ចលនាប្រជាធិបតេយ្យសង្គ្រោះជាតិ ស្នើអន្តរជាតិឲ្យជួយកែទម្រង់ គ.ជ.ប
h072812zr.mp3
ការធ្វើលិខិតអំពាវនាវនេះ នៅក្រោយពេលរដ្ឋាភិបាលបានប្រកាសជាសាធារណៈថា រដ្ឋាភិបាលកម្ពុជាមិនទទួលយកគំនាបណាមួយពីសហគមន៍អន្តរជាតិ ដើម្បីឲ្យលោក សម រង្ស៊ី វិលចូលស្រុកវិញនោះទេ។
អនុប្រធានចលនាប្រជាធិបតេយ្យសង្គ្រោះជាតិ និងជាប្រធានគណបក្ស សិទ្ធិមនុស្ស បានឲ្យដឹងនៅថ្ងៃទី២៨ កក្កដា ថា ចលនាប្រជាធិបតេយ្យសង្គ្រោះជាតិ ចង់ឲ្យមានការបោះឆ្នោតជាតិនៅឆ្នាំ២០១៣ ខាងមុខ ប្រកបដោយប្រជាធិបតេយ្យ សេរី និងត្រឹមត្រូវ។
លោក កឹម សុខា ជាអនុប្រធានចលនាប្រជាធិបតេយ្យសង្គ្រោះជាតិ និងជាប្រធានគណបក្ស សិទ្ធិមនុស្ស ដែលបានរួបរួមជាមួយគណបក្ស សម រង្ស៊ី កាលពីថ្ងៃទី១៧ កក្កដា នោះ មានប្រសាសន៍ថា គណបក្សប្រឆាំង ពោលគឺចលនាប្រជាធិបតេយ្យសង្គ្រោះជាតិ ដែលមានលោក សម រង្ស៊ី ជាប្រធាន បានធ្វើលិខិតផ្ញើទៅសហគមន៍អន្តរជាតិ ពិសេសទៅប្រទេសមួយចំនួនទៀត ដូចជាសហរដ្ឋអាមេរិក ជាដើម ដើម្បីឲ្យមានការកែទម្រង់គណៈកម្មាធិការជាតិរៀបចំការបោះឆ្នោត (គ.ជ.ប) ឡើងវិញ ដើម្បីឲ្យស្ថាប័នមួយនេះក្លាយជាស្ថាប័នឯករាជ្យ។
លោក កឹម សុខា៖ «អ្នកឈ្នះក៏ត្រូវតែឈ្នះដោយកិត្តិយស អ្នកចាញ់ ចាញ់ដោយអស់ចិត្ត អីចឹងការបោះឆ្នោតប្រកបដោយសេរី ត្រឹមត្រូវ គឺផ្ដើមចេញពីនីតិវិធីនៃការបោះឆ្នោតហ្នឹង ក្នុងនោះដែរ យើងចង់ឲ្យប្រព័ន្ធផ្សព្វផ្សាយប្រកបដោយសមធម៌ គ្រប់គណបក្សនយោបាយទាំងអស់ចូលរួមបាន»។
នៅក្នុងលិខិតរបស់ចលនាប្រជាធិបតេយ្យសង្គ្រោះជាតិ ចេញផ្សាយនៅថ្ងៃទី២៨ កក្កដា បានសរសេរដោយអំពាវនាវចំនួនពីរចំណុចសំខាន់ៗ គឺទី១ ទាមទារដាច់ខាតឲ្យមានការផ្លាស់ប្ដូរសមាសភាពគណៈកម្មាធិការជាតិរៀបចំការបោះឆ្នោត។ ហើយឲ្យស្ថាប័នមួយនេះមិនត្រូវស្ថិតនៅក្រោមការគ្រប់គ្រងរបស់គណបក្សប្រជាជនកម្ពុជា។
