លោក Rafael Dochao Moreno តំណាងប្រទេសសហគមន៍អឺរ៉ុបនៅកម្ពុជា បានមានប្រសាសន៍ថា នៅប្រទេសកម្ពុជាប្រទេសសហគមន៍អឺរ៉ុបបានផ្តល់ថវិកាសម្រាប់សកម្មភាពនានាប្រមាណពី១៥ពាន់អឺរ៉ូទៅដល់២៥លានអឺរ៉ូ យោងទៅតាមកម្មវិធីអភិវឌ្ឍន៍នានាតូចឬធំដែលទាក់ទងជាមួយការអភិវឌ្ឍនៅជនបទនិងផ្នែកនានា។
លោក Rafael Dochao Moreno តំណាងប្រទេសសហគមន៍អឺរ៉ុបនៅកម្ពុជា បានមានប្រសាសន៍ទៀតថា ការជួបជុំគ្នានៅថ្ងៃនេះជាឱកាសមួយដែរដើម្បីបានស្តាប់ផ្ទាល់ពីអ្នកអនុវត្តគម្រោងផ្ទាល់និងការលើកស្នើពីតម្រូវការនានាដែលត្រូវបំពេញបន្ថែមក្នុងការអនុវត្តគម្រោងដែលចាយលុយរបស់ប្រទេសសហគមន៍អឺរ៉ុប។
លោកស្រី ពន ប៉ុក មន្រ្តីព័ត៌មានរបស់ការិយាល័យសហគមន៍អឺរ៉ុបនៅកម្ពុជា បានមានប្រសាសន៍ឲ្យដឹងថា នៅប្រទេសកម្ពុជាសហគមន៍អឺរ៉ុបបានផ្តល់លុយប្រមាណពី២៥ទៅ៣០លានអឺរ៉ូជួយក្នុងមួយឆ្នាំៗដើម្បីអនុវត្តគម្រោងអភិវឌ្ឍន៍នានាដោយមានអ្នកអនុវត្តគម្រោងជាអង្គការក្រៅរដ្ឋាភិបាលផងជាដៃគូទ្វេភាគីផង និងជាអ្នកអនុវត្តគម្រោងជាក្រសួងនានារបស់រដ្ឋាភិបាលដែលជាដៃគូពហុភាគីផង។
លោកស្រី ពន ប៉ុក បានឲ្យដឹងថា ៖ «យើងធ្វើក្នុងមួយឆ្នាំ បើតែ EC អត់និយាយ EU ទេណា៎ ចំពោះតែ EC ក្នុងមួយឆ្នាំ វា ២៥ ទៅ ៣០លានយូរ៉ូ...»។
តាមលោកស្រី ពន ប៉ុក បានឲ្យដឹងដែរថា តាំងពីឆ្នាំ១៩៩៣មក សហគមន៍អឺរ៉ុបបានផ្តល់លុយប្រមាណ៥០០លានដុល្លារហើយដល់ប្រទេសកម្ពុជាដើម្បីអនុវត្តគម្រោងនានា ហើយនៅក្នុងឆ្នាំ២០០៧កន្លងមកនេះ លុយចំនួនប្រមាណ២៨លានដុល្លារអាមេរិកបានជួយដល់ប្រទេសកម្ពុជា និងក្នុងឆ្នាំ២០០៨នេះមានលុយប្រមាណ៤០លានដុល្លារអាមេរិកបានផ្តល់ដល់ប្រទេសកម្ពុជាផងដែរដើម្បីអនុវត្តគម្រោងកម្មវិធីអភិវឌ្ឍន៍។
តាមមន្រ្តីសហគមន៍អឺរ៉ុបបានឲ្យដឹងថា គម្រោងនានាដែលសហគមន៍អឺរ៉ុបបានផ្តល់លុយជួយមានទាក់ទងជាមួយការការពារសិទ្ធិមនុស្ស កម្មវិធីសន្តិសុខស្បៀង ការអភិវឌ្ឍជនបទ ការរក្សាសុខភាព ការគាំទ្រសកម្មភាពសង្គមស៊ីវិលជាដើម។ល។។
តាមមន្រ្តីសហគមន៍អឺរ៉ុបបានឲ្យដឹងដែរថា បច្ចុប្បន្ននេះមានគម្រោងធំៗចំនួនបីដែលសហគមន៍អឺរ៉ុបកំពុងអនុវត្តនៅប្រទេសកម្ពុជា ក្នុងនោះមានគម្រោងស្ដារឡើងវិញលើវិស័យសេដ្ឋកិច្ចនិងសង្គមកិច្ចនៅបណ្តាខែត្រតំបន់ពាយព្យប្រទេសដែលចំណាយប្រាក់ចំនួន២៥លានអឺរ៉ូ គម្រោងជួយលើវិសយ័អប់រំចំណាយប្រាក់ប្រមាណ២០លានអឺរ៉ូ និងគម្រោងពង្រឹងប្រជាធិបតេយ្យនិងវិមជ្ឈការអភិបាលកិច្ចមូលដ្ឋានដោយចំណាយប្រាក់ប្រមាណ១០លានអឺរ៉ូ។
សូមជម្រាបថា ជំនួយសហគមន៍អឺរ៉ុបបានផ្តល់ដល់ប្រទេសកម្ពុជាតាំងពីឆ្នាំ១៩៧៩ ហើយជំនួយទ្វេភាគីនេះបានកើនជាលំដាប់ចាប់តាំងពីឆ្នាំ១៩៩៣មក៕