ប្រធានក្រុមប្រឹក្សាជំនុំជម្រះ លោក អ៊ឹម សួស្តី សម្រេច ៖ ទី១ បណ្តឹងលោកស្រី មូរ សុខហួរ បេក្ខនារីគណបក្សសមរង្ស៊ីខេត្តកំពត ប្តឹងទាស់ទៅនឹងសេចក្តីសម្រេចរបស់គណៈកម្មការរៀបចំការបោះឆ្នោតខេត្តកំពតបានធ្វើត្រឹមត្រូវតាមច្បាប់ ហើយបង្គាប់ឲ្យមន្រ្តីគណបក្សប្រជាជនកម្ពុជា លោក សា ស្មាន់ ដែលប្រើរថយន្តស្លាកលេខខ.មជាឧបករណ៍សម្រាប់ឃោសនា ផ្តន្ទាទោសបង់ប្រាក់ចំនួន៥លានរៀល ។
ទី២ បណ្តឹងគណបក្សសមរង្ស៊ីរបស់លោក រស់ សួរ ប្តឹងទាស់ទៅនឹងសេចក្តីសម្រេចរបស់គណៈកម្មការរៀបចំការបោះឆ្នោត ខេត្តព្រះវិហារ ប្តឹងពីស្រ្តីជាមន្រ្តីគណបក្សប្រជាជនកម្ពុជា យកម៉ូតូមានស្លាកលេខរដ្ឋទៅប្រើប្រាស់ផ្ទាល់ខ្លួន និងប្រើក្នុងការឃោសនាត្រូវផ្តន្ទាទោសជាប្រាក់៥លានរៀលដែរ ។
ទី៣ បណ្តឹងគណបក្សប្រជាជនកម្ពុជាខេត្តកំពង់ចាមនិងខេត្តក្រចេះ ប្តឹងពីលោក សម រង្ស៊ី ប្រើពាក្យប្រមាថ "មេដឹកនាំអារូបប្រុស៣នាក់ជាចោរលួចជាតិ អាមួយនៅកណ្តាលខូចជាងគេ កុំផ្ញើវាសនាលើតៃកុងខ្វាក់ភ្នែកបើកឡានមិនស្គាល់ផ្លូវ" ជាដើម ជាការម៉ាក់ងាយដែលបានហាមឃាត់តាមមាត្រានៃច្បាប់បោះឆ្នោត បានសម្រេចផ្តន្ទាទោសលោក សម រង្ស៊ី ឲ្យបង់ប្រាក់១០លានរៀលដាក់ចូលថវិការដ្ឋ ។ ហើយបានបើកឲ្យភាគីទាំង២មានគណបក្សសមរង្ស៊ី និងគណបក្សប្រជាជនកម្ពុជាមានសិទ្ធិប្តឹងបន្តទៅក្រុមប្រឹក្សាធម្មនុញ្ញទៀតផង ។
ចំពោះការសម្រេចខាងលើនេះតំណាងគណបក្សសមរង្ស៊ី លោក ថាច់ សេដ្ឋា បដិសេធមិនទទួលយកការផ្តន្ទាទោស លោក សម រង្ស៊ី ឲ្យបង់ប្រាក់១០លានរៀលលើបណ្តឹងគណបក្សប្រជាជនកម្ពុជា នៅខេត្តកំពង់ចាមនិងក្រចេះ ។ ប៉ុន្តែសាលក្រមនៅខេត្តកំពតនិងខេត្តព្រះវិហារ គណបក្សសមរង្ស៊ីបានទទួលយក ។
លោក ថាច់ សេដ្ឋា បានឲ្យដឹងថា ៖ «រឿងគណបក្សប្រជាជនដែលប្រព្រឹត្តល្មើសមកលើគណបក្សសមរង្ស៊ីគឺមានភស្តុតាងច្បាស់លាស់ ។ រីឯលោក សម រង្ស៊ី ដែលគាត់និយាយហ្នឹងគឺមិនបានសំដៅទៅលើបុគ្គលណាមួយ លោក ហ៊ុន សែន ឬ ជា ស៊ីម, ហេង សំរិន គឺអត់មានសំដៅផងហ្នឹង ។ ដូច្នេះវាអត់មានអីដែលថាគាត់មានចេតនានិយាយវ៉ៃប្រហារទៅលើបុគ្គលគឺអត់មានទាល់តែសោះ» ។
លោក ថាច់ សេដ្ឋា បានអះអាងថាគណបក្សសមរង្ស៊ីនឹងបន្តប្តឹងទៅក្រុមប្រឹក្សាធម្មនុញ្ញទៀត ៖ «ហើយវាជាការផ្ទុយនឹងមាត្រា៧៦ ៧៣ ផង ពីព្រោះអ្វីដែលធ្វើ ការនិយាយប្រមាថដែលធ្វើឲ្យបាត់ការទុកចិត្តដល់អ្នកបោះឆ្នោត អាហ្នឹងខូចការសម្ងាត់ការបោះឆ្នោតបានវាមានទោស ។ ដូច្នេះនៅក្នុងច្បាប់បានចែងយ៉ាងច្បាស់ ប៉ុន្តែបែរជាក្រុមប្រឹក្សាជំនុំជម្រះខាងគ.ជ.ប.សម្រេចបែបនេះ គឺយើងមិនអាចទទួលយកបានទេ ។ យើងនឹងប្ដឹងទៅក្រុមប្រឹក្សាធម្មនុញ្ញថែមទៀត» ។
រីឯតំណាងគណបក្សប្រជាជនកម្ពុជាមិនបានតវ៉ាជុំវិញការប្រកាសសាលក្រមដោយក្រុមប្រឹក្សាជំនុំជម្រះនៃគណៈកម្មាធិការជាតិរៀបចំការបោះឆ្នោតឡើយ ៕