ការថ្លែងរបស់មន្ត្រីខ្មែរនេះគឺបានធ្វើឡើងបន្ទាប់ពីក្រុមអ្នកធ្វើគោលនយោបាយរបស់សហរដ្ឋអាមេរិកដែលរួមមានទាំងលោក Joseph Mussomeli ជាឯកអគ្គរដ្ឋទូតអាមេរិកប្រចាំប្រទេសកម្ពុជាទើបបញ្ចប់អាណត្តិថ្មីៗ បានថ្លែងឲ្យរដ្ឋការអាមេរិកយកចិត្តទុកដាក់ឃ្លាំមើលលំហូរចំណាយថវិការបស់ប្រទេសមជ្ឈិមបូព៌ានៅកម្ពុជា។
សូមជម្រាបថា លោក Joseph Mussomeli បានថ្លែងយ៉ាងដូច្នេះគឺនៅបន្ទាប់ពីគណៈប្រតិភូនៃប្រទេសគូវ៉េត និងប្រទេសកាតា បានសន្យាផ្តល់ប្រាក់កម្ចីចំនួន៧០០លានដុល្លារអាមេរិកដល់កម្ពុជា ដើម្បីកសាងហេដ្ឋារចនាសម្ព័ន្ធក្នុងគម្រោងអភិវឌ្ឍន៍វិស័យកសិកម្ម ហើយសេចក្តីថ្លែងនេះត្រូវបានដកស្រង់ផ្សាយក្នុងព្រឹត្តិបត្រព័ត៌មានបរទេសមួយឈ្មោះថា World Politics Review នាដើមខែតុលានេះ។
រដ្ឋលេខាធិការក្រសួងការងារនិងជាប្រធានអង្គការមូលនិធិអភិវឌ្ឍន៍ម៉ូស្លីមកម្ពុជា គឺលោក ឧស្មាន ហាសាន់ បានថ្លែងយ៉ាងដូច្នេះថា ៖ «មិនមែនតែសហរដ្ឋអាមេរិកឬបណ្ដាបរទេសហ្នឹងគាត់ព្រួយបារម្ភទេ គឺក្នុងនាមប្រមុខរាជរដ្ឋាភិបាលក្នុងនាមបងប្អូនសាសនាអ៊ិស្លាមផ្ទាល់ហ្នឹងក៏គាត់ត្រូវតែគិតដែរ។ បើសិនជាវាកើតមានរឿងរ៉ាវអសន្តិសុខទៅ វាកើតជាបញ្ហានេះជាបញ្ហានោះទៅ គឺធ្វើឲ្យការរស់នៅរបស់ប្រជាពលរដ្ឋហ្នឹងវាលែងកក់ក្ដៅ»។
ចំណែកឯលោកឧត្តមសេនីយ៍ ខៀវ សុភ័គ ជាមន្ត្រីនាំពាក្យក្រសួងមហាផ្ទៃក៏ថ្លែងស្របជាមួយនឹងលោក ឧស្មាន ហាសាន់ ហើយក៏បានថ្លែងគូសបញ្ជាក់អំពីកិច្ចសហប្រតិបត្តិការរបស់កម្ពុជាក្នុងការទប់ស្កាត់អំពើភេរវកម្មយ៉ាងដូច្នេះថា ៖ «បងប្អូនខ្មែរអ៊ិស្លាមរបស់យើងនេះគឺមិនមែនជាខ្មែរអ៊ិស្លាមជ្រុលទេ ហើយរាជរដ្ឋាភិបាលកម្ពុជាលោកបានចូលរួមស្ទើរតែគ្រប់វេទិកាទាំងអស់ ទាំងនយោបាយក្ដី... ទាំងក្នុងតំបន់ ទាំងក្នុងក្របខ័ណ្ឌពិភពលោក»។
សូមជម្រាបថា ថ្មីៗនេះប្រមុខរដ្ឋាភិបាលខ្មែរគឺលោក ហ៊ុន សែន បានប្រកាសគោលនយោបាយបើកទូលាយឲ្យខ្មែរអ៊ិស្លាមនៅកម្ពុជាមានសិទ្ធិប្រតិបត្តិប្រពៃណីជំនឿសាសានារបស់ខ្លួន ដែលក្នុងនោះមានរួមទាំងបង្កើតបន្ទប់ថ្វាយបង្គំនៅតាមព្រលានយន្តហោះ បង្កើតកម្មវិធីវិទ្យុដែលផ្សាយអំពីចាម និងអនុញ្ញាតឲ្យសិស្សចាមស្រីប្រុសស្លៀកសម្លៀកបំពាក់ប្រពៃណីរបស់ខ្លួននៅក្នុងសាលារៀនសាធារណៈផងដែរ។
លោកនាយករដ្ឋមន្ត្រី ហ៊ុន សែន ក៏បានប្រកាសគ្រោងធ្វើដំណើរទៅប្រទេសមជ្ឈិមបូព៌ាមួយចំនួននៅដើមឆ្នាំក្រោយនេះ ហើយក៏គ្រោងបើកស្ថានទូតខ្មែរនៅទីនោះផងដែរ។
ទោះបីជាយ៉ាងណាក៏ដោយក្រុមអ្នកធ្វើគោលនយោបាយរបស់សហរដ្ឋអាមេរិកដែលរួមមានទាំងនាយក FBI គឺលោក Robert Mueller ផងនោះ នៅថ្លែងព្រួយបារម្ភថា ក្រុមភេរវករអាចប្រើប្រាស់កម្ពុជាជាចំណុចឆ្លងកាត់ដើម្បីបើកប្រតិបតិ្តការវាយប្រហារដោយសារតែកម្ពុជានៅខ្សោយទាំងច្បាប់និងសមត្ថភាពគ្រប់គ្រងសន្តិសុខ៕