អង្គបុរេជំនុំជម្រះ បានចាត់ទុកសេចក្តីសម្រេចរបស់សហចៅក្រមស៊ើបអង្កេតក្នុងការចេញដីកាឃុំខ្លួនជនជាប់ចោទ អៀង ធីរិទ្ធ ជាបណ្តោះអាសន្នថា បានអនុវត្តឆន្ទានុសិទ្ធិត្រឹមត្រូវ ។
នៅក្នុងការអានចេញចំណុចទី៤ នៃសាលដីកាសង្ខេបរបស់អង្គបុរេជំនុំជម្រះ លោក ប្រាក់ គឹមសាន ប្រធានអង្គបុរេជំនុំជម្រះ បានថ្លែងដូច្នេះ ៖ «តម្កល់ដីកាឃុំខ្លួនរបស់សហចៅក្រមស៊ើបអង្កេត ហើយមូលហេតុដែលបានបញ្ជាក់ក្នុងដីកាឃុំខ្លួនបណ្ដោះអាសន្នរបស់សហចៅក្រមស៊ើបអង្កេតត្រូវបានជំនួសដោយមូលហេតុដែលបានបញ្ជាក់ក្នុងសាលដីកានេះ» ។
អង្គបុរេជំនុំជម្រះបានផ្តល់សំអាងចំពោះសេចក្តីសម្រេចចេញសាលដីកាតាមសេចក្តីសន្និដ្ឋាន និងការជឿជាក់របស់ខ្លួនថា ជនត្រូវចោទ អៀង ធីរិទ្ធ ធ្លាប់ប្រព្រឹត្តបទល្មើស ដូចមាននៅក្នុងបទចោទ ដូចជាថា អង្គបុរេជំនុំជម្រះបានពិនិត្យបន្ថែមលើភ័ស្តុតាងនៅក្នុងសំណុំរឿងនិងបានសន្និដ្ឋានថា គ្រប់លក្ខខណ្ឌដែលមានចែងនៅក្នុងវិធាន ៦៣ខ-១, ៣ និង ៥ ដែលបង្គាប់ឲ្យឃុំខ្លួនបណ្តោះអាសន្ន ។
អង្គបុរេជំនុំជម្រះជឿជាក់ថា បទល្មើសជាក់លាក់ដែលកំពុងស៊ើបអង្កេតទៅលើជនជាប់ចោទ ធ្លាប់បានប្រព្រឹត្តឡើងជាផ្នែកមួយនៃការរើសអើងជាប្រព័ន្ធ ។
អង្គបុរេជំនុំជម្រះបានលើកឡើងដែរថា ក្នុងបណ្តឹងឧទ្ធរណ៍នេះ មេធាវីការពារក្តីមិនបានតវ៉ាចំពោះអង្គហេតុទូទៅនៅក្នុងបទចោទលើកូនក្តីរបស់ខ្លួនទេ គ្រាន់តែតវ៉ាចំពោះការចោទប្រកាន់អំពីការជាប់ពាក់ព័ន្ធរបស់កូនក្តីខ្លួនទៅវិញ ។
ជនត្រូវចោទ បានទទួលស្គាល់អំពីតួនាទីរបស់ខ្លួនជារដ្ឋមន្រ្តីសង្គមកិច្ច ដែលទទួលបន្ទុកចំពោះសុខុមាលភាពប្រជាជន នៅក្នុងការតតាំងក្តីលើកដំបូង ហើយបានប្រាប់ឲ្យដឹងដែរថា ខ្លួនជាប់ពាក់ព័ន្ធយ៉ាងធំធេងក្នុងវិស័យសុខាភិបាល ។
ការចោទប្រកាន់ខាងលើ លោក ផាត ពៅស៊ាង សហមេធាវីជាតិកម្ពុជារបស់ជនជាប់ចោទ អៀង ធីរិទ្ធ បានថ្លែងប្រាប់អ្នកសារព័ត៌មាន នៅបន្ទាប់ពីការប្រកាសសាលដីការបស់អង្គបុរេជំនុំជម្រះថា កូនក្តីរបស់លោកមិនសុខចិត្តចំពោះការចោទប្រកាន់នោះទេ ហើយចង់ឡើងប្រតិកម្មតបវិញដែរ ក៏ប៉ុន្តែមិនអាចអនុញ្ញាតបាន ព្រោះតែនីតិវិធីរបស់តុលាការ ។
