អ្នកវិភាគ៖ វិស័យការទូតកម្ពុជាកំពុងធ្លាក់ចុះយ៉ាងខ្លាំង

ក្រុមអ្នកវិភាគឲ្យដឹងថា ក្នុងរយៈពេលចុងក្រោយនេះ វិស័យការទូតរបស់កម្ពុជា កំពុងធ្លាក់ចុះយ៉ាងខ្លាំង ដោយការប្រើពាក្យសម្ដីមិនសូវសមរម្យក្នុងកិច្ចការតស៊ូផ្នែកការទូត ជាមួយបណ្ដាប្រទេសផ្សេងៗ។

ដោយ តាំង សារ៉ាដា
2012-09-08

h090812rd.mp3

លោកបណ្ឌិត ឡៅ ម៉ុងហៃ អ្នកវិភាគឯករាជ្យបានវាយតម្លៃថា មន្ត្រីការទូតរបស់ខ្មែរភាគច្រើន មិនសូវមានវិជ្ជាជីវៈខ្ពស់សម្រាប់ការតស៊ូផ្នែកកិច្ចការបរទេសទេ។ លោកថា ប្រសិនបើកម្ពុជាមិនមានភាពចាស់ទុំក្នុងការធ្វើនយោបាយការបរទេសជាមួយបណ្ដាប្រទេសផ្សេងៗទេ នោះកម្ពុជាអាចខាតបង់ការគាំទ្រដ៏សម្បើមពីឆាកអន្តរជាតិ។

កាលពីដើមខែសីហា កន្លងទៅ ឯកអគ្គរាជទូតខ្មែរប្រចាំប្រទេសហ្វីលីពីន លោក ហើស សេរីធន បានប្រើពាក្យថា ប្រទេសហ្វីលីពីន និងវៀតណាម បានប្រើនយោបាយកខ្វក់ក្នុងការជំរុញឲ្យកម្ពុជាប្រឈមមុខក្នុងជម្លោះសមុទ្រចិនខាងត្បូង។

ការចេញលិខិតការទូតរបស់តំណាងរដ្ឋាភិបាលកម្ពុជា នៅក្រៅប្រទេស តិះដៀលក្រុមអ្នករិះគន់ ឬរដ្ឋាភិបាលនៃប្រទេសផ្សេងៗនេះ មិនមែនជាលើកទីមួយនោះទេ។ កាលពីថ្ងៃទី៣០ ខែមេសា កន្លងទៅ លោក ហោ ណាំបូរ៉ា ឯកអគ្គរាជទូតខ្មែរប្រចាំប្រទេសអង់គ្លេស បានប្រតិកម្មទៅនឹងអង្គការឃ្លាំមើលពិភពលោក (Global Witness) ថា ប្រើល្បិចអន់ថយបែបវិកលចរិត ក្នុងការសរសេររបាយការណ៍ថោកទាបដូចសំរាម ចោទរដ្ឋាភិបាលកម្ពុជា ថាបានទទួលសំណូកចំនួន២៨លានដុល្លារសហរដ្ឋអាមេរិក ពីក្រុមហ៊ុនប្រេងរបស់បារាំងមួយឈ្មោះតូតាល់ (Total) ជាថ្នូរទៅនឹងការទទួលបានអាជ្ញាប័ណ្ណរុករកប្រេងនៅកម្ពុជា។

លោកបណ្ឌិត ឡៅ ម៉ុងហៃ បានអំពាវនាវឲ្យរដ្ឋាភិបាលកម្ពុជា បើកវគ្គបណ្ដុះបណ្ដាលវិជ្ជាជីវៈកិច្ចការបរទេសបន្ថែមដល់គ្រប់ឯកអគ្គរាជទូត ដើម្បីឲ្យពួកគេមានលទ្ធភាពធ្វើកិច្ចការទំនាក់ទំនងកាន់តែប្រសើរសម្រាប់កម្ពុជា។

ជាមួយគ្នានេះផងដែរ លោកបណ្ឌិត ឡៅ ម៉ុងហៃ ក៏បានកោតសរសើរដល់កិច្ចការការទូតរបស់ខ្មែរប្រចាំក្រុងវ៉ាស៊ីនតោន (Washington) និងក្រុងប៉ារីស (Paris) ថាមានភាពចាស់ទុំច្រើន និងមានប្រជាប្រិយភាពក្នុងសហគមន៍ខ្មែរ។

