បក្សប្រឆាំងស្នើក្រសួងមហាផ្ទៃទប់ស្កាត់សកម្មភាពរត់ការធ្វើអត្តសញ្ញាណប័ណ្ណ
h080212ay.mp3
សមាជិកសភាគណបក្ស សិទ្ធិមនុស្ស លោក អ៊ូ ចន្ទឫទ្ធិ មានប្រសាសន៍ថា លោកធ្លាប់បានស្នើសុំអន្តរាគមន៍ពីថ្នាក់ដឹកនាំក្រសួងមហាផ្ទៃ ឲ្យអង្កេតចំពោះសកម្មភាពរត់ការផ្តល់អត្តសញ្ញាណប័ណ្ណជូនជនជាតិវៀតណាម ផ្ដើមដោយប៉ូលិសមូលដ្ឋានច្រើនលើកមកហើយ ប៉ុន្តែគ្មានការឆ្លើយតប។
លោកបន្តថា សព្វថ្ងៃនេះ មន្ត្រីប៉ូលិសតាមប៉ុស្តិ៍រដ្ឋបាល តាមឃុំ-សង្កាត់មួយចំនួន ពិសេសប៉ូលិសតាមប៉ុស្តិ៍ ក្នុងរាជធានីភ្នំពេញ មានសកម្មភាពរត់ការធ្វើអត្តសញ្ញាណប័ណ្ណជូនជនជាតិវៀតណាម ជាថ្នូរទទួលបានប្រាក់ចន្លោះពី ៥០ទៅជាង១០០ដុល្លារ។
លោក អ៊ូ ចន្ទឫទ្ធិ៖ «ការចេញអត្តសញ្ញាណប័ណ្ណជូនជនជាតិយួន អ្នកដែលមករស់នៅក្នុងប្រទេសកម្ពុជា ដោយខុសច្បាប់ ជាទង្វើមួយប៉ះពាល់ដល់ផលប្រយោជន៍ជាតិធំបំផុត។ ជាទង្វើមួយខុសឆ្គងធំណាស់ ចំពោះជនណាដែលចេញអត្តសញ្ញាណប័ណ្ណជូនជនបរទេស ដែលមិនមែនជាជនជាតិខ្មែរ គឺបាននាំឲ្យប៉ះពាល់ដល់ផលប្រយោជន៍ខ្មែរនៅថ្ងៃមុខ។ ព្រោះថា ពេលណាគេមានអត្តសញ្ញាណប័ណ្ណសញ្ជាតិខ្មែរ គេអាចចុះឈ្មោះបោះឆ្នោត ហើយថ្ងៃក្រោយគេអាចបោះឆ្នោតសម្រេចចិត្ត សម្រេចជោគវាសនាជូនឲ្យម្ចាស់ប្រទេស ដែលជាគ្រោះថ្នាក់មួយ។ ខ្ញុំសុំប្រឆាំងចំពោះទង្វើអំពើពុករលួយ ដែលកើតមានក្នុងពេលបច្ចុប្បន្ននេះ»។
លោកស្នើឲ្យលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ស៊ើបអង្កេត និងទប់ស្កាត់សកម្មភាពរត់ការធ្វើអត្តសញ្ញាណប័ណ្ណជូនជាតិវៀតណាមខុសច្បាប់ របស់មន្ត្រីប៉ូលិសឲ្យមានប្រសិទ្ធភាព។ ព្រោះថា សកម្មភាពនេះ ឃើញបន្តកើតមានជាច្រើនករណី ពិសេសក្នុងរាជធានីភ្នំពេញ ទោះបីជនបរទេសទាំងនោះមិនចេះនិយាយភាសាខ្មែរផងនោះ។
ចំណែកលោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី ក៏បានឲ្យដឹងថា សកម្មភាពរត់ការធ្វើអត្តសញ្ញាណប័ណ្ណ ជូនជនជាតិវៀតណាម មានរូបភាពធ្ងន់ធ្ងរ។
លោកថ្កោលទោសចំពោះសកម្មភាពធ្វើអត្តសញ្ញាណប័ណ្ណ ផ្តល់ជូនជនបរទេស ពិសេសជនជាតិវៀតណាម របស់សមត្ថកិច្ចមូលដ្ឋាន ដែលកំពុងធ្វើសកម្មភាពរាល់ថ្ងៃនេះ។
លោក យឹម សុវណ្ណ បានជំរុញឲ្យក្រសួងមហាផ្ទៃ និងផ្នែកពាក់ព័ន្ធ មានវិធានការទប់ស្កាត់សកម្មភាពផ្តល់អត្តសញ្ញាណប័ណ្ណរបស់មន្ត្រីប៉ូលិសក្រោមឱវាទ ព្រោះបារម្ភខ្លាចកើតមានបញ្ហាធ្ងន់ធ្ងរនាថ្ងៃអនាគត។
