RACHA គ្រោង​ផលិត​ទឹក​ស្អាត​ប្រើ​តាម​មណ្ឌល​សុខភាព​ដើម្បី​គាំពារ​មាតា​និង​ទារក

អង្គការ​សម្ព័ន្ធ​សុខភាព​កុមារ និង​សុខភាព​បន្ត​ពូជ (រ៉ាឆា = RACHA) បាន​ឱ្យ​ដឹង​ថា ថ្វី​ត្បិត​តែ​បច្ចុប្បន្ន​អត្រា​ស្លាប់​របស់​មាតា និង​ទារក​ក្នុង​ពេល​សម្រាល មាន​ការ​ថយ​ចុះ​ក៏ដោយ ក៏​បញ្ហា​សុខភាព​មាតា និង​ការ​ខ្វះ​អាហារូបត្ថម្ភ​សម្រាប់​កុមារ នៅ​តែ​ជា​កង្វល់​ដែល​កំពុង​ត្រូវ​បាន​យក​ចិត្ត​ទុក​ដាក់​យ៉ាង​ខ្លាំង។
ដោយ ហង្ស សាវយុត
2012-12-26
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ទារក ៣០៥
២៤-មេសា-២០១០៖ ទារក​ដែល​ទើប​នឹង​សម្រាល​ហើយ នៅ​មន្ទីរពេទ្យ​ឯកជន​មួយ នា​រាជធានី​ភ្នំពេញ។
RFA Photo

នៅ​ក្នុង​គម្រោង​ជួយ​ដល់​សុខភាព​មាតា និង​ទារក ដែល​កំពុង​គិតគូរ​យ៉ាង​ចាំបាច់​បំផុត​នោះ ការ​ផលិត​ទឹក​ស្អាត​សម្រាប់​ការ​ប្រើប្រាស់​នៅ​តាម​មណ្ឌល​សុខភាព​នៃ​សហគមន៍​នានា ក៏​ជា​ផ្នែក​ពាក់ព័ន្ធ​ផង​ដែរ។

អង្គការ​សុខភាព​ក្រៅ​រដ្ឋាភិបាល​មួយ​ឈ្មោះ រ៉ាឆា បាន​ចំណាយ​មូលនិធិ​មនុស្ស​ធម៌​យ៉ាង​ហោច​ណាស់​ពី ៥​ទៅ ៦​លាន​ដុល្លារ​សហរដ្ឋ​អាមេរិក ក្នុង​១ឆ្នាំៗ​ទៅ​លើ​គម្រោង​ជួស​ជុល​មណ្ឌល​សុខភាព​សហគមន៍​ជនបទ​នានា នៅ​តាម​បណ្ដា​ខេត្ត​មួយ​ចំនួន​នៃ​ប្រទេស​កម្ពុជា រួម​ទាំង​បំពាក់​ឧបករណ៍​ផលិត​ទឹក​ស្អាត​ឱ្យ​បាន​ប្រើប្រាស់​ផង​ដែរ។

គម្រោង​ជួស​ជុល​មណ្ឌល​សុខភាព​នៅ​តាម​ជនបទ និង​ផលិត​ទឹក​ស្អាត​ឱ្យ​សហគមន៍​បាន​ប្រើប្រាស់ ដែល​ជា​ជំនួយ​ពី​សហរដ្ឋ​អាមេរិក នោះ គឺ​ដើម្បី​លើក​កម្ពស់​ទៅ​ដល់​សកម្មភាព​នៃ​កម្មវិធី​គាំពារ​សុខភាព​មាតា និង​ទារក។

អ្នកស្រី ចាន់ ធារី ជា​នាយិកា​ប្រតិបត្តិ​របស់​អង្គការ​សម្ព័ន្ធ​សុខភាព​កុមារ និង​សុខភាព​បន្ត​ពូជ រ៉ាឆា អ្នកស្រី​បាន​មាន​ប្រសាសន៍​ថា អង្គការ​របស់​អ្នកស្រី​បាន​ចាប់​ផ្ដើម​អនុវត្ត​គម្រោង​នេះ​ចាប់​តាំង​ពី​អំឡុង​ឆ្នាំ​២០០៧-២០០៨ មក​ម្ល៉េះ។

