អតីតអ្នកធ្លាប់ធ្វើការជាមួយ ឌុច នៅគុកទួលស្លែង ឬមន្ទីរស-២១ ក្នុងរបបខ្មែរក្រហម បានថ្លែងយ៉ាងដូច្នេះថា ៖ «ព្រោះខ្ញុំគិតឃើញថា ចង់ឲ្យគេធ្វើកុំឲ្យឃើញមុខ ឮតែសម្ដី បំប្លែងជាសម្ដីអីកុំឲ្យស្ដាប់បាន ហើយដូរឈ្មោះឬមិនបញ្ចេញឈ្មោះអីអ៊ីចឹង ព្រោះមិនអាចបង្ហាញសាក្សីឲ្យចេញមុខច្បាស់ក្រលែតពេក ។ អាហ្នឹងធម្មតាវាចេះតែខ្លាចដែរហ្នឹង ម៉្លោះហើយអ្នកស្អប់ អ្នកស្រឡាញ់យើង វាមិនទៀង យើងថាមិនត្រូវ មើលមិនឃើញ» ។
ចំណែកឯអតីតជនរងគ្រោះក្រោមស្នាដៃរបស់ ឌុច ដែលនឹងធ្វើជាសាក្សីក្នុងសវនាការខាងមុខនោះដែរ បានថ្លែងយ៉ាងដូច្នេះដែរថា ៖ «ព្រួយបារម្ភវាព្រួយបារម្ភជាទីបំផុតហើយបញ្ហាហ្នឹង ព្រោះយើងមើលមិនឃើញទេ មិនដឹងថ្ងៃណា មិនដឹងខែណា មិនដឹងអ្នកណាមួយគេស្អប់យើង អ្នកណាមួយគេស្រឡាញ់យើងទេ អាបញ្ហាហ្នឹង ។ លោតែគេនេះអី គេថាអាកញ្ចស់ហ្នឹងអ្ហែងចេះដឹងឮអីក្នុងតុលាការ គេពួយយើងតែមួយគ្រាប់ទៅ ងាប់អត់ប្រយោជន៍ បានអ្នកណាចិញ្ចឹមកូន បានអ្នកណាចិញ្ចឹមប្រពន្ធ គិតមើលមើល៍» ។
ជាមួយគ្នានេះអតីតជនរងគ្រោះនៅគុកទួលស្លែងមួយរូបទៀត ក៏បានថ្លែងយ៉ាងដូច្នេះដែរថា ៖ «ខ្ញុំចង់ឲ្យតុលាការការពារមុនកាត់ទោសនិងក្រោយកាត់ទោស» ។
បច្ចុប្បន្ននេះមន្ត្រីសាលាក្តីខ្មែរក្រហមកំពុងពិនិត្យលើនីតិវិធីច្បាប់ទាក់ទិនសំណុំរឿងចោទ កាំង ហ្កិចអ៊ាវ ហៅ ឌុច ដែលទទួលខុសត្រូវលើការស្លាប់រង្គាលមនុស្សជាង១២០០០នាក់នៅគុកទួលស្លែងនោះ ។
ទាក់ទិននឹងការទាមទាររបស់សាក្សី លោកស្រី គាត បូផល ប្រធានអង្គភាពជនរងគ្រោះនៃសាលាក្តីខ្មែរក្រហម មានប្រសាសន៍ថាមានតែព្រះរាជអាជ្ញានិងចៅក្រមដែលសម្រេចលើនីតិវិធី ថាតើសាក្សីនឹងត្រូវឡើងឆ្លើយក្នុងសវនាការដោយកំបាំងមុខឬយ៉ាងណានោះ ។
យោងតាមដីកាបញ្ជូនរឿង ឌុច បានរងការចោទលើបទឧក្រិដ្ឋចំនួន២ គឺឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ហើយឌុចក៏រងការប្តឹងពីភាគីរដ្ឋប្បវេណីចំនួន២៨នាក់ផងដែរ ។
យោងតាមដីកាបញ្ជូនរឿងរបស់ព្រះរាជអាជ្ញាក៏បានឲ្យដឹងទៀតថា គេមានសាក្សីសរុបជិត៤០០នាក់ដែលបានសាកសួរសម្រាប់ការចោទអតីតមេដឹកនាំខ្មែរក្រហមទាំង៥នាក់ ដែលរួមទាំង ឌុច នោះផង ។ ហើយគេរំពឹងថា សវនាការជាលើកដំបូងលើសំណុំរឿង ឌុច អាចនឹងចាប់ផ្តើមនៅខែកញ្ញា ឬខែតុលាខាងមុខនេះ ៕