កម្ពុជា-ចិន ចុះ​ហត្ថលេខា​សាងសង់​រោងចក្រ​ចម្រាញ់​ប្រេង​កាត

មន្ត្រី​ជាន់​ខ្ពស់​នៃ​អាជ្ញាធរ​ជាតិ​ប្រេង​កាត​កម្ពុជា នៅ​ថ្ងៃ​ទី២៨ ខែ​ធ្នូ បាន​ចុះ​ហត្ថលេខា​ជាមួយ​ក្រុមហ៊ុន​ឯកជន​ចំនួន​ពីរ ដើម្បី​សាង​សង់​រោងចក្រ​ដ៏​ធំ​មួយ និង​ទំនើប​បំផុត​នៅ​កម្ពុជា ដើម្បី​ចម្រាញ់​ប្រេង​កាត​សម្រាប់​ប្រើប្រាស់​ក្នុង​ស្រុក និង​នាំ​ចេញ​ទៅ​បរទេស​នៅ​ក្នុង​តំបន់។
ដោយ សុខ សេរី
2012-12-28
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
រោងចក្រ​ប្រេង​កាត ៣០៥
អគ្គនាយក​នៃ​ក្រុមហ៊ុន​ចិន ឈ្មោះ ស៊ីណូម៉ាច ឆៃណា ផឺហ្វិច ម៉ាឆិនើរី អ៊ីនដាស់ទ្រី (Sinomach China Perfect Machinery Industry Co. Ltd) លោក ចាង ស៊ូកាង (Zhang Sugang) ក្នុង​ពិធី​ចុះ​ហត្ថលេខា នា​ទីស្ដីការ​គណៈរដ្ឋមន្ត្រី រាជធានី​ភ្នំពេញ កាល​ពី​ថ្ងៃ​ទី២៨ ខែ​ធ្នូ ឆ្នាំ​២០១២។
RFA/Sok Serey

រោងចក្រ​ចម្រាញ់​ប្រេង​កាត​នោះ​គេ​គ្រោង​សាង​សង់​ចាប់​ពី​ឆ្នាំ​២០១៣ ដោយ​ប្រើ​រយៈពេល​ប្រមាណ ៣៦​ខែ ឬ ៣​ឆ្នាំ និង​ត្រូវ​ចំណាយ​ថវិកា​សរុប​ជាង ២.៣០០​លាន​ដុល្លារ​អាមេរិក។

មន្ត្រី​ក្រុមហ៊ុន​បាន​ឲ្យ​ដឹង​ថា គម្រោង​នេះ​ប្រកាស​ឡើង​ជា​ផ្លូវការ ក្រោយ​ពី​ក្រុមហ៊ុន​បាន​ធ្វើ​ការ​សិក្សា​លម្អិត​អំពី​ទីផ្សារ និង​បរិស្ថាន​នៅ​មុន​ការ​សាង​សង់​នោះ។

រោងចក្រ​នេះ​គេ​គ្រោង​សាង​សង់​នៅ​លើ​ទីតាំង​ស្ថិត​នៅ​ចន្លោះ​ខេត្ត​កំពត និង​ខេត្ត​ព្រះសីហនុ ដែល​មាន​សមត្ថភាព​ចម្រាញ់​ប្រេង​កាត​ចំនួន​ជាង ៥​លាន​តោន​ក្នុង​មួយ​ឆ្នាំៗ ដើម្បី​លក់​នៅ​ក្នុង​ស្រុក និង​នាំ​ចេញ​ទៅ​ប្រទេស​ក្នុង​តំបន់។ ការ​ដំឡើង​រោងចក្រ​ចម្រាញ់​ប្រេង​នេះ នៅ​គ្រា​ដែល​កម្ពុជា តែង​តែ​នាំ​ចូល​ប្រេង​ឥន្ធនៈ​ចំនួន​ជាង ១លាន​តោន​ក្នុង​មួយ​ឆ្នាំៗ​ពី​ប្រទេស​វៀតណាម ថៃ និង​ប្រទេស​សិង្ហបុរី។