អ្នកស្រី ចាន់ ធារី បាន​មាន​ប្រសាសន៍​ថា កាល​ពី​ឆ្នាំ​២០១០ កន្លង​ទៅ បើ​ទោះ​បី​ជា​គេ​ដឹង​ថា​អត្រា​ស្លាប់​របស់​មាតា និង​ទារក បាន​ថយ​ចុះ​ក៏ដោយ ក៏ប៉ុន្តែ​ការ​កង្វះ​អាហារូបត្ថម្ភ​ទៅ​លើ​កុមារ នៅ​តែ​ជា​កង្វល់​កំពុង​មាន​ការ​ចាប់​អារម្មណ៍​ខ្លាំង​នៅ​ឡើយ។ ដោយ​សារ​តែ​កង្វល់​ទាំង​នោះ បាន​ជំរុញ​ឱ្យ​មន្ត្រី​សុខភាព​របស់​រដ្ឋាភិបាល និង​អង្គការ​ក្រៅ​រដ្ឋាភិបាល កំពុង​ប្រឹង​ប្រែង​ទៅ​លើ​សកម្មភាព​ផ្នែក​គាំពារ​មាតា និង​ទារក ហើយ​អង្គការ​រ៉ាឆា បាន​ជួយ​ទៅ​លើ​គម្រោង​ជួស​ជុល និង​សាង​សង់​មណ្ឌល​សុខភាព​ខ្លះ​ឱ្យ​មាន​កន្លែង​សមរម្យ សម្រាប់​អ្នក​មក​ទទួល​សេវា​សុខភាព ជាពិសេស​គឺ​ស្ត្រី​ដែល​មក​រង់ចាំ​មុន និង​ពេល​សម្រាល​កូន។ ការ​គិតគូរ​ដល់​សុខភាព​សាធារណៈ​ទាំង​នោះ ទឹក​ស្អាត​ក៏​មាន​ពាក់ព័ន្ធ​ផង​ដែរ។

អ្នកស្រី ចាន់ ធារី៖ «វា​ចូល​រួម​ក្នុង​ការ​ការពារ​នូវ​ជំងឺ​រាតត្បាត​ផ្សេងៗ ជាពិសេស​គឺ​ជំងឺ​រាគ។ ប្រជាជន​បាន​ពិសារ​ទឹក​ស្អាត នៅ​ពេល​ដែល​គាត់​មក​សម្រាក។ ដូច្នេះ​យើង​គិត​ពី​រឿង​សុខភាព​សាធារណៈ ជាពិសេស​ផ្នែក​គាំពារ​សុខភាព​មាតា និង​ទារក ត្រូវ​ការ​ចាំបាច់​បំផុត»

សេចក្តី​ប្រកាស​ព័ត៌មាន​របស់​អង្គការ​រ៉ាឆា កាល​ពី​ពេល​ថ្មីៗ​បាន​ឱ្យ​ដឹង​ថា អង្គការ​នេះ​កំពុង​អនុវត្ត​សកម្មភាព​នៅ​ក្នុង​ខេត្ត​ចំនួន​៥ គឺ​ខេត្ត​សៀមរាប បន្ទាយមានជ័យ ពោធិ៍សាត់ ព្រៃវែង និង​ខេត្ត​កោះកុង។ ការ​អនុវត្ត​គម្រោង​ជួស​ជុល​បន្ទប់​រង់ចាំ​សម្រាប់​ស្ត្រី​មាន​ផ្ទៃពោះ​នៅ​តាម​មណ្ឌល​សុខភាព​ក្នុង​ខេត្ត​ទាំង​៥ នោះ ជាច្រើន​ឆ្នាំ​កន្លង​មក គឺ​បាន​ចំនួន​ប្រហែល​ជាង ១០០​មណ្ឌល​សុខភាព​ហើយ។ គ្រប់​មណ្ឌល​សុខភាព​ដែល​អង្គការ​នេះ​បាន​ជួស​ជុល គឺ​គេ​ចាប់​ផ្ដើម​បំពាក់​ឱ្យ​មាន​ឧបករណ៍​ផលិត​ទឹក​ស្អាត ដើម្បី​ឱ្យ​សហគមន៍​ជន​បទ​បាន​ប្រើប្រាស់។

ចំណែក​នៅ​ក្នុង​ខេត្ត​សៀមរាប ជាច្រើន​ឆ្នាំ​មក​នេះ គឺ​អង្គការ​រ៉ាឆា បាន​ជួយ​ជួស​ជុល​បន្ទប់​សម្រាប់​ស្ត្រី​រង់ចាំ​មុន និង​ក្រោយ​សម្រាល​កូន ចំនួន ៣៨​កន្លែង។ បន្ថែម​លើ​នេះ រ៉ាឆា បាន​ជួយ​សាង​សង់​ស្ថានីយ​ផលិត​ទឹក​ស្អាត​ឱ្យ​សហគមន៍​ប្រើប្រាស់​ចំនួន ៤​កន្លែង​ធំៗ​ទៀត​ផង។

