ពលរដ្ឋ​ចោទ​អាជ្ញាធរ​ឃុំ​លើកដែក​ថា​រារាំង​មិន​ឲ្យ​ធ្វើ​ជា​កម្មករ​ក្រុមហ៊ុន​លីយ៉ុងផាត់

មាន​ពលរដ្ឋ​មួយ​ចំនួន​នៅ​ក្នុង​ឃុំ​លើកដែក ខេត្ត​កណ្ដាល អល់អែក​ក្នុង​ការ​ទៅ​ធ្វើ​ជា​កម្មករ​កាប់​អំពៅ​ឱ្យ​ក្រុមហ៊ុន លី យ៉ុងផាត់ នៅ​ខេត្ត​កំពង់ស្ពឺ បន្ទាប់​ពី​ពួក​គាត់​ត្រូវ​នគរបាល​សួរ​នាំ និង​ធ្វើ​កំណត់​ហេតុ។ បញ្ហា​នេះ បង្ក​ឱ្យ​ចំណោទ​ទៅ​វិញ​ទៅ​មក។
ដោយ ឡេង ម៉ាលី
2012-12-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

មាន​ប្រជាពលរដ្ឋ​ខ្លះ​មិន​សប្បាយ​ចិត្ត​ចំពោះ​ការ​សាកសួរ​របស់​នគរបាល​ឃុំ​លើកដែក សួរ​រក​ក្រដាស​ស្នាម នៅ​ពេល​ដែល​គាត់​ចេញ​ទៅ​រក​ការងារ​ធ្វើ​នៅ​ចម្ការ​អំពៅ​របស់​ក្រុមហ៊ុន លី យ៉ុងផាត់ ឯ​ខេត្ត​កំពង់​ស្ពឺ។

ប្រជាពលរដ្ឋ​មួយ​រូប​ក្នុង​ចំណោម​ពលរដ្ឋ​ប្រមាណ ១០០​នាក់ នៅ​ឃុំ​លើកដែក ស្រុក​កោះធំ ខេត្ត​កណ្ដាល គឺ​លោក ប៉ាវ ស្រេង ថ្លែង​ថា នគរបាល​ឃុំ​លើកដែក នៅ​ថ្ងៃ​ទី២៤ ធ្នូ ព្យាយាម​រារាំង​ពួក​គាត់​មិន​ឱ្យ​ទៅ​ធ្វើ​ជា​កម្មករ​កាប់​អំពៅ​នៅ​ចម្ការ​របស់​ក្រុមហ៊ុន លី យ៉ុងផាត់ នៅ​ខេត្ត​កំពង់ស្ពឺ ទេ ដោយ​លើក​ហេតុ​ផល​ថា ការ​ទៅ​នោះ​ខុស​ច្បាប់។ លោក​ថា នៅ​ថ្ងៃ​ទី២៤ ធ្នូ នគរបាល​បាន​រារាំង​ពលរដ្ឋ​ប្រមាណ ១០០​នាក់ រួម​ទាំង​លោក​ផង មិន​ឱ្យ​ឡើង​ឡាន​ទៅ​ប្រកប​ការងារ​ជា​កម្មករ​ទេ។

ពលរដ្ឋ​មួយ​រូប​ទៀត​ដែល​មិន​ចង់​ចេញ​ឈ្មោះ មាន​ប្រសាសន៍​ថា លោក​នៅ​តែ​អល់អែក​បន្ទាប់​ពី​នគរបាល​សាកសួរ និង​ធ្វើ​កំណត់​ហេតុ​ឱ្យ​លោក ប៉ា ស្រេង ផ្ដិត​មេដៃ។