ទី២ មេដឹកនាំគណបក្ស សម រង្ស៊ី និងជាប្រធានចលនាប្រជាធិបតេយ្យសង្គ្រោះជាតិ លោក សម រង្ស៊ី ដែលកំពុងរស់នៅឯបរទេស ស្ថិតនៅក្នុងការតាមចាប់ខ្លួនដាក់គុករបស់តុលាការកម្ពុជានោះ ត្រូវតែវិលចូលមកប្រកួតប្រជែងបោះឆ្នោត ដោយគ្មានការចាប់ខ្លួន។ បើមិនដូច្នោះទេ គ្មានការបោះឆ្នោតពិតប្រាកដទេ គ្មានការចូលរួមពីមេដឹកនាំគណបក្សប្រឆាំងនោះ។
ការទាមទារឲ្យមានការផ្លាស់ប្ដូរសមភាព គ.ជ.ប ទៅសហគមន៍អន្តរជាតិនេះ នៅក្រោយពេលមន្ត្រីជាន់ខ្ពស់រដ្ឋាភិបាលបានប្រកាសថា រដ្ឋាភិបាលកម្ពុជាមិនទទួលយកគំនាបណាមួយពីសហគមន៍អន្តរជាតិ ដើម្បីឲ្យលោក សម រង្ស៊ី ចូលស្រុកវិញនោះឡើយ។
លោក កែវ រ៉េមី ជាប្រធានក្រុមអ្នកនាំពាក្យអង្គភាពព័ត៌មានប្រតិកម្មរហ័ស នៃទីស្ដីការគណៈរដ្ឋមន្ត្រី លោកមានប្រសាសន៍នៅក្នុងសន្និសីទកាសែត កាលពីថ្ងៃទី២៥ កក្កដា ថា គណបក្សប្រឆាំងតែងតែទាមទារឲ្យមានការផ្លាស់ប្ដូរសមាសភាព គ.ជ.ប កន្លងមក។
លោក កែវ រ៉េមី បានអះអាងថា គណបក្សប្រឆាំង បានទាមទារឲ្យមានការផ្លាស់ប្ដូរនេះ ដោយសារតែការបោះឆ្នោតជាច្រើនលើក គណបក្សប្រឆាំងមិនអាចឈ្នះគណបក្សកាន់អំណាច៖ «គ.ជ.ប ខ្ញុំធ្លាប់នៅតំណាងរាស្ត្រ ខ្ញុំក៏ធ្លាប់ធ្វើវិសោធនកម្មច្បាប់ដែរ។ ចរន្តក៏នៅវិលទៅវិលមកដដែល មុនដំបូង សមភាព គ.ជ.ប សុំសមាសភាពអត់មានពាក់ព័ន្ធនយោបាយទេ NGOs សុទ្ធ ដល់ក្រោយមកសុំដូរឲ្យមានតំណាងគណបក្សនយោបាយនៅក្នុងហ្នឹង។ សមាសភាពគណបក្ស សម រង្ស៊ី ក៏នៅក្នុងហ្នឹងដែរ ដល់នៅតែមិនឈ្នះ ឥឡូវគាត់ទាមទារដូរទៀតហើយ»។
ទោះបីជាយ៉ាងនេះក៏ដោយ លោក កឹម សុខា បានបញ្ជាក់ថា នៅពេលបោះឆ្នោតជាតិ នៅថ្ងៃទី២៨ ខែកក្កដា ឆ្នាំ២០១៣ ខាងមុខ បើមិនមានការផ្លាស់ប្ដូរសមាសភាព គ.ជ.ប ទេនោះ គណបក្សប្រឆាំងទាំងពីរ ដែលបានរួបរួមគ្នានោះនឹងមិនចូលរួមការបោះឆ្នោតនោះទេ។
ភ្ជាប់ទៅនឹងបញ្ហានេះ ក្រុមមន្ត្រីឃ្លាំមើលការបោះឆ្នោតនៅកម្ពុជា បានលើកឡើងថា ស្ថាប័ន គ.ជ.ប ជាស្ថាប័នមិនឯករាជ្យ លំអៀងទៅគណបក្សកាន់អំណាច ដែលធ្វើឲ្យប៉ះពាល់ដល់ដំណើរការបោះឆ្នោតដោយសេរី ត្រឹមត្រូវ និងយុត្តិធម៌។