លោក ក្រូស សារ៉ាត់ ជា​ប្រធាន​មន្ទីរ​សុខាភិបាល​ខេត្ត​សៀមរាប បាន​មាន​ប្រសាសន៍​ថា ការ​មាន​ទឹក​ស្អាត និង​ភ្លើង​អគ្គិសនី​ប្រើប្រាស់​នៅ​តាម​មណ្ឌល​សុខភាព គឺ​ជា​ការ​ប្រសើរ​បំផុត ដែល​ធ្វើ​ឱ្យ​ការ​ផ្តល់​សេវា និង​ថែទាំ​សុខភាព​សាធារណៈ​មាន​ប្រសិទ្ធភាព​ខ្ពស់។ លោក ក្រូស សារ៉ាត់ បាន​ឱ្យ​ដឹង​ថា នៅ​ទូទាំង​ខេត្ត​សៀមរាប មាន​មណ្ឌល​សុខភាព​ទាំង​អស់​ចំនួន ៧៨​កន្លែង ហើយ​ប្រហែល ៧០% នៃ​មណ្ឌល​សុខភាព​ទាំង​នោះ គឺ​មន្ទីរ​សុខាភិបាល​បាន​បំពាក់​ឧបករណ៍​ចម្រោះ​ទឹក​ស្អាត​នៅ​តាម​អណ្ដូង ដើម្បី​ឱ្យ​មាន​ទឹក​ស្អាត​ប្រើប្រាស់។

លោក ម៉ម ប៊ុនហេង ជា​រដ្ឋមន្ត្រី​ក្រសួង​សុខាភិបាល​នៃ​ប្រទេស​កម្ពុជា បាន​ថ្លែង​កាល​ពី​ពេល​ថ្មីៗ​ថា សុខភាព​របស់​ប្រជាពលរដ្ឋ គឺ​ជា​ប្រការ​សំខាន់​យ៉ាង​ខ្លាំង។ ប្រសិន​បើ​ប្រជាពលរដ្ឋ​មិន​មាន​សុខភាព​ល្អ​ទេ គឺ​មិន​អាច​ប្រកប​ការងារ​ចិញ្ចឹម​ជីវភាព​បាន​ពេញ​លេញ​ដែរ។ ចំណែក​កុមារ​ទៀត​សោត បើ​កាល​ណា​មាន​ជំងឺ ក៏​មិន​អាច​ទៅ​រៀន​បាន​ពេញ​លេញ និង​មាន​បញ្ញា​ស្មារតី​ល្អ​ដែរ។

លោក ម៉ម ប៊ុនហេង៖ «សូម​ឱ្យ​បង​ប្អូន​ធ្វើ​អនាម័យ ទទួល​ទាន​ទឹក​ស្អាត។ បើ​បង​ប្អូន​មិន​បាន​ប្រើប្រាស់​ទឹក​ស្អាត ក៏​សុំ​ឱ្យ​បង​ប្អូន​ខិតខំ​ធ្វើ​យ៉ាង​ម៉េច ដាំ​ទឹក​ឱ្យ​ឆ្អិន​ពិសារ ហើយ​សុំ​ឱ្យ​បង​ប្អូន​ឧស្សាហ៍​លាង​ដៃ​នឹង​សាប៊ូ ឱ្យ​បាន​ញឹកញាប់ មុន​ទទួល​ទាន​អាហារ បន្ទាប់​មក​ក្រោយ​បន្ទោរ​បង់ ត្រូវ​លាង​ដៃ​នឹង​សាប៊ូ បើ​អត់​សាប៊ូ លាង​នឹង​ផេះ។ សាប៊ូ​នេះ​អាច​កាត់​បន្ថយ​ជំងឺ​ច្រើន​ណាស់ ជំងឺ​ផ្ដាសាយ ជំងឺ​រាគ​រូស»

លោក​រដ្ឋមន្ត្រី​ក្រសួង​សុខាភិបាល បាន​បញ្ជាក់​ថា ពេល​បច្ចុប្បន្ន​នេះ ដោយ​អនុវត្ត​ទៅ​តាម​យុទ្ធសាស្ត្រ​ចតុកោណ​ជំហាន​ទី២ របស់​រដ្ឋាភិបាល និង​ផែន​ការ​យុទ្ធសាស្ត្រ​សុខាភិបាល​ជាតិ គឺ​បាន​កាត់​បន្ថយ​អត្រា​ស្លាប់​របស់​មាតា និង​ទារក​បាន​ច្រើន និង​ឈាន​ទៅ​ដល់​ការ​សម្រេច​នៃ​គោលដៅ​សហស្សវត្ស។ ក៏ប៉ុន្តែ ទោះ​យ៉ាង​ណា ក៏​ក្រសួង​សុខាភិបាល​ខិតខំ​បន្ត​ទៀត ដើម្បី​ឱ្យ​អត្រា​ស្លាប់​របស់​មាតា និង​ទារក បាន​ថយ​ចុះ​ជា​អតិបរិមា។

