នៅថ្ងៃទី៥ កញ្ញានេះ បន្ទាប់ពីតំណាងប្រជាពលរដ្ឋចំនួន៥នាក់បានទៅជួបចរចាជាមួយនឹងអភិបាលខណ្ឌដូនពេញ តំណាងក្រុមហ៊ុនស៊ូកាកូអ៊ីន តំណាងសាលាក្រុងភ្នំពេញ នៅទីស្នាក់ការនោះ អ្នកស្រី បេ ផារុំ បានឲ្យដឹងថាអភិបាលខណ្ឌដូនពេញបានយកសំណើរបស់ពួកគាត់ទៅថ្នាក់លើដើម្បីដោះស្រាយ ហើយពួកគេនឹងទទួលខុសត្រូវប្រសិនបើមានការស្រុតបាក់ផ្ទះរបស់ពលរដ្ឋក្នុងអំឡុងពេលដែលបូមខ្សាច់នោះ។
អ្នកស្រី បេ ផារុំ បានឲ្យដឹងថា ៖ «ពួកគេនឹងយកពាក្យហ្នឹងទៅពិភាក្សាខាងលើ អត់ដោះស្រាយខ្ញុំទៅសម្ដេច ហ៊ុន សែន ទៀត»។
តំណាងប្រជាពលរដ្ឋប្រមាណ៣០០នាក់ដែលបាននាំគ្នាមកតវ៉ានៅមុខទីស្នាក់ការគណៈកម្មាធិការអភិវឌ្ឍន៍បឹងកក់ បានឲ្យដឹងថាពួកគាត់តវ៉ាសុំឲ្យបញ្ឈប់ការបូមខ្សាច់ដាក់បឹងជាបណ្តោះអាស្ននសិន និងសុំឲ្យក្រុមហ៊ុនមកដោះស្រាយជាមួយប្រជាពលរដ្ឋ តម្លៃ១ម៉ែត្រការ៉េ ១៦០០ដុល្លារសហរដ្ឋអាមេរិក។
តំណាងប្រជាពលរដ្ឋបានឲ្យដឹងថា ៖ «តវ៉ាសុំឲ្យបានថ្លៃ ព្រោះកាលណាខ្ញុំចេញពីនេះទៅខ្ញុំមិនអាចយកលុយ ៨៥០០ (ដុល្លា) ទៅទិញផ្ទះបាននៅ។ ឥឡូវផ្ទះខ្ញុំរានបាយចាប់ផ្ដើមលិចម្ដងបន្តិចៗហើយ ពិបាកណាស់ខ្លាចកូនចៅលង់ទឹក...»។
នៅកន្លែងតវ៉ានោះដែរអ្នកសារព័ត៌មានបានព្យាយាមទៅជួបតំណាងក្រុមហ៊ុន និងអភិបាលខណ្ឌដូនពេញ លោក សុខ សម្បត្តិ ប៉ុន្តែត្រូវក្រុមប៉េអឹមរារាំមិនឲ្យចូលជួប។
ប៉ុន្តែបើតាមចៅសង្កាត់រង សង្កាត់ស្រះចក អ្នកស្រី អ៊ិន សាផន បានប្រាប់ប្រជាពលរដ្ឋនៅកន្លែងតវ៉ាថា នៅទីស្នាក់ការនេះមិនអាចដោះស្រាយឲ្យពលរដ្ឋបានទេ។
អ្នកស្រី អ៊ិន សាផន បានមានប្រសាសន៍ថា ៖ «កន្លែងអត់អ្នកដោះស្រាយអាហ្នឹងទេ ហើយបើមកទាំងទ័ពអ៊ីចឹងដោះមិនចេញទេ មុខជាឈរក្ដៅងាប់ហើយ...»។
សូមជម្រាបថានេះជាលើកទីបីហើយដែលប្រជាពលរដ្ឋនៅតំបន់បឹងកក់ឡើងតវ៉ាជាមួយនឹងអាជ្ញាធរក្រុងភ្នំពេញនិងក្រុមហ៊ុន ដើម្បទាមទារឲ្យបញ្ឈប់ការបូមខ្សាច់ដាក់បឹង និងបង់សំណងដល់ពួកគាត់ឲ្យបានសមរម្យតាមតម្លៃទីផ្សារបច្ចុប្បន្ន។
សូមជម្រាបដែរថា រដ្ឋាភិបាលបានអនុញ្ញាតឲ្យក្រុមហ៊ុនស៊ូកាកូអ៊ីន ធ្វើការអភិវឌ្ឍន៍បឹងកក់សម្រាប់រយៈពេល៩៩ឆ្នាំ លើផ្ទៃដីចំនួន១៣៣ហិកតារ ក្នុងទឹកប្រាក់ប្រមាណ៧៩លានដុល្លារ ដែលការអនុញ្ញាតនេះត្រូវបានក្រុមសិទ្ធិមនុស្សរិះគន់ថា បានរំលោភលើច្បាប់ភូមិបាល ឆ្នាំ២០០១ ដែលថាការប្រគល់បឹងដែលជាកម្មសិទ្ធិរដ្ឋទៅឲ្យឯកជន គឺមិនត្រូវហួសពី១៥ឆ្នាំឡើយ។
ក្រុមសិទ្ធិមនុស្សបានឲ្យដឹងថា ការអភិវឌ្ឍនេះនឹងមានផលប៉ះពាល់យ៉ាងធ្ងន់ធ្ងរចំពោះបរិស្ថាន និងប្រជាពលរដ្ឋប្រមាណ៤ពាន់គ្រួសារដែលរស់នៅជុំវិញបឹងនេះ៕