ការបញ្ជាក់ជំហរនេះគឺបានធ្វើឡើងបន្ទាប់ពីព្រះមហាក្សត្រខ្មែរបានឆ្លើយតបចំពោះគណបក្សប្រឆាំងដោយយោងតាមក្រុមប្រឹក្សាធម្មនុញ្ញការប្រជុំសភាដំបូងមិនដែលធ្វើដោយឡែកឡើយ។
នៅក្នុងព្រះរាជសារថតចម្លងមួយដែលវិទ្យុអាស៊ីសេរីទទួលបាននៅថ្ងៃនេះ ព្រះមហាក្សត្រខ្មែរ ព្រះបាទ សម្តេចព្រះបរមនាថ នរោត្តម សីហមុនី បានឆ្លើយតបជាមួយនឹងសារលិខិតរបស់មេដឹកនាំគណបក្សប្រឆាំង គឺលោក សម រង្ស៊ី ដោយបានភ្ជាប់ផងដែរនូវលិខិតបំភ្លឺរបស់ក្រុមប្រឹក្សាធម្មនុញ្ញដែលបញ្ជាក់ថា យោងតាមរដ្ឋធម្មនុញ្ញ និងទម្លាប់ព្រះមហាវីរក្សត្រ ព្រះបាទ នរោត្តម សីហនុ ព្រះអង្គឲ្យសមាជិករដ្ឋសភាធ្វើសច្ចាប្រណិធានទាំងអស់គ្នាតែម្តងឥតមានការបែងចែងឡើយ។
ប៉ុន្តែលោក សុន ឆ័យ អ្នកតំណាងរាស្រ្តគណបក្សប្រឆាំងបានមានប្រសាសន៍ប្រាប់វិទ្យុអាស៊ីសេរីថា សេចក្តីស្នើនេះគឺជាការតវ៉ាអហិង្សាមួយដែលជាទឹកចិត្តរបស់អ្នកដែលបោះឆ្នោតគាំទ្រគណបក្សសមរង្ស៊ី និងអ្នកដែលត្រូគេលុបឈ្មោះចេញពីបញ្ជីបោះឆ្នោត។
លោក សុន ឆ័យ បានមានប្រសាសន៍ថា ៖ «យើងយល់ថាវាជាការមិនអាចទទួលយកបាន ហើយវាក៏ជាការទាមទាររបស់ពលរដ្ឋជាច្រើនលាននាក់ដែរ ទាំងពលរដ្ឋដែលមិនបានបោះឆ្នោតឲ្យគណបក្សសមង្ស៊ីជាង១លាននាក់ និងពលរដ្ឋដែលត្រូវគេបំបាត់សិទ្ធិបោះឆ្នោតជាង១លាននាក់ និងពលរដ្ឋដទៃទៀតដែលទទួលរងការបំបាត់សន្លឹកឆ្នោតអីជាដើម»។
ប៉ុន្តែទោះជាយ៉ាងណាក៏ដោយមន្រ្តីគណបក្សប្រជាជនកម្ពុជា លោក ខៀវ កាញារីទ្ធ បានមានប្រសាសន៍ថាការចង់ប្រជុំសភាលើកដំបូង និងការស្បថចូលកាន់តំណែងផ្សេងគ្នារបស់គណបក្សប្រឆាំងនោះ គឺជានយោបាយមួយមិនល្អឡើយ។
លោក ខៀវ កាញារីទ្ធ បានឲ្យដឹងថា ៖ «អ៊ីចឹងមិនមែនថា សភាលោក សម រង្ស៊ី ផ្សេង សភានេះផ្សេងទេ។ បើសភាសមរង្ស៊ីចង់ស្បថផ្សេង... និយាយច្បាប់គឺអ៊ីចេះ ដល់ពេលប្រជុំ គាត់ទៅប្រជុំផ្សេងទៅ គាត់រកកន្លែងនៅវត្តភ្នំអីប្រជុំទៅ ប្រជុំគ្នាគាត់ទៅ»។
គួរបញ្ជាក់ថាតាមលទ្ធផលបោះឆ្នោតនាថ្ងៃទី២៧ កក្កដាកន្លងមកនេះ គេឃើញគណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន បានទទួលជ័យជម្នះដ៏ធំធេងរហូតដល់៩០អាសនៈក្នុងរដ្ឋសភាដែលមាន១២៣។ គណបក្សសមរង្ស៊ី បាន២៦អាសនៈ គណបក្សសិទ្ធិមនុស្ស បានទទួល៣អាសនៈ គណបក្សហ៊្វុនស៊ិនប៉ិច បានទទួល២អាសនៈ និងគណបក្ស នរោត្តម រណឫទ្ធិ បានទទួល២អាសនៈ។
នៅពេលនេះគណបក្សដែលមិនបានទទួលអាសនៈច្រើន ជាពិសេគឺគណបក្សសមរង្ស៊ី និងគណបក្សសិទ្ធិមនុស្ស បានបន្តការប្រឆាំងនឹងលទ្ធផលបោះឆ្នោតដោយបានចោទប្រកាន់ថា ការបោះឆ្នោតកន្លងទៅនោះមិនមានភាពសេរីយុត្តិធម៌ឡើយ ហើយមេដឹកនាំគណបក្សទាំងពីរក៏កំពុងតែធ្វើយុទ្ធនាការនៅក្រៅប្រទេស ដើម្បីឲ្យមានការដឹងឮពីសហគមន៍អន្តរជាតិពីបញ្ហាអាក្រក់នេះ៕