ក្រុមអ្នកឃ្លាំមើលខ្លះបានប្រៀបធៀបសីលធម៌ ក្នុងការនិយាយស្តីរបស់រដ្ឋាភិបាលទៅនឹងសីលធម៌នៃសង្គមគ្រួសារតូចមួយ។ ជាធម្មតា កាលណាអាណាព្យាបាលតែងប្រើពាក្យមិនគប្បីទៅលើកូនចៅ ឬឲ្យពួកគេឮពាក្យទាំងនោះ វាអាចនាំឲ្យពួកគេចេះប្រើពាក្យមិនគប្បីដូចគ្នា ពេលគេធំដឹងក្តី។ យ៉ាងណាវិញ រដ្ឋាភិបាលក៏ដូចគ្នាអ៊ីចឹងដែរ។ ក្រុមអ្នករិះគន់និយាយថា ប្រសិនបើប្រមុខរដ្ឋាភិបាលចូលចិត្តប្រើពាក្យមិនល្អនោះ ក្រុមមន្ត្រីថ្នាក់តូច ក៏ចូលចិត្តប្រើពាក្យទាំងនោះដែរ។

ចំណែកលោក កែម ឡី អ្នកវិភាគអំពីស្ថានការណ៍សង្គមវិញ បានវាយតម្លៃថា ក្រុមអ្នកការទូត អ្នកបច្ចេកទេស និងអ្នកនយោបាយខ្លះ ហាក់ប្រើពាក្យពេចន៍តែមួយ ឲ្យតែចំណេញនយោបាយក្នុងប្រទេស ជាជាងនយោបាយក្រៅប្រទេស។ លោកបញ្ជាក់ថា មន្ត្រីការទូតខ្មែរភាគច្រើន ខ្វះការវិភាគលើពាក្យពេចន៍ដែលត្រូវប្រើ ឬមិនត្រូវប្រើ។

លោក កែម ឡី សង្កេតឃើញថា ប្រទេសថៃកន្លងមកបានប្រើភាសាការទូតប្រកបដោយវិជ្ជាជីវៈច្រើនជាងកម្ពុជា បើទោះបីថៃស្ថិតក្នុងកាលៈទេសៈសង្គ្រាមជាមួយកម្ពុជាក៏ដោយ។ រហូតមកទល់ពេលនេះ គេនៅមិនទាន់ឃើញមានមន្ត្រីការទូតខ្មែរណាមួយ អាចឆ្លើយតបទៅនឹងការរិះគន់របស់ក្រុមអ្នកវិភាគទាំងនេះនៅឡើយ។

ប៉ុន្តែ លោក ផៃ ស៊ីផាន អ្នកនាំពាក្យនៃទីស្ដីការគណៈរដ្ឋមន្ត្រី បានទទួលស្គាល់ថា ពាក្យការទូតរបស់ខ្មែរពិតជាមានលក្ខណៈគ្រោតគ្រាតបន្តិចមែន ប៉ុន្តែកម្ពុជាក៏បានទទួលរងការប្រមាថ និងវាយប្រហារយ៉ាងខ្លាំងខុសពីការពិត។ លោកបន្តថា ប្រធានាធិបតីសហរដ្ឋអាមេរិកកន្លងមក ធ្លាប់ប្រើពាក្យមិនគប្បីជាងកម្ពុជាទៅទៀត។

លោក គុជ ចាន់លី អ្នកតាមដាននយោបាយរបស់ខ្មែរប្រចាំរដ្ឋម៉ារីឡេន (Maryland) សហរដ្ឋអាមេរិក និយាយថា ភាសារបស់អ្នកការទូត ត្រូវមានលក្ខណៈខុសគ្នាពីភាសាអ្នកនយោបាយក្នុងស្រុក។ ភាសារបស់អ្នកការទូត គឺជាភាសាដែលតំណាងឲ្យមុខមាត់របស់ប្រជាជាតិទាំងមូល រីឯភាសាអ្នកនយោបាយក្នុងស្រុក គឺជាភាសាដែលនិយាយ ដើម្បីកេងយកប្រជាប្រិយភាពរបស់ខ្លួនប៉ុណ្ណោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

សម្តីសជាតិ មាយាទសពូជ!មិនបាច់ឆ្ងល់និយាយច្រើនទេ! នេះគេហៅថាៈសារជាតិ ដូច្នេះពិបាកកែណាស់ ចរិកគ្រោធគ្រាត កាចសាហាវ ទោះជាខំនិយាយឲ្យល្អយ៉ាងណាក៏ទៅមិនរួច!កុំខឹងគាត់នេះជា សារជាតិរបស់មនុស្ស ក្នុងចិត្តគាត់បើកភ្នែកឡើងពេលណា មិនគិតចង់ធ្វើអំពេល្អទេ! គិតគូសវាស ត្រូវចាប់អានេះ សំលាប់អានៅះ.....

Sep 10, 2012 04:44 AM

អ្នកអានអនាមិក

Cambodians are accustomed to saying cruel words, so it is hard to change it. For example, we usually see Hun Sen cursing his opposition and independent critics on TVs. Everyone claps their hands, and the TV hosts/commentators repeat the cruel words on TVs. Only one thing we can do is to change the leader; otherwise, we still stay in the same situation. ....

Sep 10, 2012 12:44 AM