ការ​ថ្លែង​របស់​ពលរដ្ឋ​ទាំង​នេះ ត្រូវ​បាន​នាយ​ប៉ុស្តិ៍​នគរបាល​ឃុំ​លើកដែក ស្រុក​កោះធំ ខេត្ត​កណ្ដាល គឺ​លោក ម៉ា ប៊ុនហ៊ បំភ្លឺ​ថា ក្រុម​នគរបាល​លោក​មិន​បាន​រារាំង​ពលរដ្ឋ​ទាំង​នោះ​ទេ។ ក៏​ប៉ុន្តែ លោក​ទទួល​ស្គាល់​ថា លោក​បាន​សាកសួរ​ពលរដ្ឋ​ទាំង​នោះ​មែន ពី​ព្រោះ​លោក​ចង់​បញ្ជាក់​ឱ្យ​ដឹង​ព័ត៌មាន​ច្បាស់​លាស់​អំពី​គោលដៅ​របស់​ពលរដ្ឋ​ទាំង​នោះ ដើម្បី​បង្ការ​ការ​ជួញ​ដូរ​មនុស្ស។ លោក​ថា បញ្ហា​នេះ​បាន​កើត​ឡើង​កាល​ពី​ថ្ងៃ​ទី២៤ ធ្នូ នៅ​ពេល​ដែល​ពលរដ្ឋ​រាប់​រយ​នាក់​នាំ​គ្នា​សម្រុក​ឡើង​ឡាន​ចំនួន​បី​គ្រឿង ដែល​បង្ក​ឱ្យ​មាន​ការ​ភ្ញាក់​ផ្អើល។

បុរស​មួយ​រូប​ឈ្មោះ ជ័យ រតនៈ អះអាង​តាម​ទូរស័ព្ទ​ថា លោក​ជា​មេការ​មួយ​រូប​នៃ​ចម្ការ​អំពៅ​របស់​ក្រុមហ៊ុន លី យ៉ុងផាត់ នៅ​ជិត​ភ្នំ​ឱរ៉ាល់ ខេត្ត​កំពង់ស្ពឺ។ លោក​ថ្លែង​បញ្ជាក់​ថា លោក​ពិត​ជា​នាំ​កម្មករ​ទាំង​នោះ​ទៅ​ចម្ការ​អំពៅ លី យ៉ុងផាត់ មែន ពីព្រោះ​ក្រុមហ៊ុន​កំពុង​ត្រូវ​ការ​កម្លាំង​កម្មករ​ជា​ច្រើន​នាក់​ដើម្បី​កាប់​អំពៅ។

បុរស​អះអាង​ថា​ជា​មេការ​ចម្ការ​អំពៅ​ម្នាក់​ទៀត ឈ្មោះ ធុង និង​ក្រុម​ប្រឹក្សា​ឃុំ​អមលាំង លោក ប៊ូ រិទ្ធ បញ្ជាក់​ថា ក្រុមហ៊ុន លី យ៉ុងផាត់ ពិត​ជា​ត្រូវ​ការ​កម្មករ​មែន ហើយ​មាន​ពលរដ្ឋ​នៅ​ក្នុង​តំបន់​នោះ​នាំ​គ្នា​ធ្វើ​ការ​នៅ​ទី​នោះ​ដែរ។ ក្រៅ​ពី​អ្នក​នៅ​ក្នុង​តំបន់ ក៏​មាន​អ្នក​ទៅ​ពី​ស្រុក​ខេត្ត​ផ្សេងៗ​ដែរ។

លោក ប៉ាវ ស្រេង ថ្លែង​ថា មាន​ប្រជាពលរដ្ឋ​ជា​ច្រើន​នាក់​ទៀត ដែល​ចង់​ទៅ​ធ្វើ​ការ​ជា​កម្មករ​កាប់​អំពៅ​របស់​ក្រុមហ៊ុន លី យ៉ុងផាត់ នោះ ក៏​ប៉ុន្តែ ពួក​គាត់​ខ្លះ​នៅ​អល់អែក បន្ទាប់​ពី​នគរបាល​សួរ​នាំ​រួច​មក។ ទោះ​ជា​យ៉ាង​នេះ​ក្ដី លោក ប៉ាវ ស្រេង បញ្ជាក់​ថា កូន​ចៅ​របស់​លោក បាន​ទៅ​ដល់​ក្រុមហ៊ុន លី យ៉ុងផាត់ ហើយ បន្ទាប់​ពី​ក្រុម​គាត់​លួច​ចេញ​ពី​ឃុំ​របស់​លោក។

នាយ​ប៉ុស្តិ៍​ឃុំ​លើកដែក លោក ម៉ា ប៊ុនហ៊ មាន​ប្រសាសន៍​ជា​ថ្មី​ថា លោក​មិន​ឃាត់​ឃាំង​អ្វី​ទេ ហើយ​សាទរ ប្រសិន​បើ​ពលរដ្ឋ​ទៅ​ធ្វើ​ការ​នៅ​ទី​នោះ​បាន​ប្រាក់​ចំណូល​មែន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល