សិទ្ធិមនុស្សសុំឲ្យអាជ្ញាធរវៀតណាមផ្តល់សិទ្ធិពេញលេញដល់ ទឹម សាខន
ដោយ សោភ័ណ
2008-07-03
អង្គការឃ្លាំមើលសិទ្ធិមនុស្ស Human Rights Watch បានចេញសេចក្តីប្រកាសមួយឲ្យអាជ្ញាធរវៀតណាមផ្តល់សិទ្ធិពេញលេញទៅឲ្យអតីតព្រះសង្ឃ ទឹម សាខន ដែលអាជ្ញាធរវៀតណាមអះអាងថាបានដោះលែងកាលពីពេលថ្មីៗនេះ ។
នៅក្នុងសេចក្តីប្រកាសរបស់អង្គការ Human Rights Watch បានបញ្ជាក់ថាអាជ្ញាធរវៀតណាមគួរតែផ្តល់សេរីភាពឲ្យលោក ទឹម សាខន ក្នុងការធ្វើដំណើរនិងជួបជុំសាច់ញាតិដោយឯកជន ។ ចំណែកឯរដ្ឋាភិបាលកម្ពុជាគួរតែប្រកាសជាសាធារណៈថា លោក ទឹម សាខន មានសេរីភាពត្រឡប់មកកម្ពុជាវិញហើយ ។
ពាក់ព័ន្ធនឹងព័ត៌មានថា មានការដោះលែងនិងសូមឲ្យរដ្ឋាភិបាលខ្មែរប្រកាសជាសារធារណៈអំពីលោក ទឹម សាខននោះ ត្រូវបានមន្ត្រីអ្នកនាំពាក្យរដ្ឋាភិបាលកម្ពុជា លោក ខៀវ កាញារីទ្ធ បដិសេធថាលោកមិនដឹងរឿងនោះទេព្រោះលោក ទឹម សាខន នៅប្រទេសវៀតណាម ។
លោក ខៀវ កាញារីទ្ធ បានមានប្រសាសន៍ថា ៖ «ខ្ញុំគ្រាន់តែឃើញមានការអំពាវនាវសុំឲ្យរដ្ឋាភិបាលប្រកាសថា ឲ្យលោក ទឹម សាខន មានសិទ្ធិចូលកម្ពុជាបានព្រោះខ្ញុំបានប្រាប់ថារាល់ដងរដ្ឋាភិបាលមានដែលឃាត់ ទឹម សាខន មិនឲ្យចូលកម្ពុជាឯណា ហើយអ៊ីចឹងចាំបាច់រដ្ឋាភិបាលប្រកាសធ្វើអី ?» ។
ចំណែកឯអ្នកនាំពាក្យរបស់ស្ថានទូតវៀតណាមប្រចាំប្រទេសកម្ពុជា លោក ទ្រីង បាកាំ បានអះអាងថាលោកគ្រាន់តែដឹងថា លោក ទឹម សាខន ត្រូវតុលាការវៀតណាមបានកាត់ទោសសម្រេចឲ្យចេញពីគុកហើយ ប៉ុន្តែលោកមិនបានដឹងថា លោក ទឹមសាខន នៅទីណាទេនៅពេលនេះ ។
បើតាមនាយកប្រតិបត្តិអង្គការខ្មែរក្រោមការពារសិទ្ធិមនុស្ស លោក អាង ច័ន្ទរិទ្ធ បានឲ្យដឹងថាព័ត៌មានដែលថាអាជ្ញាធរវៀតណាមដោះលែង លោក ទឹម សាខននោះ មិនអាចយកជាការបាននៅឡើយទេ ព្រោះរហូតមកដល់ថ្ងៃនេះ អង្គការសង្គមស៊ីវិលនិងសាច់ញាតិរបស់លោក ទឹម សាខន មិនបានឃើញលោក ទឹម សាខន នៅប្រទេសកម្ពុជានៅឡើយទេ ។
លោក អាង ច័ន្ទរិទ្ធ បានឲ្យដឹងថា ៖ «យើងមិនទាន់ជឿថាព័ត៌មាននេះជាព័ត៌មានពិតទេ ព្រោះអាជ្ញាធរវៀតណាមធ្លាប់បានអះអាងផ្ទាល់មាត់ជាមួយលើកពីរលើកហើយថា ដោះលែងព្រះសង្ឃ ទឹម សាខន ប៉ុន្តែព័ត៌មាននេះមិនអាចទទួលយកបានទេហើយក៏មិនមែនជាព័ត៌មានពិត ។ ដូច្នេះព័ត៌មានដែលបានចេញផ្សាយនេះគ្រាន់តែជាព័ត៌មានចេញមកឲ្យសាធារណជនដើម្បីដឹងសិន ក៏ជំរុញឲ្យរាជរដ្ឋាភិបាលនៅពេលបច្ចុប្បន្ននេះ សូមឲ្យរដ្ឋាភិបាលយកចិត្តទុកដាក់ដើម្បីនាំយកព្រះតេជគុណ ទឹម សាខន យកមកកម្ពុជាវិញ» ។
បើតាមសាច់ញាតិរបស់លោក ទឹម សាខន នៅប្រទេសវៀតណាមបានឲ្យដឹងថាបន្ទាប់ពីបានចេញពន្ធនាគារកាលពីថ្ងៃទី២៨ មិថុនា ពួកគេបានឃើញលោក ទឹម សាខន ទៅលេងបងប្អូនមួយភ្លែតដែរដោយមានអ្នកឃ្លាំមើលជាប់រហូត ប៉ុន្តែនៅថ្ងៃទី៣០ ខែមិថុនា លោក ទឹម សាខន បានទុកសំបុត្រមួយឲ្យបញ្ជាក់ថា ដោយបញ្ជាក់ថាអាជ្ញាធរវៀតណាមបានយករូបលោកទៅដើរលេងនៅប្រទេសវៀតណាមរយៈពេលមួយខែទៀតទើបត្រឡប់មកវិញ ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
អង្គការខ្មែរកម្ពុជាក្រោមស្នើសុំទូតវៀតណាមដើម្បីជួប ទឹម សាខន
មន្ត្រីក្រសួងយុត្តិធម៌ខ្មែរបដិសេធដំណឹងផ្សាយដោយវិទ្យុអាស៊ីសេរីភាសាវៀតណាម
ក្រុមសិទ្ធិមនុស្សគ្រោងប្ដឹងទៅអង្គការសិទ្ធិមនុស្សអន្តរជាតិពីករណី ទឹម សាខន
សហព័ន្ធខ្មែរក្រោមទៅប្រជុំនៅប្រទេសបែលហ្ស៊ិកពីរឿងសិទ្ធិមនុស្ស
អង្គការ សមាគមខ្មែរក្រោមប្រជុំគ្នារកមធ្យោបាយជួយអតីតសង្ឃ ទឹម សាខន
ទឹម សាខន ត្រូវបានអាជ្ញាធរវៀតណាមដោះលែងពីពន្ធនាគារនាដើមខែសីហា
តំណាងព្រះសង្ឃនិងអង្គការខ្មែរក្រោម មន្ទិលសង្ស័យចំពោះការដោះលែងទឹម សាខន
ទឹម សាខន ត្រូវអាជ្ញាធរវៀតណាមដោះលែងវិញហើយ
សហព័ន្ធខ្មែរក្រោមនឹងចូលរួមបាតុកម្មប្រឆាំងទស្សនកិច្ចនាយករដ្ឋមន្ត្រីវៀតណាមនៅអាមេរិក