លោក យឹម សុវណ្ណ៖ «ជាអំពើពុករលួយ ដែលបានផ្តល់អត្តសញ្ញាណប័ណ្ណឲ្យជនជាតិដទៃ ដោយខុសច្បាប់ ហើយប៉ះពាល់ដល់ផលប្រយោជន៍ជាតិធ្ងន់ធ្ងរ ជាបញ្ហាត្រូវដោះស្រាយ។ បញ្ហានេះ គឺចលនាប្រជាធិបតេយ្យដើម្បីសង្គ្រោះជាតិ ចាត់ទុកជាបញ្ហាគ្រោះថ្នាក់ចំពោះប្រទេសជាតិ ហើយប្រឆាំងដាច់ខាត មិនត្រូវធ្វើទង្វើខុសច្បាប់ អនុញ្ញាតិឲ្យជនបរទេសខុសច្បាប់ចូលមករស់នៅក្នុងប្រទេសកម្ពុជាយើងនេះទេ។ វាជាអំពើអនាធិបតេយ្យ ដែលត្រូវប្រឆាំងដាច់ខាត ហើយមន្ត្រីដែលបានពាក់ព័ន្ធនៅក្នុងបញ្ហានេះ ត្រូវតែទទួលទោសតាមផ្លូវច្បាប់»។
ទាក់ទងបញ្ហានេះ លោក ខៀវ សុភ័គ មន្ត្រីនាំពាក្យ និងជារដ្ឋលេខាធិការក្រសួងមហាផ្ទៃ លោកបានឲ្យដឹងនៅថ្ងៃទី២ ខែសីហា ថា មន្ត្រីជំនាញនឹងស៊ើបអង្កេតជុំវិញព័ត៌មាន នៃសកម្មភាពរត់ការធ្វើអត្តសញ្ញាណប័ណ្ណផ្តល់ជូនជនបរទេស ដែលមន្ត្រីបក្សប្រឆាំងបានលើកឡើង។
លោកព្រមានថា នឹងចាត់វិធានការតាមផ្លូវច្បាប់ ចំពោះមន្ត្រីប៉ូលិស ឬអ្នកពាក់ព័ន្ធ ក្នុងសកម្មភាពរត់ការធ្វើអត្តសញ្ញាណប័ណ្ណជូនជនបរទេសខុសច្បាប់ បើរកឃើញកំហុសឆ្គង។
លោក ខៀវ សុភ័គ ស្នើឲ្យសាធារណជន ឬអ្នកពាក់ព័ន្ធ ជួយបង្ហាញអត្តសញ្ញាណ ឬផ្តល់ឈ្មោះមន្ត្រីប៉ូលិស ជាអ្នករត់ការធ្វើអត្តសញ្ញាណប័ណ្ណ ជូនជនបរទេសខុសច្បាប់ ដើម្បីមានវិធានការតាមផ្លូវច្បាប់។
ទោះបីជាបែបនេះក្តី សមាជិកសភាគណបក្សប្រឆាំង និងប្រជាពលរដ្ឋខ្មែរ បានអះអាងថា សកម្មភាពរត់ការធ្វើអត្តសញ្ញាណប័ណ្ណផ្តល់ជូនជនបរទេស ពិសេសជនជាតិវៀតណាម បានកើតមានជាបន្តបន្ទាប់ ជាពិសេសនៅរាជធានីភ្នំពេញ នាដើមឆ្នាំ២០១២ នេះ។
មន្ត្រីក្រសួងមហាផ្ទៃ បានឲ្យដឹង សព្វថ្ងៃនេះ ក្រសួងកំពុងជំរុញសកម្មភាពធ្វើអត្តសញ្ញាណប័ណ្ណផ្តល់ជូនប្រជាពលរដ្ឋខ្មែរ ពិសេសយុវជនឲ្យមានប័ណ្ណសម្គាល់ខ្លួនត្រឹមត្រូវ និងទុកប្រើប្រាស់តាមតម្រូវការប្រចាំថ្ងៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
(Bavet City
ពី Bavet Cityជាការត្រឹមត្រូវនូវអ្វីដែលគណបក្សប្រឆំាងពានលើកឡើងដែលថាមានជនជាតិវៀតជាច្រើនបានត្រូវគេរត់ការធ្វើអត្តសញ្ញាណបណ្ណ៍អោយដោយក្រុមប៉ូលីសក្នុងក្រុងបាវិតតែម្តងកាលពីជាង១ខែមុនការបោះឆ្នោតក្រុមប្រឹក្សាឃុំសង្កាត់។
Aug 03, 2012 07:33 AM
ស៊ិន សេរីសុគន្ធណាបុត្ត
ពី ឡូវ៉ែល ម៉ាស្សាឈូស្សែតចំពោះសកម្មភាពរត់ការធ្វើអត្តសញ្ញាណប័ណ្ណជូនជនជាតិវៀតណាម ដែលធ្វើឡើងដោយមន្ត្រីប៉ូលិសប៉ុស្តិ៍រដ្ឋបាល តាមឃុំ-សង្កាត់មួយចំនួន សរអោយឃើញយ៉ាងច្បាស់
ក្រឡែតថា គណះបក្សអ៉ែមញ៉លើកជើង កំពុងភ័យខ្លាច
ចាញ់ឆ្នោតនៅឆ្នាំ២០១៣ហើយ ចាំមើលអ្នកណា ដែលជា ក្អត់ក្នុងក្អម សូមបងប្អូនខ្មែរ ជួយដល់ទឹកដីកេរ្តិ៍ដូនតាផង។
Aug 03, 2012 05:28 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
