នាយករដ្ឋមន្ត្រីព្រមានក្រុមហ៊ុនព្រៃសម្បទាន

ដោយ ជា មករា

2008-06-01

លោកនាយករដ្ឋមន្ត្រី ហ៊ុន សែន បានព្រមានចំពោះក្រុមហ៊ុនព្រៃសម្បទាននានានៅកម្ពុជាថា រដ្ឋាភិបាលមិនអនុញ្ញាតឲ្យកាប់ឈើក្នុងរយៈពេលយូរតទៅទៀតទេ ដូច្នេះក្រុមហ៊ុនទាំងនោះអាចបញ្ឈប់ការរកស៊ីនៅកម្ពុជា ហើយប្រគល់ព្រៃសម្បទានទាំងនោះឲ្យទៅរដ្ឋគ្រប់គ្រងវិញ ។

Photo courtesy of Global Witness

រូបថតពីលើអាកាសនៃទិដ្ឋភាពព្រៃឈើនៅកម្ពុជាដែលរងការកាប់បំផ្លាញ។

លោកនាយករដ្ឋមន្ត្រីបានថ្លែងនៅក្នុងឱកាសបិទសន្និសីទជាតិស្ដីពីការរីកចម្រើនរបស់ប្រជាពលរដ្ឋ តាមរយៈសមិទ្ធិផលនានានៃការអនុវត្តយុទ្ធសាស្ត្រចតុកោណរបស់រដ្ឋាភិបាល នៅសាលសន្និសីទចតុមុខ នៅថ្ងៃទី១ មិថុនា ដែលមានមន្ត្រីជាន់ខ្ពស់ទូទាំងប្រទេសចូលរួមប្រមាណ ៨០០នាក់យ៉ាងដូច្នេះថា ៖ «ចំណុចនេះក៏សូមបញ្ជាក់ថា រឿងកាប់ឈើនេះទុកវាសិនទៅ កុំពឹងផ្អែកទៅលើចំណូលព្រៃឈើ ប៉ុន្មានឆ្នាំហើយយើងអត់ដែលមានចំណូលពីឈើទេ យើងប្រើប្រាស់ចំណូលមិនមែនផ្នែកណាមួយចេញពីឈើទេ ។ ឈើវាអត់ទ្រោមទេ ទុកវានៅហ្នឹងសិនទៅ កាប់ឈើបង្កើតនូវអំពើពុករលួយមួយធំណាស់ គ្រប់គ្រងលែងកើតហើយ ទុកវានៅហ្នឹងសិន ហ្នឹងទី១ ។ ទី២ ស្ពាន ផ្លូវថ្មីនេះ ធ្វើហើយ កាប់ឈើខ្ទេចខ្ទាំអាហ្នឹង អាលុយលក់ឈើបានមកហ្នឹង វាមិនគ្រប់គ្រាន់នឹងជួសជុលផ្លូវទេ ។ អ៊ីចឹងបានខ្ញុំសុំស្នើអ្នកព្រៃសម្បទានទាំងឡាយហ្នឹង បើសិនថា ទេបើគង់មិនបានកាប់ដដែល ក៏មិនដកខ្លួនចេញដែរ ក៏ខ្ញុំអរដែរ ទុកក៏មិនទាន់ឲ្យកាប់ដែរ បំរាមដឹកជញ្ជូនឈើហ្នឹង នៅបន្តទៅទៀត បន្តក្នុងរយៈពេលវែង ព្រោះខ្ញុំមើលឃើញហើយ អត់កាប់ម៉េច ? គ្មានចំណូលព្រៃឈើ រកបានដែរ» ។

តាមរបាយការណ៍របស់ក្រសួងកសិកម្មដែលចែកផ្សាយនៅក្នុងឱកាសសន្និសីទជាតិនោះ បានឲ្យដឹងថា កន្លងមកមានក្រុមហ៊ុនព្រៃសម្បទានចំនួន១៧ បានត្រូវលុបចោលកិច្ចព្រមព្រៀង ហើយដកហូតបានព្រៃសម្បទានសរុបចំនួន២៤កន្លែង ស្មើនឹងជាង ៣លាន៥សែនហិកតា ។ បច្ចុប្បន្ននៅ១៩ខេត្តក្រុងទូទាំងប្រទេសមានសហគមន៍ការពារព្រៃឈើចំនួន៣០០កន្លែង ៕

បោះពុម្ព អ៊ីម៉េល