សមត្ថកិច្ចរកឃើញសាកសពក្មេងប្រុសម្នាក់ទៀតនៅខេត្តបាត់ដំបង
h091312mn.mp3
សាកសពក្មេងទាំងបីនាក់នោះ បានស្លាប់ស្ថិតលើទីតាំងចម្ងាយពីគ្នាពី២០០ម៉ែត្រ ទៅ៣០០ម៉ែត្រ នៅក្នុងព្រៃល្បាស់ ស្ថិតនៅចំណុចអណ្ដូងកន្ទួត ឃុំដូនបា ស្រុកគាស់ក្រឡ ខេត្តបាត់ដំបង។ ទន្ទឹមគ្នានេះ សមត្ថកិច្ចបានរកឃើញកំប៉ុងជក់ម៉ា (ថ្នាំញៀន) នៅកន្លែងឃាតកម្មនោះ។
លោកឧត្ដមសេនីយ៍ ស ថេត ស្នងការនគរបាលខេត្តបាត់ដំបង បានមានប្រសាសន៍ថា ក្រុមមន្ត្រីបច្ចេកទេសវិទ្យាសាស្ត្រ មន្ត្រីជំនាញនៃនាយកដ្ឋានព្រហ្មទណ្ឌក្រសួងមហាផ្ទៃ និងតំណាងអយ្យកា បានចុះទៅពិនិត្យ និងសន្និដ្ឋានថា ពុំមែនជាការសម្លាប់វះយកក្រលៀនទេ៖ «មិនមែនដូចពាក្យចចាមអារ៉ាមថា វះយកក្រលៀននោះទេ។ គ្រាន់តែឃើញក្មេងស្រីហ្នឹង គឺស្លៀកខោខ្លី មានការសម្រាតមកត្រឹមជង្គង់ ហើយយកឧបករណ៍ដែលមុតស្រួច ឆូតលើភ្លៅ ពោះ និងក។ ចំពោះក្មេងប្រុសពីរនាក់ទៀត ស្លាប់ដូចជាវាយពីក្រោយ មានរបួសស្លាកស្នាម។ អ៊ីចឹង យើងសន្និដ្ឋានមកដល់ពេលនេះ អាចថាជាការរំលោភសម្លាប់»។
គេបានរកឃើញសាកសពក្មេងប្រុសម្នាក់ និងស្រីម្នាក់ កាលពីថ្ងៃទី១២ កញ្ញា ដែលឃាតកសម្លាប់ទុកចោលនៅក្នុងព្រៃ ក្នុងភូមិអណ្ដូងកន្ទួត ឃុំដូនបា ស្រុកគាស់ក្រឡ ខេត្តបាត់ដំបង។ លុះមកដល់ព្រឹកថ្ងៃទី១៣ ខែកញ្ញា គេបានរកឃើញសាកសពក្មេងប្រុសម្នាក់ទៀត។ ក្មេងស្រីរងគ្រោះមានឈ្មោះ ម៉ាត់ រំដួល អាយុ៨ឆ្នាំ ក្មេងប្រុសពីរនាក់ទៀតមានឈ្មោះ ឡាម ធឹង អាយុ៩ឆ្នាំ និងឈ្មោះ ចំា អាត់រ៉ា ហៅ តាក់ អាយុ១១ឆ្នាំ។ ពួកគេទាំងបីនាក់ មានគ្រួសារផ្សេងពីគ្នា រស់នៅឃុំដូនបា ស្រុកគាស់ក្រឡ ខេត្តបាត់ដំបង។
លោក អ៊ឹង សំអឿន ជាប្រជាពលរដ្ឋនៅឃុំដូនបា បានបញ្ជាក់ថា សាកសពក្មេងប្រុសមានស្នាមជាំក មានធុំក្លិនស្អុយ ហើយមានដង្កូវ៖ «ក្មេងប្រុសជាំក ហើយផ្កាប់មុខដូចវ៉ៃ ក្មេងស្រីវះពោះ ហើយក្រលៀនសងខាងប្រេះទាំងអស់ ផ្ងាវពោះ ស្អុយ ហើយមានដង្កូវ សក់រុះអស់ ហើយវាដូចចាប់ហែកផ្ងារជើងអ៊ីចឹង ហើយវះយក»។
សមត្ថកិច្ចសន្និដ្ឋានទៀតថា ក្មេងប្រុសពីរនាក់ អាយុ៩ និងអាយុ១១ឆ្នាំ អាចត្រូវជនប្រព្រឹត្តិសម្លាប់ ដើម្បីបំបិទភស្តុតាង ដោយសារពួកគេឃើញហេតុការណ៍នៃការចាប់រំលោភក្មេងស្រី។ ទន្ទឹមគ្នា សមត្ថកិច្ចសន្និដ្ឋានថា ជនសង្ស័យក្នុងករណីចាប់រំលោភសម្លាប់ក្មេងទាំងបីនាក់នេះ ទំនងមានគ្នាពីរនាក់ ព្រោះនៅទីតាំងកើតហេតុ មានព្រៃរបោះនៅជាប់ដងអូរ ដែលគេមិនអាចមើលពីផ្លូវ មើលពីភូមិទៅឃើញនោះទេ៖ «អ៊ីចឹង សុំអះអាងថា មកដល់ពេលនេះ មិនមានការសម្លាប់ដើម្បីវះយក ក្រលៀនអីទេ។ គិតមើលទាំងអស់គ្នា តើវះយករបៀបម៉េច? តើមានគ្រូពេទ្យជំនាញវះដាក់ចិញ្ចឹម ដើម្បីឲ្យក្រលៀនហ្នឹងមានគុណភាពយកទៅដាក់មនុស្សដទៃទៀតបានដែរឬអី? មកពីចុងកាត់មាត់ញក់ វះកាន់យូរតឹកឡឹកៗទៅ។ ឥឡូវសូម្បីតែវះនៅពេទ្យ ដើម្បីគេឯកភាពគេផ្ដល់ឲ្យទៅអ្នកណាមួយ គេវះសុទ្ធតែការត្រួតពិនិត្យឈាមត្រឹមត្រូវ ហើយយករបស់ហ្នឹងដាក់ចិញ្ចឹមដាក់អុកស៊ីហ្សែនអី តាមបច្ចេកទេសរបស់ពេទ្យ»។
ក្នុងរយៈកាលកន្លងមកនេះ មានព័ត៌មានចចាមអារ៉ាមជាច្រើន លេចឮថា មានអ្នកដើរចាប់ក្មេងៗ នៅតាមស្រុកស្រែជនបទ វះយកក្រលៀនទៅលក់។ ព័ត៌មានចចាមអារ៉ាមនោះ និយាយតៗគ្នាថា ក្រុមអ្នកដើរចាប់ក្មេងនោះ មានដាក់សម្ភារៈវះកាត់ចិញ្ចឹមក្រលៀននៅតាមខ្លួនទៀតផង។ ប៉ុន្តែ ករណីនេះត្រូវបានក្រសួងមហាផ្ទៃប្រកាសបដិសេធថា ពុំមានករណីក្រុមអ្នកដើរចាប់ក្មេងវះយកក្រលៀននេះទេ គ្រាន់តែព័ត៌មានចចាមអារ៉ាមតគ្នាតែប៉ុណ្ណោះ។
លោកវេជ្ជបណ្ឌិត កាក់ សិលា ប្រធានមន្ទីរពេទ្យបង្អែក ខេត្តបាត់ដំបង បានពន្យល់ថា ការវះកាត់ខ្លួនប្រាណមនុស្ស គេត្រូវធ្វើតាមបច្ចេកទេសត្រឹមត្រូវ។ ជាធម្មតា សរីរាង្គរបស់មនុស្ស កាលណាវះកាត់យកចេញមកពីខ្លួនមនុស្ស ត្រូវមានលក្ខណៈបច្ចេកទេសរក្សាទុកក្នុងគុណភាពមួយ ដើម្បីសរីរាង្គអាចរស់បាន៖ «គ្រាន់តែការវះកាត់នៅមន្ទីរពេទ្យ ក៏គេប្រុងប្រយ័ត្នណាស់ទៅហើយ តាំងពីការសម្អាត យើងហៅថា អនាម័យ ឬក៏ពាក្យសាមញ្ញគេហៅថា ការប្រឆាំងការឆ្លងជាដើម មានបែបបទមុនធ្វើការវះកាត់។ ជំងឺត្រូវធ្វើការវះកាត់ ត្រូវធ្វើម៉េចអ្នកផ្តល់សេវាវះកាត់ ត្រូវសម្អាតខ្លួនឯងរបៀបម៉េច មានតាំងពីអាកុល សាប៊ូ។ល។ ហើយបើឆ្លើយថា មានព័ត៌មានថាមានការវះកាត់ក្រលៀននៅតាមផ្ទះតាមព្រៃ អាហ្នឹងវាហួសពីវិទ្យាសាស្ត្រដែលកំពុងប្រើប្រាស់រាល់ថ្ងៃទៀត អាហ្នឹងខ្ញុំមិនដឹងថាម៉េចដែរ»។
ព្រះរាជអាជ្ញាអមសាលាដំបូងខេត្តបាត់ដំបង លោក នួន សាន បានមានប្រសាសន៍ថា អំពើឃាតកម្មលើក្មេងស្រីម្នាក់ អាយុ៨ឆ្នាំ ក្មេងប្រុសពីរនាក់ ម្នាក់អាយុ៩ឆ្នាំ និងម្នាក់ទៀតមានអាយុ១១ឆ្នាំ គឺជាករណីចាប់រំលោភ។ ជនប្រព្រឹត្តិបានចាប់រំលោភ ហើយសម្លាប់។ លោកបានបញ្ជាក់ថា នៅលើសាកសពក្មេងស្រីអាយុ៨ឆ្នាំ មានពាក់អាវ តែខោរបស់នាងត្រូវគេស្រាតមកនៅត្រឹមក្រោមក្បាលជង្គង់ និងមានស្នាមចាក់ពោះ ដេកផ្ងារ។ ដោយឡែក ក្មេងប្រុសអាយុ៩ឆ្នាំ ទំនងបានរត់ ហើយត្រូវឃាតក កាប់មួយកាំបិតដួលផ្កាប់មុខស្លាប់ និងក្មេងប្រុស អាយុ១១ឆ្នាំ បានរត់គេចខ្លួនបានឆ្ងាយ ជាងគេ តែត្រូវឃាតកតាមសម្លាប់ដូចគ្នាដែរ តែមានស្នាមរបួសច្រើនកាំបិត។
លោកព្រះរាជអាជ្ញាបន្តថា ឃាតកម្មនេះពុំមែនជារឿងគំនុំ ហើយក៏ពុំមែនជាការសម្លាប់ដើម្បីវះយក ក្រលៀន ដូចពាក្យចចាមអារ៉ាមនោះដែរ។ ព្រោះនៅកន្លែងឃាតកម្មនោះ សមត្ថកិច្ចប្រមូលបានភស្តុតាង ដូចជាដែកកេះ និងឧបករណ៍សម្រាប់ជក់គ្រឿងញៀនមួយចំនួនទៀត ហើយសមត្ថកិច្ចក៏បានឃាត់ខ្លួនអ្នកភូមិបីនាក់មកធ្វើការសាកសួរ។
ជនសង្ស័យជាអ្នកភូមិបីនាក់ ដែលសមត្ថកិច្ចកោះហៅធ្វើការសាកសួរនោះ មានឈ្មោះ ជឹម វាសនា ភេទប្រុស អាយុ១៩ឆ្នាំ ឈ្មោះ កុយ ឃុត ភេទប្រុស អាយុ៤៥ឆ្នាំ និងឈ្មោះ ឡាន់ ឌីណា ភេទប្រុស អាយុ២៧ឆ្នាំ។ អ្នកទាំងបីនាក់ រស់នៅចំណុចអណ្ដូងកន្ទួត ឃុំដូនបា ស្រុកគាស់ក្រឡ ខេត្តបាត់ដំបង។
នៅកន្លែងឃាតកម្មសម្លាប់ក្មេងទាំងបីនាក់ ធ្លាប់កើតមានអំពើឃាតកម្មសម្លាប់បុរសម្នាក់ឈ្មោះ ឃុត ឡន អាយុជាង៤០ឆ្នាំ។ ករណីឃាតកម្មនោះ កើតឡើងកាលពីខែវិច្ឆិកា ឆ្នាំ២០១១ កន្លងទៅ ហើយត្រូវគេសន្និដ្ឋានថា បណ្ដាលមកពីរឿងគំនុំក្នុងជម្លោះដណ្ដើមដីធ្លី៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
កូនអ្នកតវាដីនៅបុរីកីឡាបាត់ខ្លួន តើអាចមានឆាកសម្លាប់ថែមសំរាប់បង្វែងដានដែរឺទេ????
Sep 17, 2012 03:43 AM
KHMER
ពី BOTHELL,WASHINGTON USAMy idea,it is the problems from conflect land.To crimes put the things that it makes up the reason.
Sep 14, 2012 02:45 PM
CheyVorman007
ពី AngKor Watថ្វីបើរកឃើញថារឿងថី្មនេះជាពាក្យចចាមអារ៉ាមតែសូមកុំភ្លេចត្រ
ចៀកព្រោះនៅប្រទេសក្រីក្រមួយចំនួនក៏ធ្លាប់មានកើតរឿងវះ
យកគ្រលៀមនេះដែរ។យ៉ាងណាមិញក្នុងរឿងនេះឃាតករដូចជា
សាហាវឃោឃៅពេកណាស់ ដល់ថ្នាក់ដេញកាប់សម្លាប់មនុស្ស
ហាក់ដូចរឿងកុន គួរអោយស្រាវឆ្អឹងខ្នង។(តាមចិត្តក្តៅមិនត្រូវ
ទុកសោះពួកសម្លាប់មនុស្សផ្ទុយពីទាហានក្នុងសង្គ្រាម កូនខ្មែរ
សព្វថ្ងៃម្តេចក៏មានចិត្តសាហាវៗម្លេះសមយ័នេះ?)
Sep 14, 2012 02:04 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