សភាអឺរ៉ុបបានចេញសេចក្ដីសម្រេច កាលពីថ្ងៃទី២១ ខែតុលា ឆ្នាំ២០១០ បានថ្កោលទោសចំពោះតុលាការកម្ពុជា បានកាត់ទោសលោក សម រង្ស៊ី នោះថា គឺជារឿងនយោបាយ។ បញ្ហានេះ វាធ្វើឲ្យប៉ះពាល់ដល់ដំណើរការនៃការបោះឆ្នោត ពីព្រោះថា យុទ្ធសាស្ត្រនៃគណបក្សកាន់អំណាច គឺប្រើប្រាស់ប្រព័ន្ធយុត្តិធម៌ ដើម្បីដាក់គំនាបអ្នករិះគន់រដ្ឋាភិបាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កូនខ្មែរ
ពី ហូជីមីញរឿងបោះឆ្នោតនៅស្រុកខ្មែរ បើធ្វើអោយសមធម៌មានតែគណបក្ស ប្រជាជនអត់ជាប់ឆ្នោត ។ ប៉ុន្តែបើ CPP ពិតជាខ្លាំង សូមផ្តល់ សិទ្ធអោយគណបក្សប្រឆាំងមានវិទ្យុ និងទូរទស្សន៍ដែរទៅ នោះពិតជាយើងអាចរកអ្នកខ្លាំងពូកែពិត ប្រាកដបានហើយ។
Jul 31, 2012 10:37 AM
អ្នកអានអនាមិក
បើកែទំរង់គជបតើដាក់សមាសភាពមកពីណា ? ទោះបីជាព្រះឥន្ទ្រអ្នករៀបចំឱយក៏ដោយ បើឯកឧត្តម
សម-រង្ស៊ី មិនបានឈ្នះឆ្នោតធ្វើជានាយករដ្ឋមន្ត្រីនោះនៅតែមិនយុត្តិធម៌ មិនប្រជាធិបតេយ្យពិតប្រាកដ
ដដែលជាដដែលហ្នឹង ...!!!
Jul 30, 2012 05:17 AM
Youn
ពី Newyorkគ្មានចិនងណាមកឲហ៊ុនសែន ចូលស្រុកទេ ។ សមរង្ស៊ី គង់តែចូលមក ប៉ុន្តែត្រូវចាំ ពេលជិតបោះឆ្នោត ។ នយោបាយរបស់ហ៊ុនសេន គឺឃ្លាតឆ្ងាយ ណាយចិត្ត បណ្តឹងតុលាការ កសាងហេដ្ធារចនាសម្ព័ន្ធ ផ្សព្វផ្សាយឃោសនាតាមទូរទស្សន៏ ដើម្បីបន្សាបបក្សប្រឆាំង ។
Jul 29, 2012 04:03 PM
Mansot
ពី Phnom Penhin the name of good leader we should do the thing balance.
Jul 29, 2012 03:39 AM
អ្នកអានអនាមិក
លោក ហ៊ុន សែន ធ្លាប់បានមានប្រសាសន៍ថា គេមិន ត្រូវធ្វើជាអ្នកទាត់បាល់ផង ហើយធ្វើអាជ្ញាកណ្តាល ផងបានទេ។ ចុះឥឡូវ គណៈកម្មាធិការរៀបចំការបោះឆ្នោត ត្រូវបានជ្រើសតាំងដោយគណៈបក្សប្រជាជន និងពីក្នុង គណៈបក្សប្រជាជន។ ឯណាទៅអព្យាក្រិតនោះ? ។ លោក កែវ រ៉េមី ក៏ធ្លាប់តវ៉ាដែរ កាលពីគាត់នៅក្នុងគណៈបក្សសមរង្ស៊ី នោះ។ ដល់ឥឡូវនេះគាត់និយាយអញ្ចឹងហើយ គ្មានអីប្លែកទេ!!!!!!!!!!!!!៕
Jul 28, 2012 08:09 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
