ភាពមន្ទិលសង្ស័យនិងការចោទប្រកាន់ទៅលើរឿងរ៉ាវនៃអំពើពុករលួយ និងភាពមិនប្រក្រតីនៅក្នុងការគ្រប់គ្រងធនធានមនុស្សនៃអង្គជំនុំជម្រះវិសាមញ្ញក្នុងតុលាការកម្ពុជា ត្រូវបានជម្រះតាមរយៈការបង្ហាញអំពីលទ្ធផលនៃការត្រួតពិនិត្យក្នុងសវនកម្មមួយ ដែលបានធ្វើឡើងដោយក្រុមជំនាញប្រឹក្សាអន្តរជាតិពីរ ដែលមួយមកពីក្រុមហ៊ុន ឌឺឡយ ប្រចាំប្រទេសឥណ្ឌា និងមួយទៀតមានមូលដ្ឋាននៅកម្ពុជា ។
ការបង្ហាញអំពីលទ្ធផលនៃការត្រួតពិនិត្យនេះ បានធ្វើឡើងនៅក្នុងសន្និសីទសារព័ត៌មានរួមត្រីភាគីមួយរវាងសាលាក្តីខ្មែរក្រហម កម្មវិធីអភិវឌ្ឍន៍អង្គការសហប្រជាជាតិ UNDP និងប្រតិភូសហគមន៍អឺរ៉ុបប្រចាំប្រទេសកម្ពុជា នៅក្នុងទីក្រុងភ្នំពេញ កាលពីព្រឹកថ្ងៃទី២៥ មេសា ឆ្នាំ២០០៨នេះ ។
នៅក្នុងបទបង្ហាញអំពីលទ្ធផលត្រួតពិត្យ នៃសវនកម្មចំពោះសាលាក្តីខ្មែរក្រហម លោក Jo Scheuer នាយកប្រចាំកម្ពុជានៃកម្មវិធីអភិវឌ្ឍន៍អង្គការសហប្រជាជាតិ UNDPបានមានប្រសាសន៍ថា ការត្រួតពិនិត្យបានផ្តួចផ្តើមដោយកម្មវិធីអភិវឌ្ឍន៍អង្គការសហប្រជាជាតិ ដើម្បីឲ្យមានសវនាការផ្ទៃក្នុងមួយ ទៅលើការគ្រប់គ្រងធនធានមនុស្សរបស់សាលាក្តីខ្មែរក្រហម បន្ទាប់ពីមានការចោទថា មានភាពមិនប្រក្រតីនៅក្នុងឆ្នាំកន្លងទៅនោះ ។
លោកមានប្រសាសន៍បន្ថែមថា យោងតាមលទ្ធផលនៃការត្រួតពិនិត្យរបស់ក្រុមជំនាញប្រឹក្សាទាំងពីរពុំបានរកឃើញបញ្ហាមិនប្រក្រតីដូចបានចោទឡើងនោះឡើយ ៖ «ក្រុមអ្នកពិនិត្យទាំងអស់នេះបានរាយការណ៍ ដោយខ្ញុំសូមដកស្រង់មកថា ចំពោះការចោទប្រកាន់ថ្មីៗកន្លងមកនេះ គឺមិនមានឃើញមានការគ្រប់គ្រងខុសណាមួយនៅក្នុងអង្គជំនុំជម្រះវិសាមញ្ញឡើយ» ។
លោក Rafael Dochao Moreno ភារធារីនៃប្រតិភូសហគមន៍អឺរ៉ុបប្រចាំនៅប្រទេសកម្ពុជា បានថ្លែងគាំទ្រលទ្ធផលនៃការត្រួតពិនិត្យនោះ ហើយបានបញ្ជាក់បន្ថែមថា សហគមន៍អឺរ៉ុបនៅតែមានជំហរជួយសាលាក្តីខ្មែរក្រហមនេះ ទាំងនយោបាយនិងហិរញ្ញវត្ថុ ។
លោក Rafael Dochao Moreno បានមានប្រសាសន៍ថា ៖ «និយាយជំនួសឲ្យសហគមន៍អឺរ៉ុប អំពីការប្តេជ្ញាចិត្តដ៏ខ្ពង់ខ្ពស់របស់យើង នៅក្នុងការបន្តជួយដល់ជំនុំជម្រះវិសាមញ្ញនេះ ទាំងផ្នែកនយោបាយក៏ដូចជាការគាំទ្រខាងផ្នែកហិរញ្ញវត្ថុផងដែរ» ។
លោក ស៊ាន វិសុទ្ធ ប្រធានរដ្ឋបាលនៃសាលាក្តីខ្មែរក្រហម បានច្រានចោលការចោទប្រកាន់ចំពោះអំពើពុករលួយ និងភាពមិនប្រក្រតីក្នុងការគ្រប់គ្រងធនធានមនុស្សនៃសាលាក្តីនេះថា ជាការចោទប្រកាន់ទូលំទូលាយគ្មានប្រភពនិងមូលដ្ឋានច្បាស់លាស់ ។
លោកមានប្រសាសន៍ជាចុងក្រោយថា សេចក្តីថ្លែងការណ៍របស់កម្មវិធីអភិវឌ្ឍន៍សហប្រជាជាតិ និងសហគមន៍អឺរ៉ុបនៅក្នុងថ្ងៃនេះ គឺជាការបិទទំព័រខ្មៅចំពោះគុណវិបត្តិនៅក្នុងសាលាក្តីខ្មែរក្រហម ។
លោក ស៊ាន វិសុទ្ធ បានបញ្ជាក់ថា ៖ «គឺយើងអាចបិទនូវទំព័រនេះបាន ដោយសារឆ្លុះបញ្ចាំងនូវសេចក្តីថ្លែងការណ៍របស់សហគមន៍អឺរ៉ុប ក៏ដូចជាខាង UNDP ដែលគាត់ មានការប្តេជ្ញាចិត្តសម្តែងការគាំទ្រទាំងផ្នែកនយោបាយ ទាំងផ្នែកហិរញ្ញវត្ថុដល់សាលាក្តីនេះតទៅទៀត» ៕