ក្រុមហ៊ុន​ឯកជន​ចំនួន​ពីរ​ដែល​បាន​ចុះ​ហត្ថលេខា​ជាមួយ​អាជ្ញាធរ​ជាតិ​ប្រេង​កាត​កម្ពុជា នោះ មាន​ដូច​ជា ទី១ ក្រុមហ៊ុន​ក្នុង​ស្រុក​ឈ្មោះ ខេមបូឌា ប៉េត្រូលែម ស៊ីមិខល (Cambodian Petroleum Chemical Co. Ltd) និង​ក្រុមហ៊ុន​របស់​ប្រទេស​ចិន ឈ្មោះ ស៊ីណូម៉ាច ឆៃណា ផឺហ្វិច ម៉ាឆិនើរី អ៊ីនដាស់ទ្រី (Sinomach China Perfect Machinery Industry Co. Ltd)។

រដ្ឋមន្ត្រី​នៃ​ទីស្ដីការ​គណៈរដ្ឋមន្ត្រី លោក សុខ អាន និង​ជា​ឧបនាយក​រដ្ឋមន្ត្រី និង​ជា​ប្រធាន​អាជ្ញាធរ​ជាតិ​ប្រេង​កាត​កម្ពុជា បាន​មាន​ប្រសាសន៍​ក្រោយ​ពី​បាន​ចុះ​ហត្ថលេខា​នោះ​ថា រោងចក្រ​ចម្រាញ់​ប្រេង​កាត​នេះ គឺ​ជា​ការ​ជំរុញ​ឲ្យ​មាន​ការ​អភិវឌ្ឍ​សេដ្ឋកិច្ច និង​កាត់​បន្ថយ​ភាព​ក្រីក្រ​នៅ​កម្ពុជា៖ «អីចឹង នេះ​ជា​ធុរកិច្ច​មួយ​យ៉ាង​ធំ ដែល​តម្រូវ​ឲ្យ​អ្នក​ធ្វើ​ហ្នឹង​គណនា​បច្ចេកវិទ្យា​ខ្ពស់ និង​ទំហំ​ទុន​ដាក់​ហ្នឹង​ធំ​គ្រប់គ្រាន់ និង​ការ​ប្រកួត​ប្រជែង​ទៅ​ថ្ងៃ​អនាគត»

អគ្គនាយក​នៃ​ក្រុមហ៊ុន​ចិន លោក ចាង ស៊ូកាង (Zhang Sugang) បាន​មាន​ប្រសាសន៍​ជា​ភាសា​ចិន ហើយ​ត្រូវ​បាន​ប្រែ​សម្រួល​ជា​ភាសា​ខ្មែរ​ថា ក្រុមហ៊ុន​ប្រើប្រាស់​ឧបករណ៍​ទំនើបៗ និង​បច្ចេកវិទ្យា​ទំនើបៗ​ក្នុង​ការ​ចម្រាញ់​ប្រេង​កាត​នៅ​កម្ពុជា នេះ៖ «ស្រប​ពេល​ដែល​ចំណង​មិត្ត​ភាព​កម្ពុជា-ចិន មាន​ការ​រីក​ចម្រើន​កាន់​តែ​ស៊ី​ជម្រៅ​ឥត​ឈប់​ឈរ​នា​ប៉ុន្មាន​ឆ្នាំ​កន្លង​មក​នេះ សហគ្រាស​ចិន កាន់​តែ​ច្រើន​បាន​ចូល​រួម​ចំណែក​ក្នុង​ការ​កសាង​ប្រទេស​កម្ពុជា។ ក្រុមហ៊ុន ស៊ីណូម៉ាច ឆៃណា ផឺហ្វិច ម៉ាឆិនើរី អ៊ីនដាស់ទ្រី ដែល​ជា​សម្ព័ន្ធ​របស់​ក្រុមហ៊ុន ឆៃណា ណេសិនណល ម៉ាឆិនើរី អ៊ីនដាស់ទ្រី (China National Machinery Industry) មាន​សុទិដ្ឋិនិយម​អំពី​ស្ថានភាព​វិនិយោគ​នៅ​កម្ពុជា និង​ចូល​រួម​យ៉ាង​សកម្ម​ក្នុង​គម្រោង​វិស្វកម្ម​ផ្គត់ផ្គង់​សម្ភារៈ និង​សាង​សង់​រោងចក្រ​ចម្រាញ់​ប្រេង​កាត​នៅ​កម្ពុជា»

