សុន ឆ័យ ប្រតិកម្មចំពោះលទ្ធផលនៃការចរចារវាងខ្មែរនិងថៃ
2008.07.22
លោក សុន ឆ័យ បានឲ្យដឹងថា ៖ «ដូចយើងស្មានអ៊ីចឹង អត់មានអីដែលនឹងចេញជាលទ្ធផល ។ វាអត់មានអីដែលត្រូវចរចាទាល់តែសោះ ក្នុងរឿងហេតុដែលកើតមានគឺប្រទេសថៃគេមកឈ្លានពានលើទឹកដីខ្មែរ ហើយគេដឹងច្បាស់ណាស់ថាដីហ្នឹងគឺជាដីខ្មែរ ក៏ប៉ុន្តែគេយកលេសយោងទៅលើសេចក្ដីថ្លែងការណ៍រួមរវាងឯកឧត្ដម សុខ អាន និងអតីតរដ្ឋមន្ត្រីការបរទេសគេ គេថាយើងទទួលស្គាល់អ្វីដែលគេទាមទារ ។ រួចយើងទៅចរចាជាមួយគេ គឺចរចាកាន់តែច្រើនបានន័យថាយើងទទួលស្គាល់ការទាមទាររបស់គេ ។ ដូច្នេះហើយបានជាក្រុមតំណាងរាស្ត្រឲ្យយោបល់ទៅរដ្ឋាភិបាលថាមិនត្រូវចរចាទេ ត្រូវតែថៃដកទ័ពចេញឲ្យអស់ ។ ហើយបើចង់ជជែកពីរឿងសុំសិទ្ធិឲ្យជនជាតិថៃមកទស្សនាប្រាសាទព្រះវិហារដោយឥតយកថ្លៃយ៉ាងណាយើងជួយសម្រួលឲ្យ» ។
លោកតំណាងរាស្ត្រ សុន ឆ័យ បានសម្តែងក្តីសង្ស័យចំពោះប្រសាសន៍របស់រដ្ឋមន្ត្រីក្រសួងព័ត៌មានកម្ពុជា គឺលោក ខៀវ កាញារីទ្ធ ដែលបានច្រានចោលនូវការសុំអន្តរាគមន៍របស់អង្គការសហប្រជាជាតិក្នុងការដោះស្រាយទំនាស់នេះ ។ ហើយលោកបានបន្ទោសរាជរដ្ឋាភិបាលខ្មែរថា មានការភ័យខ្លាចកិច្ចព្រមព្រៀងក្រុងប៉ារីស ដែលនឹងធ្វើការសើរើនូវកិច្ចព្រមព្រៀងព្រំដែនដែលរដ្ឋាភិបាលខ្មែរបានធ្វើជាមួយរដ្ឋាភិបាលវៀតណាម ។
លោក សុន ឆ័យ បានបញ្ជាក់ថា ៖ «យើងស្ដាយដែរឯកឧត្ដម ខៀវ កាញារីទ្ធ ឆ្លើយថាគ្រាន់តែឲ្យដំណឹងទេ មិនសុំឲ្យគេជួយទេ តើហេតុដូម្ដេច ? ខ្ញុំបារម្ភថាការដែលមិនឲ្យគេមកជួយនេះ គឺរដ្ឋាភិបាលបារម្ភអំពីកិច្ចព្រមព្រៀងទីក្រុងប៉ារីស ព្រោះកិច្ចព្រមព្រៀងទីក្រុងប៉ារីសនេះគឺធានាបូរណភាពទឹកដីយើងមិនមែនតែព្រះវិហារទេ គឺបូរណភាពទឹកដីយើងទាំងមូលតែម្ដង រួមទាំងព្រំដែនយើងជាមួយវៀតណាម ។ យើងក៏ដឹងដែរថាវៀតណាមបានយកដីយើងច្រើនណាស់ ហើយដីតំបន់ដាក់ដាំក៏បាត់បង់ ។ ហេតុដូច្នេះហើយដូចជារដ្ឋាភិបាលបារម្ភថាខ្លាចអង្គការសហប្រជាជាតិ គេមកដោះស្រាយរឿងព្រះវិហារនេះអាចនឹងធ្វើឲ្យយើងចំណេញដីនៅប៉ែកខាងកើតផង ម៉្លោះហើយបានជាមិនហ៊ានពីព្រោះខ្លួនបានធ្វើសន្ធិសញ្ញាបន្ថែមជាមួយនឹងវៀតណាមឲ្យដីទៅវៀតណាមអស់យ៉ាងច្រើនរួចជាស្រេចហើយ» ។
សូមជម្រាបជូនថាកាលពីថ្ងៃសុក្រ ទី១៨ ខែកក្កដាកន្លងមកនេះ តំណាងបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិ (អ.ស.ប.) បានសរសេរលិខិតមួយច្បាប់ជូនដំណឹងដល់ក្រុមប្រឹក្សាសន្តិសុខ អ.ស.ប. ស្តីពីការរំលោភឈ្លានពានរបស់ទ័ពថៃនៅក្នុងបូរណភាពដែនដីកម្ពុជា ។
លិខិតចុះថ្ងៃទី១៨ ខែកក្កដា ផ្ញើជូនលោក ឡេលឿងមិញ នៃប្រទេសវៀតណាម ដែលជាប្រធានក្រុមប្រឹក្សាសន្តិសុខអង្គការសហប្រជាជាតិប្រចាំខែកក្កដានេះ គឺដើម្បីផ្ញើជម្រាបជូនប្រទេសជាសមាជិកទាំងអស់ចំនួន១៥ប្រទេស ដើម្បីបានជ្រាបច្បាស់ពីព្រឹត្តិការណ៍និងពីភាពពិតប្រាកដនៃកន្លែងដែលជាទីកើតហេតុ ។
ក្នុងលិខិតដដែលនោះតំណាងបេសកកម្មអចិន្ត្រៃយ៍កម្ពុជាគឺលោកបណ្ឌិត ស៊ា កុសល មានប្រសាសន៍ថាប្រទេសថៃបានយកផែនទីដែលខ្លួនគូសជាឯកតោភាគី ដែលបង្ហាញថាវត្តកែវសិក្ខាគិរីស្វារៈ ឬវត្តប្រាសាទព្រះវិហារ ស្ថិតត្រង់ទីដែលគេហៅថាតំបន់ជាន់គ្នា ។
លិខិតនេះឲ្យដឹងថាតាមពិតទៅផែនទីអន្តរជាតិដែលតុលាការអន្តរជាតិក្រុងឡាអេបានប្រើប្រាស់ដោះស្រាយទំនាស់ស្តីពីប្រាសាទព្រះវិហារនៅឆ្នាំ១៩៦២នោះ គឺវត្តកែវសិក្ខាគិរីស្វារៈ ស្ថិតនៅយ៉ាងជ្រៅនៅក្នុងទឹកដីកម្ពុជា ៕