កាលពីថ្ងៃព្រហស្បតិ៍កន្លងទៅ លោក យ៉ង សាំងកុមារ បានមានប្រសាសន៍ថា ប្រាប់កាសែតភ្នំពេញប៉ុស្តិ៍ថា ការដឹកអង្ករចេញតាមកប៉ាល់នោះរួមមានចំនួន២០០តោនទៅប្រទេសអាល្លឺម៉ង់នៅខែវិច្ឆិកា និង៣០តោនទៀត ត្រូវដឹកទៅសហរដ្ឋអាមេរិកនាដើមឆ្នាំក្រោយ។
លោកបន្តថា ឥឡូវនេះលោកមានអង្ករជាង៦០០តោនហើយសម្រាប់លក់នៅក្នុងស្រុកនឹងលក់នៅអាល្លឺម៉ង់ព្រមទំាងលក់នៅសហរដ្ឋអាមេរិកផងដែរ។
លោកបន្តទៀតថា ឆ្នាំនេះអង្គការសេដាកមានផែនការទិញស្រូវស្រែប្រមាណ២០០០តោនពីប្រជាកសិករ។ ចំណែកពីឆ្នាំទៅទិញស្រូវពីកសិករបានតែ១២០០តោនទេ។
កសិករម្នាក់ឈ្មោះ លឹម វីរៈ នៅភូមិព្រែកត្រែង ខេត្តព្រៃវែង បានឲ្យដឹងថា បើលក់ឲ្យអ្នកផ្សេងបានតម្លៃត្រឹមតែ២៥០ដុល្លារក្នុងស្រូវ១តោន ប៉ុន្តែគ្រួសារគាត់និងអ្នកភូមិខ្លះទៀតដែលលក់ឲ្យអង្គការសេដាក គឺបានថ្លៃ៣០០ដុល្លារក្នុងស្រូវ១តោន គឺប្រមាណ២០%ខ្ពស់ជាងតម្លៃនៅទីផ្សារ៕