ការស្វាគមន៍ដែលធ្វើឡើងដោយមន្ត្រីអ្នកនាំពាក្យ លោក រាជ សម្បត្តិ នៅវេលាថ្ងៃនេះគឺនៅបន្ទាប់ពីមានសេចក្តីរាយការណ៍ចុងក្រោយមួយទាក់ទងនឹងរដ្ឋាភិបាលអាល្លឺម៉ង់ ដែលសន្យាថានឹងផ្តល់ថវិកាចំនួនប្រមាណ២លាន៤សែនដុល្លារថែមទៀត ។
លោក រាជ សម្បត្តិ បានមានប្រសាសន៍ថា ៖ «អង្គជំនុំជម្រះក្នុងតុលាការកម្ពុជាទាំងផ្នែកជាតិនិងអន្តរជាតិហ្នឹង គឺស្វាគមន៍រាល់ប្រភពជំនួយទាំងអស់ ហើយក្នុងហ្នឹងគឺកន្លងមកពេលថ្មីៗនេះដែលប្រាក់ជំនួយបន្ថែមនេះ យើងមិននិយាយអំពីប្រាក់ចាស់សម្រាប់រយៈកាល៣ឆ្នាំនេះ យើងនិយាយពីផ្នែកថ្មីក្នុងហ្នឹងមានខាងប្រទេសអូស្ត្រាលីដែលបានសម្រេចមុនគេឃើញថា ផ្នែកកម្ពុជាហ្នឹងជិតអស់ប្រាក់ ក៏បានសម្រេចផ្ដល់៥សែនដុល្លារឲ្យផ្នែកកម្ពុជា ហើយក្រោយមកគឺតាមរយៈរដ្ឋមន្ត្រីការបរទេសបារាំងហ្នឹងគាត់បានសម្រេចឲ្យប្រាក់១លានដុល្លារទៀត គឺឲ្យទាំងផ្នែកកម្ពុជានិងផ្នែកអន្តរជាតិ ហើយថ្មីៗនេះប្រទេសជប៉ុនបានសម្រេចផ្ដល់ជិត៣លានដុល្លារ ។ អ៊ីចឹងយើងស្វាគមន៍រាល់ប្រភពជំនួយហើយនិងរាល់ប្រទេសនិងប្រជាជនទាំងអស់នៅលើសកលលោកដែលសម្រេចផ្តល់ជំនួយគាំទ្រមកដល់សាលាក្ដីខ្មែរក្រហមនេះ យើងស្វាគមន៍ខ្លាំងណាស់ ។ ហើយពេលថ្មីៗនេះឮសូរថាប្រទេសអាល្លឺម៉ង់គាត់បានសម្រេចផ្ដល់ប្រាក់១លានយូរ៉ូកន្លះ គិតទៅប្រហែល២,៤លានដុល្លារសម្រាប់ផ្នែកមួយរបស់សាលាក្ដី គឺអង្គភាពគាំពារគាំទ្រជនរងគ្រោះ អ៊ីចឹងយើងក៏ស្វាគមន៍ដែរ» ។
សូមបញ្ជាក់ថារដ្ឋាភិបាលអាល្លឺម៉ង់តាំងពីឆ្នាំ២០០៥ ដែលអង្គជំនុំជម្រះវិសាមញ្ញក្នុងតុលាការកម្ពុជាទើបចាប់ផ្តើមនោះមក បានផ្តល់ថវិកាចំពោះការជួយដំណើរការសាលាក្តីបានប្រមាណ៥លាន៥សែនដុល្លារនោះហើយ ៕