តួលេខ​ក្នុង​ឆ្នាំ​២០១០ កន្លង​ទៅ បង្ហាញ​ថា នៅ​ក្នុង​ប្រទេស​កម្ពុជា អត្រា​ស្លាប់​របស់​មាតា និង​ទារក បាន​ថយ​ចុះ​មក​ត្រឹម ២០៦​នាក់​ក្នុង​ចំណោម ១០​ម៉ឺន​កំណើត។

លោក ហ៊្វ្លីន ហ៊្វូលើ (Flyn Fuller) នាយក​បេសកកម្ម​នៃ​ទីភ្នាក់ងារ​សហរដ្ឋ​អាមេរិក ដើម្បី​ការ​អភិវឌ្ឍ​អន្តរជាតិ (USAID = យូ.អេស.អេ.អាយ.ឌី) ប្រចាំ​នៅ​កម្ពុជា ធ្លាប់​បាន​មាន​ប្រសាសន៍​កាល​ពី​ដើម​ខែ​ធ្នូ នៅ​មុន​ពេល​ដែល​លោក​ចូល​និវត្តន៍​ថា យូ.អេស.អេ.អាយ.ឌី បាន​ធ្វើ​ការងារ​យ៉ាង​ជិតស្និទ្ធ​ជាមួយ​ក្រសួង​សុខាភិបាល និង​ជាមួយ​អភិបាល អភិបាល​ខេត្ត​រង​នានា ដើម្បី​ធានា​ឱ្យ​បាន​ថា យុទ្ធសាស្ត្រ​កម្ពុជា នៅ​ក្នុង​ការ​ថែទាំ​សុខភាព​មាតា និង​ទារក ត្រូវ​បាន​អនុវត្តន៍​យ៉ាង​យក​ចិត្ត​ទុក​ដាក់។ យើង​បាន​គាំទ្រ​ដល់​ស្ត្រី​កម្ពុជា ដោយ​ធានា​ឱ្យ​បាន​ថា ឱ្យ​ពួក​គេ​ទទួល​បាន​សេវា​ផែនការ​គ្រួសារ និង​សេវា​សុខភាព​ប្រកប​ដោយ​គុណភាព។

លោក ហ៊្វ្លីន ហ៊្វូលើ៖ «ទីភ្នាក់ងារ​សហរដ្ឋ​អាមេរិក ដើម្បី​ការ​អភិវឌ្ឍ​អន្តរជាតិ និង​ដៃគូ​របស់​យើង បាន​ប្រឹងប្រែង​ធ្វើ​ការ​ជាច្រើន​ឆ្នាំ ដើម្បី​លើក​កម្ពស់​ជីវិត​ប្រជាពលរដ្ឋ​កម្ពុជា។ យើង​បាន​ឧបត្ថម្ភ​គាំទ្រ​ដល់​កម្មវិធី​អប់រំ​ជាច្រើន។ យើង​បាន​វិនិយោគ​នៅ​ក្នុង​កិច្ច​ខិតខំ​ប្រឹងប្រែង​លើក​កម្ពស់​វិស័យ​កសិកម្ម។ យើង​បាន​ជួយ​ផ្ដល់​នូវ​អនាម័យ និង​ទឹក​ស្អាត ដើម្បី​ប្រយុទ្ធ​ប្រឆាំង​នឹង​ជំងឺ​នានា»

លោក ហ៊្វ្លីន ហ៊្វូលើ បាន​ចាត់​ទុក​ថា នេះ​គឺ​ជា​ការងារ​ជួរ​មុខ​មួយ​នៅ​ក្នុង​ចំណោម​ការងារ​ជាច្រើន​ទៀត​នៃ​ការ​ប្រយុទ្ធ​ប្រឆាំង​នឹង​ជំងឺ​របស់​កម្ពុជា។ មន្ត្រី​ដដែល​បាន​បញ្ជាក់​ថា សុខភាព​គឺ​ជា​តម្រូវ​ការ​ចាំបាច់​បំផុត​សម្រាប់​មនុស្ស​គ្រប់​រូប ហើយ​ក៏​គ្មាន​អ្វី​ដែល​ប្រសើរ​ជាង​ការ​រួម​គ្នា​ដើម្បី​លើក​កម្ពស់​សុខភាព​នោះ​ទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល