៃ​សមាគម​អាដហុក លោក ឡាត់ គី បាន​ថ្លែង​ថា សមាគម​ស្នើ​ឲ្យ​រដ្ឋាភិបាល​បញ្ឈប់​ដំណើរ​ការ និង​ដក​ហូត​យក​មក​វិញ​នូវ​អាជ្ញាប័ណ្ណ​ពី​ក្រុមហ៊ុន​ដី​សម្បទាន​សេដ្ឋកិច្ច​វៀតណាម ចំនួន​ពីរ គឺ​ក្រុមហ៊ុន ដាយ​ដុង​យឿង (Dai Dong Yoeun) និង​ក្រុមហ៊ុន​៧២ ហៅ​ជា​ភាសា​អង់គ្លេស​ថា សេវិនធី ធូ (Seventy Two) ដែល​បាន​ប្រព្រឹត្ត​ខុស​ពី​គោលដៅ​សម្បទាន​ទាំង​ស្រុង និង​ស្នើ​សុំ​ឲ្យ​ដាក់​ទណ្ឌកម្ម​ចំពោះ​ការ​រំលោភ​បំពាន​ច្បាប់​ព្រៃឈើ ហើយ​កុំ​ឲ្យ​ក្រុមហ៊ុន​ដទៃ​ដែល​ទទួល​បាន​ដី​សម្បទាន​សេដ្ឋកិច្ច​ពី​រដ្ឋ​ត្រាប់​តាម​ជា​គំរូ។

លោក ឡាត់ គី៖ «យើង​សុំ​ទាម​ទារ​ទៅ​ដល់​រាជ​រដ្ឋាភិបាល​កម្ពុជា សុំ​ឲ្យ​គាត់​បញ្ឈប់​នូវ​ដំណើរ​ការ​របស់​ក្រុមហ៊ុន ហើយ​និង​ដក​ហូត​មក​វិញ​នូវ​អាជ្ញា​ប័ណ្ណ​ទៅ​លើ​ក្រុមហ៊ុន និង​ដាក់​ទណ្ឌកម្ម​ចំពោះ​សម្បទានិក​ទាំង​ឡាយ​ដែល​បាន​កាប់​ឈើ​ខុស​ច្បាប់​នៅ​ក្នុង​ខេត្ត​រតនគិរី។ ទន្ទឹម​គ្នា​ជាមួយ​នឹង​ស្ថានភាព​ក្នុង​ខេត្ត​រតនគិរី នេះ គឺ​មាន​ក្រុមហ៊ុន​ជា​ច្រើន​ដែល​បាន​ធ្វើ​ការ​នៅ​ក្រោម​ផ្លាក​សម្បទាន​សេដ្ឋកិច្ច ក៏​ដូច​ជា​សម្បទាន​រ៉ែ​ដទៃ​ឯទៀត។ ប៉ុន្តែ​ព្រៃឈើ​នៅ​តំបន់​នោះ គឺ​រង​នូវ​ការ​បំផ្លិចបំផ្លាញ​យ៉ាង​ធ្ងន់ធ្ងរ»

នៅ​ក្នុង​សេចក្ដី​ថ្លែងការណ៍​របស់​សមាគម​អាដហុក ចេញ​ផ្សាយ​នៅ​ថ្ងៃ​ទី៣ មករា បាន​សម្ដែង​ការ​កោត​សរសើរ​ចំពោះ​ការ​ចាត់​វិធានការ​ពី​សំណាក់​កង​កម្លាំង​សមត្ថកិច្ច​ចម្រុះ និង​សាលា​ដំបូង​ខេត្ត​រតនគិរី រួម​ជាមួយ​សហគមន៍​ព្រៃឈើ​ភូមិ​ឡំ ឃុំ​ប៉ក់ញ៉ៃ ស្រុក​អូរយ៉ាដាវ ខេត្ត​រតនគិរី ក្នុង​ការ​បង្ក្រាប​ការ​កាប់​រលំ​ព្រៃឈើ​ខុស​ច្បាប់​រាប់​ពាន់​ដើម ដែល​កើត​មាន​ក្នុង​តំបន់​ដី​សម្បទាន​សេដ្ឋកិច្ច​របស់​ក្រុមហ៊ុន​វៀតណាម ទាំង​ពីរ​នោះ។

យ៉ាង​ណា​ក៏​ដោយ អភិបាល​ខេត្ត​រតនគិរី លោក ប៉ាវ ហមផាន បាន​ថ្លែង​ដោយ​ខ្លី​ថា ការ​ចេញ​សេចក្ដី​ថ្លែង​ការណ៍​នេះ គឺ​ជា​រឿង​នយោបាយ។

លោក ប៉ាវ ហមផាន៖ «វា​មិន​មែន​ជា​សេចក្ដី​ថ្លែងការណ៍​អី ពួក​ហ្នឹង​គេ​ប្រឆាំង​តាំង​ពី​ដើម​មក គេ​មិន​យល់​ថា​អា​រឿង​អនុវត្ត​ដី​សម្បទាន​សេដ្ឋកិច្ច អា​ហ្នឹង​ជា​ការ​វិនិយោគ​ធម្មតា។ ការ​វិនិយោគ​វា​តែង​មាន​បញ្ហា​មក​ចេញ​សេចក្ដី​ថ្លែងការណ៍​អី​ហ្នឹង រឿង​គេ​គិត​តែ​រឿង​នយោបាយ​ប្រឆាំង​ហ្នឹង​ឯង»

នៅ​ក្នុង​សេចក្ដី​ថ្លែងការណ៍​ដដែល​បាន​ឲ្យ​ដឹង​ទៀត​ថា កាល​ពី​ថ្ងៃ​ទី១ ខែ​មករា ឆ្នាំ​២០១៣ ភ្នាក់ងារ​សមាគម​អាដហុក និង​សមាជិក​សហគមន៍​ការពារ​ព្រៃឈើ​ភូមិ​ឡំ បាន​ប្រទះ​ឃើញ​ទីតាំង​ស្ដុក​ឈើ​ជា​ច្រើន​កន្លែង ដែល​ផ្ទុក​ឈើ​មូល​សរុប​ប្រមាណ​ជា ៣​ពាន់​ដើម រក្សា​ទុក​នៅ​ក្បែរ​ព្រំដែន​កម្ពុជា វៀតណាម ជាពិសេស​បាន​ពិនិត្យ​ដាន​ឡាន​ដឹក​ជញ្ជូន​ឈើ​ចេញ​ទៅ​តាម​ច្រក​ព្រំដែន។

កាល​ពី​ថ្ងៃ​សៅរ៍ ទី២២ ខែ​ធ្នូ ឆ្នាំ​២០១២ ព្រះរាជ​អាជ្ញា​អម​តុលាការ​ខេត្ត​រតនគិរី បាន​សម្រេច​ចោទ​ប្រកាន់ និង​ឃុំ​ខ្លួន​ពលរដ្ឋ​វៀតណាម ៧​នាក់​បណ្ដោះ​អាសន្ន​នៅ​ពន្ធនាគារ បន្ទាប់​ពី​បាន​សាកសួរ​ជា​បឋម​នៅ​សៅរ៍ ទី២២ ខែ​ធ្នូ ដែល​បាន​ជាប់​ពាក់ព័ន្ធ​ក្នុង​ការ​កាប់​បំផ្លាញ​ព្រៃឈើ​ក្នុង​តំបន់​ដី​សម្បទាន​សេដ្ឋកិច្ច​របស់​ក្រុមហ៊ុន ដាយ​ដុង​យឿង និង​ក្រុមហ៊ុន​៧២។

ជន​ជាតិ​វៀតណាម ទាំង​៧​នាក់​នោះ​មាន​ឈ្មោះ ហ្វង មឹកលរ៉ុង ភេទ​ប្រុស អាយុ ៣២​ឆ្នាំ លឿង ង៉ុកយឹក ភេទ​ប្រុស អាយុ ៣៥​ឆ្នាំ ម៉ាយ ប៊ុនហា ភេទ​ប្រុស អាយុ ២៩​ឆ្នាំ ង្វៀង យ៉ីកាន់ ភេទ​ប្រុស​ អាយុ ៣៥​ឆ្នាំ ង្វៀង វ៉ាន់ជុង ភេទ​ប្រុស អាយុ ២៧​ឆ្នាំ ង្វៀង វ៉ាងហ៊ីហុង ភេទ​ប្រុស អាយុ ២០​ឆ្នាំ និង​ង្វៀង វ៉ាន់ក្វាង ភេទ​ប្រុស អាយុ ២៤​ឆ្នាំ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

Actually, the government officers rarely admit their mistake or fulfill their responsibilities as implementers and always refuse comments from outsider. Cambodia should have a law to monitor them and make punishment of those lazy government officers.

Jan 05, 2013 08:52 PM

អ្នក​អាន​អនាមិក

The governor should have said something to admire Adhoc. This guy is really stupid. Adhoc is not anti party. It is a social organization.

Jan 05, 2013 06:05 AM

អ្នក​អាន​អនាមិក

បក្សរើសមនុស្ស​ធុន ប៉ាវ ហមផាន ធ្វើជាអភិបាល​ខេត្ត
​រតនគិរី​ ពិតជា​ត្រូវ​មែន ។​ មនុស្សធុន​ហ្នឹង​ហើយដែល​
របប​អាពតក៏វាឲ្យ​ធ្វើជា​​ប្រ​ធាន​ភូមិ​ឬ​ប្រធាន​សហករណ៍
ដែរ ។ វា​ជា​ប្រភេទ​មនុស្ស សម្លាប់​គ្នា​ឯង​​បំពេញចិត្ត
ចៅហ្វាយ​នាយ​វា ចាត់​​ទុក​អ្នក​ចេះដឹង​ វិភាគតវ៉ា​ជាសត្រូវ
របស់​គោល​ការណ៍ នយោបាយ​បក្ស​របស់​វា​ទាំង​អស់៕

Jan 05, 2013 01:32 AM