សង្គម​ស៊ីវិល​ជំរុញ​ឲ្យ​រដ្ឋាភិបាល​បង្កើន​អភិបាល​កិច្ច​ល្អ​លើ​វិស័យ​ធនធាន​ធម្មជាតិ

សង្គម​ស៊ីវិល និង​ប្រជាពលរដ្ឋ​បាន​លើក​យក​កង្វល់​របស់​ខ្លួន ស្ដីពី​ផល​ប៉ះពាល់​ធ្ងន់ធ្ងរ​ទាក់​ទង​អភិបាល​កិច្ច​ធនធាន​ធម្មជាតិ ឬ​គម្រោង​អភិវឌ្ឍន៍​ដាក់​ជូន​រាជ​រដ្ឋាភិបាល​កម្ពុជា និង​សូម​ឲ្យ​ជួយ​កាត់​បន្ថយ​ជម្លោះ​លើ​បញ្ហា​ទាំង​នេះ។
ដោយ ដែន អយុធ្យា
2012-12-08
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ស្រប​ពេល​គ្នា​នេះ ពួក​គាត់​បាន​ស្នើ​ឲ្យ​រដ្ឋាភិបាល​មុន​នឹង​ធ្វើ​ការ​អភិវឌ្ឍ ឬ​វិនិយោគ​ទីតាំង​ណា​មួយ​ទៅ​ឲ្យ​ក្រុមហ៊ុន ត្រូវ​សិក្សា​ពី​ផល​ប៉ះពាល់ និង​អនុញ្ញាត​ឲ្យ​ពលរដ្ឋ ឬ​សង្គម​ស៊ីវិល​ចូល​រួម​យោបល់។

តំណាង​សហគមន៍​មក​ពី​ខេត្ត​ចំនួន​១៩ និង​សង្គម​ស៊ីវិល​ចំនួន ១៨​ស្ថាប័ន រួម​គ្នា​តស៊ូ​មតិ​ក្នុង​សន្និសីទ​ថ្នាក់​ជាតិ​ឆ្នាំ​ទី៧ របស់​ខ្លួន ដោយ​លើក​នូវ​បញ្ហា​ការ​ព្រួយ​បារម្ភ និង​អនុសាសន៍​ទាក់​ទង​គម្រោង​ផែនការ​អភិវឌ្ឍន៍​ប្រទេស​ដាក់​ជូន​រដ្ឋាភិបាល។

សេចក្តី​ថ្លែងការណ៍​រួម​ចុះ​ថ្ងៃ​ទី៧ ខែ​ធ្នូ របស់​តំណាង​សហគមន៍ និង​សង្គម​ស៊ីវិល ស្ដីពី បញ្ហា និង​ការ​ព្រួយ​បារម្ភ​ពី​ផល​ប៉ះពាល់​ធ្ងន់ធ្ងរ​ទាក់​ទង​នឹង​អភិបាល​កិច្ច​ធនធាន​ធម្មជាតិ បាន​ទាម​ទារ​ឲ្យ​រដ្ឋាភិបាល​សហការ​ធ្វើ​ការ​រួម​គ្នា ដើម្បី​អភិបាល​កិច្ច​ល្អ​លើ​វិស័យ​ដីធ្លី និង​ធនធាន​ធម្មជាតិ​នៅ​កម្ពុជា។

ថ្លែង​ក្នុង​សន្និសីទ សហគមន៍ និង​សង្គម​ស៊ីវិល បាន​លើក​ឡើង​នូវ​កង្វល់ និង​អនុសាសន៍​ធំៗ​ចំនួន ៥​ចំណុច​ដាក់​ជូន​រដ្ឋាភិបាល មាន​ដូច​ជា បញ្ហា​នៃ​វិស័យ​ឧស្សាហកម្ម​និស្សារណកម្ម (ឬ​ការ​ធ្វើ​អាជីវកម្ម​លើ​ធនធាន​រ៉ែ) បញ្ហា​ជន​ជាតិ​ដើម​ភាគ​តិច បញ្ហា​ព្រៃ​ឈើ បញ្ហា​អភិវឌ្ឍន៍​ទីក្រុង ការ​តាំង​ទី​លំនៅឋាន​ថ្មី និង​ការ​បណ្ដេញ​ចេញ​ទាំង​បង្ខំ បញ្ហា​ការ​ចុះ​បញ្ជី​ដីធ្លី និង​បញ្ហា​ទំនាស់​ដី ព្រម​ទាំង​ការ​អនុវត្ត​បទ​បញ្ជា​លេខ​០០១។

លោក ធន សារ៉ាយ ជា​ប្រធាន​សមាគម​ការពារ​សិទ្ធិ​មនុស្ស និង​អភិវឌ្ឍន៍​នៅ​កម្ពុជា អាដហុក (ADHOC) លោក​បាន​ឲ្យ​ដឹង​ថា សន្និសីទ​ថ្នាក់​ជាតិ​ឆ្នាំ​នេះ អ្នក​ចូល​រួម​បាន​ស្នើ​ឲ្យ​រដ្ឋាភិបាល​ត្រូវ​អនុញ្ញាត​ឲ្យ​សង្គម​ស៊ីវិល និង​សហគមន៍​ចូល​រួម​លើ​គម្រោង​អភិវឌ្ឍន៍​ប្រទេស​ឲ្យ​បាន​ទូលាយ។ គម្រោង​អភិវឌ្ឍន៍​របស់​រដ្ឋាភិបាល​ដែល​នាំ​ឲ្យ​ប៉ះពាល់​ដល់​សហគមន៍ មាន​ដូច​ជា បញ្ហា​វិនិយោគ​ដីធ្លី ព្រៃ​ឈើ និង​ធនធាន​រ៉ែ ជាដើម។ លោក​ថា គម្រោង​ទាំង​នេះ​កន្លង​មក​រដ្ឋាភិបាល​មិន​បាន​ផ្តល់​ព័ត៌មាន ឬ​ពិគ្រោះ​យោបល់ ឲ្យ​សហគមន៍ ឬ​សង្គម​ស៊ីវិល​បាន​ដឹង​ជា​មុន​ទេ។

