ក្រុមអ្នកសង្កេតការណ៍ជប៉ុនបានចូលមកប្រទេសកម្ពុជាតែមិនប៉ុន្មានថ្ងៃប៉ុណ្ណោះ គ្រាន់តែដើរមើលស្ថានីយបោះឆ្នោតមួយចំនួន រួចចេញផ្សាយសេចក្តីថ្លែងការណ៍អបអរសាទរគណៈកម្មាធិការរៀបចំការបោះឆ្នោត ហើយក៏ជិះយន្តហោះត្រឡប់ទៅស្រុកគេវិញដោយក្តីរីករាយ ។ អ្នកទាំងនោះពុំបានឃើញភាពមិនត្រឹមត្រូវអ្វីទាំងអស់ក្នុងការបោះឆ្នោតសាកល កាលពីខែកក្កដាកន្លងទៅ ។
គណបក្សសមរង្ស៊ីថ្លែងថា ដោយពុំបានធ្វើការសិក្សាតាមដានស្ថានការណ៍ការរៀបចំការបោះឆ្នោតទុកជាមុន ក្រុមអ្នកសង្កេតការណ៍ជប៉ុនពុំបានឃើញភាពមិនប្រក្រតីសំខាន់២គឺ អ្នកបោះឆ្នោតដែលគ្មានសិទ្ធិចំនួនរាប់មិនអស់បានប្រើឈ្មោះខ្មោចទៅបោះឆ្នោតឲ្យគណបក្សប្រជាជនកម្ពុជា ហើយអ្នកមានសិទ្ធិបោះឆ្នោតជាច្រើនដែលមិនគាំទ្រគណបក្សប្រជាជនកម្ពុជា បែរជាត្រូវបំបាត់សិទ្ធិមិនអាចទៅបោះឆ្នោតបានទៅវិញ ៕