នាយកប្រតិបត្តិអង្គការខ្មែរក្រោមការពារសិទ្ធិមនុស្ស លោក អាំង ចាន់រិទ្ធិ មានប្រសាសន៍ថា ក្រុមអង្គការរបស់លោកកំពុងចាំមើល បន្ទាប់ពីឪពុកលោក ទឹម សាខន បានដាក់លិខិតអំពាវនាវជូនព្រះមហាក្សត្រដើម្បីឲ្យជួយបញ្ជូនលោក ទឹម សាខន មកកម្ពុជាវិញ បន្ទាប់មកលោកនឹងរៀបចំគម្រោងដាក់ពាក្យបណ្ដឹងទៅអង្គការសិទ្ធិមនុស្សអន្តរជាតិ ។
លោក អាំង ចាន់រិទ្ធិ បានមានប្រសាសន៍ថា ៖ «ទាក់ទងនឹងករណីហ្នឹងពួកខ្ញុំកំពុងតែពិចារណា ហើយជំហានបន្ទាប់ដែលពួកខ្ញុំកំពុងធ្វើហ្នឹង គឺពួកខ្ញុំរង់ចាំឪពុករបស់ព្រះតេជគុណ ទឹម សាខន គាត់បានដាក់ញត្តិទៅព្រះមហាក្សត្រសិន ដើម្បីឲ្យព្រះមហាក្សត្រជួយព្រះរាជអន្តរាគមន៍ទៅលើករណីហ្នឹង ថាតើករណីហ្នឹងព្រះមហាក្សត្រយើងគាត់អាចជួយអន្តរាគមន៍ដល់ព្រះតេជគុណ ទឹម សាខន បានដល់កម្រិតណាដែរ ដើម្បីពួកខ្ញុំជាមូលដ្ឋាន ។ បន្ទាប់មកទៀតបើសិនជាករណីនេះមិនបានសម្រេចទេ យើងដាក់ពាក្យបណ្ដឹងទៅតុលាការអន្តរជាតិ ឬដាក់ទៅខាងអង្គការលើកលែងទោសអន្តរជាតិដើម្បីជួយធ្វើអន្តរាគមន៍លើករណីនោះផងដែរ» ។
លោក ទឹម ធៀង អាយុ៨២ឆ្នាំដែលជាឪពុករបស់លោក ទឹម សាខន បានប្រាប់វិទ្យុអាស៊ីសេរី នៅថ្ងៃទី២២ សីហា ថា ដោយលោកកាន់តែចាស់ហើយឈឺជាប្រចាំ លោកចង់ជួបមុខកូន ទើបសុំឲ្យព្រះមហាក្សត្រជួយបញ្ជូនលោក ទឹម សាខន មកកម្ពុជាវិញ ។
លោក ទឹម ធៀង បានឲ្យដឹងថា ៖ «សុំឲ្យព្រះមហាក្សត្រសូមលោកមេត្តាជួយដោះស្រាយធ្វើអន្តរាគមន៍ឲ្យបានកូនខ្ញុំមកជួបជុំ ។ បើមិនបានមកទេ គ្រាន់តែឆ្លងទៅវិញទៅមកបាន បានហើយ» ។
អ្នកអង្គម្ចាស់ ស៊ីសុវត្ថិ ធម្មិកោ ជាមន្ត្រីខុទ្ទកាល័យព្រះបរមរាជរាំងមានបន្ទូលថា បើឪពុកលោក ទឹម សាខន ដាក់ចុតម្មាយមកឲ្យព្រះមហាក្សត្រ ព្រះអង្គពិតជាយកព្រះទ័យទុកដាក់ជាមិនខាន ។
អ្នកអង្គម្ចាស់ ស៊ីសុវត្ថិ ធម្មិកោ បានមានបន្ទូលថា ៖ «ប៉ុន្តែបើសិនជាឪពុកលោក ទឹម សាខន សរសេរចុតម្មាយទៅថ្វាយលោក ច្បាស់ជាលោកយកព្រះទ័យទុកដាក់ហើយជុំវិញបញ្ហានេះ» ។
ចំណែកឯអ្នកនាំពាក្យរបស់ស្ថានទូតវៀតណាម លោក ទ្រីង បាកាំង បានបំភ្លឺថាបច្ចុប្បន្នលោក ទឹម សាខន មានសេរីភាពពេញលេញដូចប្រជាពលរដ្ឋដទៃ លោកអាចធ្វើដំណើរទៅណាមកណាបានតាមចិត្តលោក ។ លោកពុំមានការឃុំឃាំងឬការហាមឃាត់ពីអាជ្ញាធរវៀតណាមនោះទេ ។
លោក ទ្រីង បាកាំង បានមានប្រសាសន៍ថា ៖ «ឥឡូវគាត់ជាប្រជាពលរដ្ឋធម្មតា យើងខ្ញុំអត់មានពេល តាមពិតទៅអត់មានពេលទេតាមដានអារឿងហ្នឹង» ។
លោក ទឹម ធៀង ដែលជាឪពុករបស់លោក ទឹម សាខន បានឲ្យដឹងថា លោក ទឹម សាខន កំពុងតែរស់នៅក្នុងប្រទេសវៀតណាម ក្រោមការឃ្លាំមើលពីរដ្ឋាភិបាលវៀតណាម និងមិនអនុញ្ញតឲ្យលោក ទឹម សាខន មកស្រុកខ្មែរដើម្បីជួបជុំក្រុមគ្រួសារឡើយ ។
សូមជម្រាបថា លោក ទឹម សាខន ដើមកំណើតអតីតជាព្រះចៅអធិការវត្តភ្នំដិន ខេត្តតាកែវ ត្រូវបានអាជ្ញាធរខ្មែរចាប់ផ្សឹកទាំងបង្ខំកាលពីឆ្នាំមុន រួចបញ្ជូនទៅប្រទេសវៀតណាម បន្ទាប់មកតុលាការវៀតណាមបានកាត់ទោសឲ្យលោកជាប់គុក ៕