ស្ត្រីវ័យកណ្តាលឈ្មោះ ឃិន សារិទ្ធ មានទីលំនៅនៅភូមិព្រៃក្រោល ឃុំព្រៃមូល បានមានប្រសាសន៍ប្រាប់វិទ្យុអាស៊ីសេរីថា ដីគាត់ចំនួន៣ហិកតាត្រូវទាហានកងកាំភ្លើងធំរំលោភយកទាំងកំរោល ហើយថែមទាំងគំរាមរកបាញ់សម្លាប់គាត់ទៀតផង ។
គាត់បន្តថាដីនេះគាត់បានរុករាននិងកាន់កាប់តាំងពីឆ្នាំ១៩៧៩មកម្ល៉េះ ស្រាប់តែកាលពីឆ្នាំ២០០៧កន្លងទៅ កងទាហានកាំភ្លើងធំបានមកបោះទីតាំងនៅជិតនោះហើយក៏រំលោភយកតែម្តង ។
ស្ត្រីឈ្មោះ ឃិន សារិទ្ធ បានឲ្យដឹងថា ៖ «ដីខ្ញុំ៣ហិកតា បងប្អូន៥នាក់ចែកគ្នាបន្តិចៗម្នាក់ហ្នឹង អត់បានធ្វើតែទាំងអស់គ្នា ។ ខ្ញុំទៅធ្វើហើយ វាមកគំរាមកំហែងបាញ់សម្លុតខ្ញុំ២គ្រាប់ ខ្ញុំកំពុងហូបបាយ វាចាប់អូសគោ ប្រតាយប្រតប់ជាមួយខ្ញុំ វាទាញគោយកទៅកន្លែងបន្ទាយវា» ។
ស្ត្រីវ័យចំណាស់ឈ្មោះ ភាវ រ៉ាំ បន្ថែមថាគាត់បានប្តឹងតវ៉ាទៅអាជ្ញាធរភូមិឃុំឲ្យជួយគាត់ដែរ តែពួកគេពុំជួយដោះស្រាយឲ្យគាត់សោះអស់រយៈពេល២ឆ្នាំមកហើយ ។
ស្ត្រីឈ្មោះ ភាវ រ៉ាំ បានមានប្រសាសន៍ថា ៖ «ដី៧៩ តាំងពីខ្មែរក្រហមនៅ យកអង្ករអ៊ំអស់ អ៊ំសុខចិត្តទ្រាំទ្រធ្វើ ។ ទើបតែទាហានចូលនៅ២ឆ្នាំហ្នឹងយកដីអ៊ំអស់ ។ ឥឡូវខ្ញុំអត់ធ្វើស្រែទាំង២ឆ្នាំហ្នឹង» ។
ពុំអាចទាក់ទងសុំការបំភ្លឺពីទាហានកងកាំភ្លើងធំដែលកំពុងបោះទីតាំងនៅតំបន់ព្រំប្រទល់រវាងស្រុកទឹកផុសនិងស្រុករលាប្អៀរបានទេនៅល្ងាចថ្ងៃទី២២ កក្កដានេះ ។ ប៉ុន្តែមេឃុំព្រៃមូល លោក ភោគ ឈួន ពន្យល់ចំពោះបញ្ហាខាងលើនេះថា ដោយតំបន់នេះក្រសួងការពារជាតិត្រូវការ ហេតុនេះអាជ្ញាធរឃុំកំពុងចរចាជាមួយកងទាហានកាំភ្លើងធំនៃក្រសួងការពារជាតិ ដើម្បីរកដីផ្សេងមកដោះដូរជូនប្រជាពលរដ្ឋ ។
លោក ភោគ ឈួន បានបញ្ជាក់ថា ៖ «បញ្ហាហ្នឹងយើងបានធ្វើការដោះស្រាយរួចហើយ ។ ប៉ុន្តែឥឡូវហ្នឹងយើងដោះស្រាយហ្នឹងវានៅជាប់តែបន្តិចទេ ។ វាអត់មានគាត់យកគាត់អីទេ ព្រោះដីហ្នឹងវាជាដីព្រៃ ខេត្តក៏បានគូររង្វង់ឲ្យទៅទាហាន ។ អ៊ីចឹងគាត់ហ្នឹងគាត់នៅតែប្រកាន់ថា គាត់បានកាន់កាប់អីយូរហើយ ។ អ៊ីចឹងយើងកំពុងតែធ្វើការសម្រុះសម្រួលជាមួយទាហានហ្នឹងដើម្បីធ្វើការដោះដូរ» ។
អភិបាលស្រុករលាប្អៀរ លោក ពេជ្រ សម្បត្តិ មានប្រសាសន៍ថាពិតជាមានបញ្ហាកើតឡើងដូចរបាយការណ៍របស់ប្រជាពលរដ្ឋមែន តែដោយសាររឿងនេះហួសពីលទ្ធភាពរបស់លោកទើបលោកមិនអាចជួយប្រជាពលរដ្ឋបាន ។
លោក ពេជ្រ សម្បត្តិ បានមានប្រសាសន៍ថា ៖ «វាហួសសមត្ថកិច្ចរបស់យើងខ្ញុំ ពីព្រោះវាស្ថិតនៅក្របខ័ណ្ឌរបស់បន្ទាយកងយោធពលខេមរភូមិន្ទការពារទឹកដីរបស់យើង» ។
យ៉ាងណាក៏ដោយមន្ត្រីសម្របសម្រួលអង្គការសិទ្ធិមនុស្សអាដហុកប្រចាំខេត្តកំពង់ឆ្នាំង មានប្រសាសន៍ថាគេគួរតែផ្តល់យុត្តិធម៌ជូនប្រជាពលរដ្ឋដោយផ្តល់ដីសំណងដល់គាត់ឲ្យបានសមរម្យ មុននឹងដកហូតដីនោះប្រគល់ជូនទៅកងទាហានកាំភ្លើងធំ ព្រោះបើគ្មានដីបង្កបង្កើនផលប្រជាពលរដ្ឋប្រាកដជាជួបការលំបាកក្នុងជីវភាព ៕