យ៉ាង​នេះ​ក្តី សេចក្តី​ថ្លែងការណ៍​រួម​ក៏​បាន​សរសើរ​ពី​សមិទ្ធផល​នានា​របស់​រាជ​រដ្ឋាភិបាល​លើ​ការ​គ្រប់គ្រង​វិស័យ​ឧស្សាហកម្ម​និស្សារណកម្ម ឬ​ធនធាន​រ៉ែ។ ក្នុង​នោះ​រដ្ឋាភិបាល​បាន​វាយ​តម្លៃ​ជុំវិញ​ការ​ចុះ​បញ្ជី​សហគមន៍​ជា​នីតិបុគ្គល និង​ដី​សមូហភាព បាន​ផលិត​នូវ​លិខិត​គតិយុត្តិ​សម្រាប់​ការពារ​បណ្ដោះ​អាសន្ន​នូវ​ដី​ជន​ជាតិ​ដើម​ភាគ​តិច បង្កើត​គោល​នយោបាយ​ជាតិ​អភិវឌ្ឍន៍​ជន​ជាតិ​ដើម​ភាគ​តិច និង​ព្រម​ទាំង​ធ្វើ​កំណែ​ទម្រង់​ព្រៃ​ឈើ និង​ជំរុញ​សកម្មភាព​ដាំ​ដើម​ឈើ​លើ​ដី​រិចរិល​ជាដើម។

ទោះ​ជា​បែប​នេះ​ក្តី លោក ឈិត សំអាត នាយក​ប្រតិបត្តិ​វេទិកា​នៃ​អង្គការ​មិន​មែន​រដ្ឋាភិបាល​ស្ដីពី​កម្ពុជា (អ៊ិន.ជី.អូ.ហ៊្វរ៉ុម = The NGO Forum on Cambodia) បាន​កត់​សម្គាល់​ថា នៅ​មាន​ចំណុច​ខ្វះ​ខាត​ជាច្រើន​ដែល​រដ្ឋាភិបាល​ត្រូវ​កែ​លំអ​លើ​គម្រោង ឬ​ផែនការ​អភិវឌ្ឍន៍​ប្រទេស ដើម្បី​កុំ​ឲ្យ​ប៉ះពាល់​ដល់​សហគមន៍។

លោក​ថា ដរាប​ណា​រដ្ឋាភិបាល​មិន​ទទួល​យក​អនុសាសន៍​របស់​សង្គម​ស៊ីវិល ឬ​សហគមន៍​យក​ទៅ​ពិចារណា​ឲ្យ​បាន​ច្រើន​ទេ ទំនាស់​កើត​ពី​គម្រោង​អភិវឌ្ឍន៍​ប្រទេស​របស់​រដ្ឋាភិបាល​មិន​ថយ​ចុះ​ទេ។ លោក​ស្នើ​ឲ្យ​រដ្ឋាភិបាល​ត្រូវ​បង្កើន​សកម្មភាព​ធ្វើ​ការងារ​ជាមួយ​សហគមន៍ និង​សង្គម​ស៊ីវិល ឲ្យ​បាន​ច្រើន ដើម្បី​បញ្ចៀស​ទំនាស់​លើ​ផែនការ​អភិវឌ្ឍន៍​ស្រុក​ទេស។

ថ្លែង​ក្នុង​សន្និសីទ​កាសែត លោក​ឧបនាយក​រដ្ឋមន្ត្រី យឹម ឆៃលី ប្រធាន​ក្រុម​ប្រឹក្សា​ស្ដារ និង​អភិវឌ្ឍន៍​វិស័យ​កសិកម្ម និង​ជនបទ បាន​គាំទ្រ​ចំពោះ​អនុសាសន៍​របស់​សង្គម​ស៊ីវិល និង​សហគមន៍។ លោក​ថា រដ្ឋាភិបាល​នឹង​បន្ត​សហការ​ធ្វើ​ការងារ​រួម​គ្នា​ជាមួយ​សហគមន៍ ឬ​សង្គម​ស៊ីវិល​ឲ្យ​បាន​ច្រើន ដើម្បី​រួម​គ្នា​កាត់​បន្ថយ​ភាព​ក្រីក្រ​ជូន​ប្រជាពលរដ្ឋ។

សេចក្តី​ថ្លែងការណ៍​រួម​របស់​សង្គម​ស៊ីវិល និង​សហគមន៍ ក្រៅ​ពី​ផ្តល់​អនុសាសន៍​ជូន​រាជ​រដ្ឋាភិបាល​លើ​បញ្ហា​រួម​គ្នា​ធ្វើ​ការ​ដើម្បី​អភិបាល​កិច្ច​ល្អ​លើ​វិស័យ​ដីធ្លី និង​ធនធាន​ធម្មជាតិ​នៅ​កម្ពុជា តំណាង​សង្គម​ស៊ីវិល​ចំនួន ១៨​ស្ថាប័ន និង​តំណាង​សហគមន៍​មក​ពី ១៩​ខេត្ត ក៏​បាន​លើក​យក​អនុសាសន៍​របស់​ខ្លួន​ដាក់​ជូន​វិស័យ​ឯកជន ដៃគូ​អភិវឌ្ឍន៍ និង​ប្រទេស​ម្ចាស់​ជំនួយ​ឲ្យ​កម្ពុជា ថែម​ទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល