លទ្ធផលនៃសវនាការដែលរៀបចំដោយគណៈកម្មការរៀបចំការបោះឆ្នោតខេត្តកំពត កាលពីព្រឹកថ្ងៃអង្គារ ទី៨ ខែកក្កដា ឆ្នាំ២០០៨នេះ ស្ដីពីករណីពាក្យបណ្ដឹងរបស់អគ្គលេខាធិការរងគណបក្ស សមរង្ស៊ី លោកស្រី មូរ សុខហួរ ដែលប្ដឹងចំពោះអគ្គលេខាធិការរងសាលាខេត្តកំពត និងជាប្រធានច្រកទ្វារព្រំដែនកម្ពុជា-វៀតណាម តន់ហន់ លោក សាន ស្មាន់ ពីបទរំលោភច្បាប់បោះឆ្នោតត្រូវបានប្រកាសភ្លាមៗដោយប្រធានគណៈកម្មការរៀបចំការបោះឆ្នោតខេត្តកំពត និងជាប្រធានក្រុមប្រឹក្សាជំនុំជម្រះ លោក តែ ជិនណារិទ្ធ ។
លោក តែ ជិនណារិទ្ធ បានប្រកាសថា ៖ «ចំណុច៧.៤.១ ៧.៤.២ ស្ដីអំពីការប្រើប្រាស់មធ្យោបាយដែលជាសម្បត្តិរបស់រដ្ឋដើម្បីធ្វើសកម្មភាពឃោសនាបោះឆ្នោតបម្រើគណបក្សនយោបាយណាមួយឬបេក្ខជនណាម្នាក់ ។ ក្រុមប្រឹក្សាជំនុំជំម្រះសម្រេច ព្រមានលោក សាន ស្មាន់ អគ្គលេខាធិការរងសាលាខេត្តកំពតប្រើប្រាស់រថយន្តស្លាកលេខ ខម ២២៨៥៤ នៅពេលយុទ្ធនាការឃោសនាបោះឆ្នោត ។ លោក សាន ស្មាន់ ត្រូវបញ្ចប់សកម្មភាពនេះជាបន្ទាន់ក្នុងករណីចចេសរឹងរូស និងបន្តសកម្មភាពនេះបន្តទៅទៀត ត្រូវរងពិន័យជាប្រាក់៥លានទៅ១០លានរៀល ព្រមទាំងដកសិទ្ធិបោះឆ្នោតរយៈពេល៥ឆ្នាំ ។ ក្នុងករណីភាគីទាំងសងខាងមិនពេញចិត្តនឹងសេចក្ដីសម្រេចនេះអាចបំពេញ១២០២ ប្ដឹងបន្តទៅគ.ជ.ប.ក្នុងរយៈពេល៣ថ្ងៃយ៉ាងយូរ» ។
ភ្លាមៗនោះដែរគណបក្សសមរង្ស៊ីបានបញ្ចេញប្រតិកម្មដោយលោកស្រី មូរ សុខហួរ បានសម្ដែងនូវការមិនពេញចិត្តចំពោះសេចក្ដីសម្រេចនៃអង្គសវនាការ ។
លោកស្រី មូរ សុខហួរ បានមានប្រសាសន៍ថា ៖ «គណបក្សសមរង្ស៊ីមានគម្រោងនឹងធ្វើសេចក្ដីថ្លែងការណ៍មួយស្ដីអំពីសេចក្ដីសម្រេចរបស់គណៈកម្មការរៀបចំការបោះឆ្នោតនៅខេត្តកំពត ដោយសារយើងយល់ឃើញថាការសម្រេចនេះមានភាពលម្អៀង» ។
ប្រធានមន្ទីរអប់រំខេត្តកំពតនិងជាតំណាងរបស់លោក សាន ស្មាន់ ក្នុងអង្គសវនាការ លោក ភូ តីកុក បានមានប្រសាសន៍ថាលោកនឹងបន្តចំណាត់ការចំពោះលោកស្រី មូរ សុខហួរ តាមប្រព័ន្ធតុលាការ ។
លោក ភូ តីកុក បានឲ្យដឹងថា ៖ «យើងខ្ញុំនឹងប្ដឹងទៅតុលាការទៀតជុំវិញបញ្ហាបំពានលើទ្រព្យសម្បត្តិឯកជន ហើយបញ្ហាមួយទៀតរំលោភលើសមត្ថកិច្ច» ។
អ្នកសម្របសម្រួលនៃគណៈកម្មាធិការខុមហ្វ្រែល ប្រចាំខេត្តកំពត និងក្រុងកែប អ្នកស្រី ទ្រី ឈួន បានមានប្រសាសន៍ថាអ្នកស្រីគាំទ្រនូវប្រតិកម្មរបស់គណបក្សប្រឆាំង ។
អ្នកស្រី ទ្រី ឈួន បានបញ្ជាក់ថា ៖ «ប្រសិនជាដឹងច្បាស់ហើយថាគណបក្សប្រជាជនបានល្មើសទៅនឹងចំណុចទាំងពីរហ្នឹងហើយ ហេតុអីក៏គេមិនអនុវត្តទៅតាមមាត្រា១៣១ ព្រោះក្នុង១៣១ហ្នឹងវាមានផាកពិន័យពី៥លានទៅ១០លាន ហើយនិងដកសិទ្ធិបោះឆ្នោតរយៈពេល៥ឆ្នាំ ?» ។
អញ្ជើញចូលរួមក្នុងអង្គសវនាការនេះមានមន្ត្រីសង្កេតការណ៍មកគណៈកម្មាធិការខុមហ្វ្រែល មន្ត្រីសង្កេតការណ៍មកពីសហភាពអឺរ៉ុប និងមន្ត្រីសង្កេតការណ៍មកពីអង្គការកែវភ្នែកយុត្តិធម៌ ៕