មន្ត្រីបក្សប្រឆាំងចោទ គ.ខ.ប ថាបិទសិទ្ធិបញ្ចេញមតិនៅព្រះសីហនុ

មន្ត្រីក្រុមប្រឹក្សាខេត្ត និងសកម្មជនគណបក្ស សម រង្ស៊ី នៅខេត្តព្រះសីហនុជាច្រើននាក់ នៅព្រឹកថ្ងៃទី២៣ ខែមិថុនា ឆ្នាំ២០១២ បានរិះគន់ចំៗទៅកាន់មន្ត្រីរៀបចំការបោះឆ្នោតខេត្តព្រះសីហនុ ថា មិនអនុញ្ញាតឲ្យបេក្ខនារីរបស់គេ បញ្ចេញមតិចំពោះសកម្មភាពអវិជ្ជមាននៃដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់។

ដោយ ជិន ជេដ្ឋា
2012-06-23

h062312cs.mp3

បេក្ខនារីជាប់ឆ្នោតជាសមាជិកក្រុងព្រះសីហនុ និងជាប្រធានចលនាស្ត្រី នៃគណបក្ស សម រង្ស៊ី អ្នកស្រី វង រុន្នី មានប្រសាសន៍ថា មន្ត្រីគណៈកម្មការរៀបចំការបោះឆ្នោតខេត្ត ព្យាយាមលាក់បាំងសកម្មភាពអវិជ្ជមាននៅតាមការិយាល័យបោះឆ្នោតមួយចំនួន ទៅសាធារណជន និងមន្ត្រីឃ្លាំមើលលើដំណើរការបោះឆ្នោតនៅកម្ពុជា។

អ្នកស្រី វង រុន្នី៖ «គ្រាន់តែគាត់ចប់ភ្លាម ខ្ញុំគិតថាចប់ ខ្ញុំឡើង គឺប្រធាន គ.ជ.ប (គណៈកម្មាធិការជាតិរៀបចំការបោះឆ្នោត) ហ្នឹង ចេញភ្លាមមកតែម្ដង គាត់ថា សូមបញ្ចប់ការបញ្ចេញមតិយោបល់ប៉ុណ្ណឹង ព្រោះអីគិតថា ការបញ្ចេញមតិយោបល់នេះ គ្រប់គ្រាន់ហើយ មិនចាំបាច់បន្តអ្វីទៀតទេ»។

អ្នកស្រីបញ្ជាក់ថា ការបញ្ចេញមតិរបស់គណបក្សប្រឆាំង នៅតាមកិច្ចប្រជុំ ឬតាមប្រព័ន្ធផ្សព្វផ្សាយនានា ដើម្បីឲ្យប្រជាពលរដ្ឋម្ចាស់ឆ្នោតបានយល់ដឹងអំពីទុក្ខកង្វល់ និងសកម្មភាពផ្សេងៗរបស់គណបក្សរបស់អ្នកស្រី ក្នុងការបម្រើ និងការពារផលប្រយោជន៍ប្រជាពលរដ្ឋ នៅតាមមូលដ្ឋាន។

ឆ្លើយតបនឹងការចោទប្រកាន់របស់សកម្មជនគណបក្សប្រឆាំង ប្រធានគណៈកម្មការរៀបចំការបោះឆ្នោតខេត្តព្រះសីហនុ លោក ហួត ផុន លោកបានបដិសេធថា លោកមិនបានហាមឃាត់ ឬបំបិទសិទ្ធិសេរីភាពក្នុងបញ្ចេញមតិរបស់គណបក្សនយោបាយណាមួយឡើយ។

ចំពោះការដែលគណបក្ស សម រង្ស៊ី មិនបានឡើងបញ្ចេញមតិ គឺដោយសារអស់ម៉ោង ហើយលោកក៏មិនបានឃើញសកម្មជនរូបនោះក្រោកឈរ ដើម្បីសុំបញ្ចេញមតិដែរ៖ «ដូចជាគណបក្សសម រង្ស៊ី ធ្លាប់ធ្វើការជាមួយខ្ញុំច្រើនណាស់ ខ្ញុំមិនដែលបានបិទសិទ្ធិ បិទអីគាត់ម្ដងណាឡើយ។ បើនិយាយអីចឹង វាជាការខុសឆ្គងហើយ ខ្ញុំទទួលមិនបានទេ»។

មន្ត្រីសម្របសម្រួល នៃអង្គការ ខុមហ្វ្រែល (Comfrel) ប្រចាំខេត្តព្រះសីហនុ អ្នកស្រី ជាប សុធារី អ្នកស្រីមានប្រសាសន៍ថា បើទោះបីជាមិនមានច្បាប់ណាមួយចែងថា ត្រូវដាក់ទោសទៅលើអ្នករៀបចំកម្មវិធី ឬអ្នកសម្របសម្រួលដែលមិនបានផ្ដល់ឱកាសស្មើគ្នា ក្នុងការបញ្ចេញមតិ ក៏ប៉ុន្តែបញ្ហានេះ អាចធ្វើឲ្យប៉ះពាល់ដល់លទ្ធិប្រជាធិបតេយ្យនៅកម្ពុជាធ្ងន់ធ្ងរ៖ «យើងឃើញថា ធ្វើអីចឹងវាហាក់ដូចជាបំបិទសិទ្ធិ វាមិនមានអារបៀបលទ្ធិប្រជាធិបតេយ្យ នៃការចូលរួមគំនិតយោបល់ ព្រោះយើងទាំងអស់គ្នា យើងធ្វើការរួមគ្នាក្នុងគោលបំណងមួយថា ធ្វើយ៉ាងណា ដើម្បីឲ្យដំណើរការបោះឆ្នោតពីអាណត្តិមួយទៅអាណត្តិមួយ វាមានលក្ខណៈកាន់តែល្អប្រសើរ»។

កន្លងមក ក្រៅពីការរិះគន់ទៅលើមន្ត្រីរៀបចំការបោះឆ្នោត មន្ត្រីគណបក្សប្រឆាំង ក៏ធ្លាប់បានរិះគន់ជាញឹកញយដែរ ទៅលើអាជ្ញាធរមូលដ្ឋានមួយចំនួនថា បានបំបិទសិទ្ធិសេរីភាពក្នុងការបញ្ចេញមតិ និងរើសអើងគណបក្សនយោបាយ។ ប៉ុន្តែការចោទប្រកាន់នេះ ត្រូវបានអាជ្ញាធរបដិសេធ និងលើកឡើងថា ប្រទេសកម្ពុជា គឺជាប្រទេសប្រជាធិបតេយ្យ សេរីពហុបក្ស ពុំមានការរើសអើងគណបក្សនយោបាយណាមួយនោះទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។