ជនរងគ្រោះឈ្មោះ ឌឿ ធឿ អាយុ៤០ឆ្នាំ រស់នៅភូមិស្រម៉ ឃុំសេកុង ស្រុកសៀមប៉ាង ខេត្តស្ទឹងត្រែង ស្លាប់នៅខាងត្បូងព្រះវិហារវត្តលើ ក្នុងឃុំស្ទឹងត្រែង ខេត្តស្ទឹងត្រែង កាលពីព្រលឹមថ្ងៃទី២៦ វិច្ឆិកា ឆ្នាំ២០០៨ បន្ទាប់ពីគាត់ធ្វើដំណើរពីស្រុកសៀមប៉ាងចូលមកស្នាក់នៅក្នុងវត្តនោះដើម្បីចូលរួមសិក្ខាសាលាស្តីពីកិច្ចការសាសនានិងធម្មការ។
មន្ត្រីស៊ើបអង្កេតសមាគមអាដហុកខេត្តស្ទឹងត្រែង លោក ហូ សំអុល មានប្រសាសន៍ឲ្យដឹងថា អ្នករួមដំណើរជាមួយជនរងគ្រោះមានព្រះសង្ឃនិងអាចារ្យវត្តមកពីភូមិស្រម៉ សន្និដ្ឋានដូចៗគ្នាថា ជនរងគ្រោះពិតជាត្រូវគេសម្លាប់ពីព្រោះឃើញមានស្នាមរបួសនៅខ្លួនសាកសពដែលពីមុនស្លាប់មិនមានរបួសនោះទេ។
លោក ហូ សំអុល បានឲ្យដឹងថា ៖ «ជនរងគ្រោះហ្នឹងគឺគេវ៉ៃដើមទ្រូង ហើយនិងស្មងជើងមួយកន្លែងទៀត។ យើងទាមទារឲ្យខាងប៉ូលិសយើងនៅខេត្តស្ទឹងត្រែងហ្នឹង ឲ្យជួយអន្តរាគមន៍ដើម្បីវែកមុខឃាតករ»។
ចំណែកអាចារ្យវត្តស្រម៉ លោកតា សួន ភូមរ៉ា បញ្ជាក់បន្ថែម ៖ «ពីដើមឡើយអត់មានរបួសស្នាមអីទេខ្លួនគាត់ហ្នឹង ដល់ពេលស្លាប់ហ្នឹងបានឃើញស្នាម»។
ទាក់ទិនករណីនេះដែរស្នងការរងប៉ូលិសខេត្តស្ទឹងត្រែង លោក ឯក ស៊ីវ៉ាន់ដន ដែលចូលរួមស៊ើបអង្កេតករណីនេះមានប្រសាសន៍ឲ្យដឹងថា តាមការត្រួតពិនិត្យសាកសពនិងកន្លែងកើតហេតុ ប៉ូលិសវាយតម្លៃថា ជនរងគ្រោះស្លាប់នៅរាត្រីថ្ងៃទី២៥ ដោយអំពើអត្តឃាត។
លោក ឯក ស៊ីវ៉ាន់ដន បានបញ្ជាក់ថា ៖ «ខ្ញុំបានចុះទៅផ្ទាល់ក្នុងរឿងហ្នឹង ពិនិត្យស្នាម វាមានយូរមកហើយ វាឡើងក្រៀមមុខអស់ហើយ។ យប់ត្រជាក់វាមិនអាចទៅជាមុខរបួសហ្នឹងក្រៀមស្ងួតបានទេ ហើយយើងពិនិត្យមើលគឺថា គ្មានមូលហេតុពាក់ព័ន្ធនឹងឃាតកម្មទេ ព្រោះគាត់អ្នកមកពីឆ្ងាយ គាត់ក្រ»។
បើតាមប្រធានមន្ទីរធម្មការនិងសាសនាខេត្តស្ទឹងត្រែង លោក ស៊ី សួន មានប្រសាសន៍ថា មន្ទីរបានរៀបចំសិក្ខាសាលា ហើយអញ្ជើញអ្នកភូមិនិងគណៈកម្មការអាចារ្យវត្តតាមបណ្តាស្រុកចូលរួម ក៏ប៉ុន្តែលោកមិនបានដឹងពីមូលហេតុនៃការស្លាប់នោះទេ។
លោកថា គ្រួសារជនរងគ្រោះនៅឆ្ងាយហើយទីទ័លក្រ ដូច្នេះមន្ទីរនិងព្រះសង្ឃនៅទីកើតហេតុរួមគ្នាធ្វើបុណ្យឲ្យជនរងគ្រោះ។
ជំទប់ទីមួយឃុំសេកុង លោក គីន ភីន មានប្រសាសន៍ថា ពុំទាន់មានការបំភ្លឺណាមួយពីក្រុមគ្រួសារជនរងគ្រោះទាក់ទិននឹងករណីស្លាប់នោះទេ ដោយសារមធ្យោបាយផ្តល់ដំណឹងទៅគ្រួសារជនរងគ្រោះផ្លូវឆ្ងាយពិបាកធ្វើដំណើរមានភាពយឺតយ៉ាវ។
លោកថា ប៉ូលិសគួរបន្តការស៊ើបអង្កេតស៊ីជម្រៅជាងនេះដើម្បីផ្តល់យុត្តិធម៌ដល់ក្រុមគ្រួសារជនរងគ្រោះ ៖ «សង្ស័យពួកអាជើងកាងអីហើយ។ ជើងកាងច្រើន ស្ទឹងត្រែង»។
កាលពីចុងសប្តាហ៍មុននេះ សកម្មជនគណបក្សសមរង្ស៊ីមួយរូបនៅឃុំព្រែកមាស ស្រុកសៀមប៉ាង ក៏ត្រូវគេលួចបាញ់សម្លាប់ដោយកាំភ្លើងចំនួន៤គ្រាប់ នៅឯខ្ទមចាំចម្ការរបស់គាត់ ហើយប៉ូលិសពុំទាន់រកឃើញជនដៃដល់នៅឡើយទេ៕