ប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា បានបា្រប់វិទ្យុអាស៊ីសេរីនៅថ្ងៃទី២៩ សីហា ថា ក្រុមសហគមន៍របស់លោកនិងអង្គការសិទ្ធិមនុស្សចំនួន៥ទៀត បន្ទាប់ពីបានទទួលដំណឹងថា លោក ទឹម សាខន មានជំងឺជាទម្ងន់នៅប្រទេសវៀតណាមនោះ ក៏បានដាក់លិខិតកាលពីដើមសប្តាហ៍នេះទៅស្ថានទូតវៀតណាម ដើម្បីសុំជួបលោក ទឹម សាខន ប៉ុន្តែរហូតមកដល់ពេលនេះមិនទាន់មានចម្លើយយ៉ាងណានៅឡើយនោះទេ ។
លោក ថាច់ សេដ្ឋា បានឲ្យដឹងថា ៖ «នៅក្នុងនោះមានខាងខ្ញុំ មានខាងអង្គការសិទ្ធិមនុស្សដែលមានខាងមូលនិធិ មានខាងតំណាងសហព័ន្ធដែលនៅក្នុងប្រទេសកម្ពុជានេះដែរ ។ យើងប្រឹងប្រែងគ្រប់មធ្យោបាយទាំងអស់ ហើយឃើញលិខិតរបស់ឪពុករបស់តេជគុណ ទឹម សាខនហ្នឹង គាត់បានផ្ញើទៅថ្វាយព្រះមហាក្សត្រផងដែរ ហើយមិនទាន់បានឃើញមានអន្តរាគមន៍អី ។ ដូច្នេះយើងនៅតែប្រជុំគ្នាដើម្បីរកមធ្យោបាយអីផ្សេងៗទៀតដើម្បីជួយដល់លោក ព្រោះឮថាមានជំងឺជាទម្ងន់» ។
សូមជម្រាបថាកាលពីសប្តាហ៍មុន លោក ទឹម ធៀង ដែលជាឪពុករបស់លោក ទឹម សាខន បានដាក់លិខិតសុំអន្តរាគមន៍ពីព្រះមហាក្សត្រខ្មែរឲ្យយកលោក ទឹម សាខន មកស្រុកខ្មែរវិញ ប៉ុន្តែរហូតមកដល់ថ្ងៃនេះពុំទាន់មានចម្លើយយ៉ាងណានៅឡើយនោះដែរ ។
ពាក់ព័ន្ធនឹងការលើកឡើងខាងលើនេះ អ្នកនាំពាក្យស្ថានទូតវៀតណាម លោក ទ្រីង បាកាំ បានបដិសេធមិនឆ្លើយតបនឹងសំណួររបស់វិទ្យុអាស៊ីសេរី ប៉ុន្តែលោកធ្លាប់បានប្រាប់វិទ្យុអាស៊ីសេរីថា លោក ទឹម សាខន មានសិទ្ធិសេរីភាពដូចប្រជាពលរដ្ឋដទៃទៀត ។
ចំណែកឯអ្នកនាំពាក្យរបស់ក្រសួងមហាផ្ទៃ លោកឧត្តមសេនីយ៍ ខៀវ សុភ័គ បានបញ្ជាក់ថាលោកក៏មិនដឹងថា លោក ទឹម សាខន នៅទីណាដែរ ព្រោះលោក ទឹម សាខន បានសុំលិខិតទៅរស់នៅប្រទេសវៀតណាមតាំងពីលោកសឹកពីព្រះសង្ឃមកម៉្លេះ ។
លោកឧត្តមសេនីយ៍ ខៀវ សុភ័គ បានមានប្រសាសន៍ថា ៖ «ទាល់តែទាក់ទងទៅស្ថានទូតវៀតណាមបានគេដឹង ព្រោះថាបើក្នុងនេះចង់និយាយថាច្បាប់នៅពេលដែលព្រះតេជគុណ ទឹម សាខន ឬលោក ទឹម សាខន នៅស្រុកយើងគាត់ជាជនជាតិកម្ពុជា ជាស្វ័យប្រវត្តិ ប៉ុន្តែពេលដែលគាត់សុំរស់នៅទៅដល់ប្រទេសកំណើតគាត់ ស្រុកកំណើតគាត់ គាត់ទៅជាជនជាតិគេមួយផ្សេងទៀត ។ គាត់មានលិខិតទៅ សុំទៅរស់នៅ គាត់សរសេរផ្ទាល់ដៃគាត់ ហត្ថលេខាគាត់ មេដៃគាត់ ពេលដែលគាត់សឹក» ។
លោក ទឹម ធៀង ដែលជាឪពុករបស់លោក ទឹម សាខន បានឲ្យដឹងថា បច្ចុប្បន្ន លោក ទឹម សាខន កំពុងតែរស់នៅក្នុងប្រទេសវៀតណាមក្រោមការឃ្លាំមើលពីរដ្ឋាភិបាលវៀតណាម និងមិនអនុញាតឲ្យលោក ទឹម សាខន មកស្រុកខ្មែរដើម្បីជួបជុំក្រុមគ្រួសារឡើយ ។
សូមជម្រាបថា លោក ទឹម សាខន អតីតព្រះចៅអធិការវត្តភ្នំដិន ខេត្តតាកែវ ត្រូវបានអាជ្ញាធរខ្មែរចាប់ផ្សឹកទាំងបង្ខំកាលពីឆ្នាំមុន រួចបញ្ជូនទៅប្រទេសវៀតណាម ហើយត្រូវតុលាការវៀតណាមកាត់ទោសឲ្យជាប់គុក ៕