លោក ផាត ពៅស៊ាង មានប្រសាសន៍ថា ការប្រកាសសាលដីការបស់អង្គបុរេជំនុំជម្រះ ដែលទើបតែបានធ្វើឡើងនេះ មិនបានផ្តល់យុត្តិធម៌ដល់កូនក្តីរបស់លោកទេ គឺមានលក្ខណៈលំអៀង ដោយហេតុថា ការលើកឡើងអំពីការទទួលខុសត្រូវរបស់កូនក្តីលោកនៅក្នុងអង្គបុរេជំនុំជម្រះស្តីពីការជំទាស់ការឃុំខ្លួនបណ្តោះអាសន្ននោះ គឺជាការរំលោភបំពាននិងខុសនីតិវិធី ហើយលោកមានប្រសាសន៍បន្ថែមអំពីនីតិវិធី ដែលគួរអនុវត្តន៍ដូច្នេះថា ៖ «ក្នុងករណីនេះ គួរតែអង្គបុរេជំនុំជម្រះលើកឡើងពីលក្ខខណ្ឌនានា ដែលខាងខ្ញុំដាក់ជូនគាត់ ហើយគាត់ពិចារណាថា តើលក្ខខណ្ឌហ្នឹងគ្រប់ជ្រុងជ្រោយ ឬអត់ ទទួលយកបាន ឬអត់ ។ ប្រសិនបើលក្ខខណ្ឌដែលដាក់ជូន មិនអាចទទួលយកបាន ដូច្នេះគាត់អាចតម្កល់ដីកាឃុំខ្លួនរបស់សហចៅក្រមស៊ើបអង្កេតដូចជាបានការដដែល ។ ផ្ទុយទៅវិញ គាត់អត់បានពិចារណាទៅលើលក្ខខណ្ឌដែលខាងខ្ញុំដាក់ជូនទៅគាត់ទេ ។ ក្នុងករណីនេះ ខ្ញុំបាទយល់ថា ការប្រកាសសាលដីការបស់អង្គបុរេជំនុំជម្រះនាថ្ងៃនេះ គឺមិនមានលក្ខណៈយុត្តិធម៌ដល់កូនក្ដីខ្ញុំទេ» ។
លោកមានប្រសាសន៍ឲ្យដឹងទៀតថា កូនក្តីលោកបានចុះហត្ថលេខាលើកិច្ចសន្យាចំនួន ៧ចំណុចសម្រាប់អង្គបុរេជំនុំជម្រះពិចារណា ក្នុងករណីកូនក្តីលោកត្រូវបានដោះលែងឲ្យនៅឃុំបណ្តោះអាសន្ននោះ ដូចជា ការស្នាក់នៅតែក្នុងផ្ទះកូនស្រីរបស់គាត់ មិនសុំលិខិតឆ្លងដែនថ្មី ការត្រូវតែមានវត្តមាននៅក្នុងផ្ទះពីម៉ោង ៨យប់ដល់ម៉ោង ៧ព្រឹក ត្រូវបង្ហាញមុខនៅស្ថានីយប៉ូលិសមូលដ្ឋានរាល់ថ្ងៃ មិនទាក់ទងសាក្សី ឬជនរងគ្រោះណាមួយ ហើយនឹងចូលរួមគ្រប់ពេលដែលតុលាការកោះអញ្ជើញ ជាដើម ។
លោកមានប្រសាសន៍ថា លោកនិងកូនក្តីលោកមិនពេញចិត្តចំពោះការប្រកាសសាលដីការបស់អង្គបុរេជំនុំជម្រះនេះទេ ក៏ប៉ុន្តែ ដោយយោងទៅតាមវិធានផ្ទៃក្នុង លោកថា លោកគ្មានមធ្យោបាយណាតវ៉ាទៀតឡើយ ព្រោះនេះជាការបិទផ្លូវតវ៉ា។
ចំណែកឯលោក រ៉ូប៊ើត ប៉ឺទី សហព្រះរាជអាជ្ញាវិញ បានថ្លែងថា លោកកាត់ស្មានបានថា គេរកឃើញហេតុផលរឹងមាំ ដែលជឿបានថា ជនត្រូវចោទឈ្មោះ អៀង ធីរិទ្ធ បានប្រព្រឹត្តបទឧក្រិដ្ឋ ដែលបានចោទប្រកាន់ដាក់បន្ទុកនោះ ហើយច្បាស់ណាស់នៅក្នុងនិយមន័យនៃពាក្យថា ប្រព្រឹត្ត នៅក្នុងច្បាប់ មិនចាំបាច់ឲ្យមានការប្រព្រឹត្តដោយផ្ទាល់នោះទេ និងទីពីរគឺឈរលើមូលដ្ឋានការពារសាក្សី ការពារការបំផ្លាញភ័ស្តុតាង ការពារសណ្តាប់ធ្នាប់សាធារណៈ ។ល។ ដែលគ្មានហេតុផលដកសេចក្តីបង្គាប់របស់សហចៅក្រមស៊ើបអង្កេតបានឡើយ ។
សូមបញ្ជាក់ជូនជាថ្មីថា ជនត្រូវចោទ អៀង ធីរិទ្ធ កំពុងជាប់ចោទថា បានប្រព្រឹត្តបទឧក្រិដ្ឋកម្មប្រឆាំងមនុស្សជាតិ នៅក្នុងរបបកម្ពុជាប្រជាធិបតេយ្យពីឆ្នាំ១៩៧៥ ដល់ឆ្នាំ១៩៧៩ ក្នុងតួនាទីជារដ្ឋមន្រ្តីទទួលបន្ទុកសង្គមកិច្ច ដែលមានប្រជាពលរដ្ឋកម្ពុជាប្រមាណជិតពីរលាននាក់ស្លាប់បាត់បង់ជីវិត ៕