ដោយ​ឡែក តំណាង​ក្រុមហ៊ុន​កម្ពុជា លោក ម៉ៅ ចិត្រាវុទ្ធ បាន​មាន​ប្រសាសន៍​ថា មាន​ការ​ចរចា និង​សិក្សា គឺ​ស៊ី​រយៈពេល​សរុប ៧​ឆ្នាំ​កន្លង​មក រហូត​ដល់​មាន​ការ​ចុះ​ហត្ថលេខា​នេះ៖ «អ្នក​ឧកញ៉ា​ប្រធាន​ក្រុមហ៊ុន (លោក ស៊ីវ គង់ទ្រីវ) សូម​ថ្លែង​អំណរ​គុណ​ចំពោះ​ដៃគូ​របស់​យើង ដែល​មក​ពី​ប្រទេស​ចិន ដែល​បាន​ធ្វើ​ការងារ​ធំៗ​យ៉ាង​ច្រើន​ជាមួយ​គ្នា ហើយ​ឈាន​ដល់​ការ​ផ្តល់​ការ​ទុក​ចិត្ត​ធ្វើ​ឲ្យ​យើង​ឈាន​ដល់​ការ​ចុះ​ហត្ថលេខា​ជាមួយ​គ្នា​នៅ​ថ្ងៃ​នេះ»

គម្រោង​សាង​សង់​រោងចក្រ​ចម្រាញ់​ប្រេង​កាត​នៅ​កម្ពុជា នេះ គឺ​នៅ​ស្រប​ពេល​ដែល​គម្រោង​ការ​បូម​យក​ប្រេង​កាត​នៅ​បាត​សមុទ្រ​កម្ពុជា ដោយ​ក្រុមហ៊ុន​របស់​សហរដ្ឋ​អាមេរិក ឈ្មោះ សឺវរ៉ុន (Chevron) នោះ ត្រូវ​បាន​ពន្យារ​ពេល​ពី​ថ្ងៃ​ទី១២ ខែ​១២ ឆ្នាំ​២០១២ ដល់​ឆ្នាំ​២០១៦ វិញ។

ប្រធាន​អាជ្ញាធរ​ប្រេង​កាត​កម្ពុជា លោក សុខ អាន បាន​មាន​ប្រសាសន៍​បញ្ជាក់​ថា ការ​រាវ​រក​ប្រេង​កាត​ដោយ​ក្រុមហ៊ុន​មួយ​ចំនួន​នៅ​តែ​បន្ត ប៉ុន្តែ​នៅ​មិន​ទាន់​មាន​លទ្ធផល​នៅ​ឡើយ។ រីឯ​ការ​ចរចា​លើ​បញ្ហា​ពន្ធដារ និង​ប្រាក់​ចំណូល​ពី​ប្រេង​កាត​នោះ នឹង​បញ្ចប់​នៅ​ពេល​ឆាប់ៗ​ខាង​មុខ​នេះ។

កន្លង​មក អង្គការ​សង្គម​ស៊ីវិល រាប់​ទាំង​អង្គការ​សម្ព័ន្ធភាព​កម្ពុជា​ដើម្បី​តម្លាភាព​ចំណូល​ធនធាន​នៅ​កម្ពុជា បាន​ទាម​ទារ​ឲ្យ​រដ្ឋាភិបាល​គ្រប់គ្រង​ប្រាក់​ចំណូល​ធនធាន​ប្រេង​កាត​ឲ្យ​មាន​ប្រសិទ្ធភាព និង​តម្លាភាព ដោយ​ជៀសវាង​នូវ​អំពើ​ពុក​រលួយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

david

ពី new york

hello chines i would like all of
your people leave from my country
you help cambodia why you dont help for
long times ago why you want make my
country down.

Dec 29, 2012 07:52 PM

Eagle Master

ពី Pa(USA)

there are couples things why USA hasitated to invest in Cambodia #01 is corruptions,02 racism as you know Mr:Sok An,Chorm Prasith and his coleaques are Chinese, that's why most Chinese investors got licenses.
Tips: when was cold wae times most country was seeking superpower to open military bases but when cold war has ended we need those to be partner our economy in order to inssures our future stabilizing peaces or becoming wall of defands.Be smarts ok,my mom had told me she needs an hornest for whom to be son or daughter in-law.

Dec 29, 2012 03:36 AM

អ្នក​អាន​អនាមិក

ពី Washington, USA

Good Lucks and make sure Cambodia learns from Nigeria Oil Affair. Please pay foreign debt. A recommendation to the Future Cambodian GOV, get rid of Moha Corrupted people like Sok An and Hun Sen's Circle. The money from these blood suckers of our people will be enough to pay our seniors more than $10/month.

Dec 28, 2012 09:17 AM