កម្មករក្រុមហ៊ុនចម្រុះសិប្បករអង្គរខេត្តសៀមរាប ធ្វើកូដកម្ម
h091212hs-a1.mp3
កូដកម្មនោះ ដើម្បីទាមទារឱ្យអ្នកគ្រប់គ្រងក្រុមហ៊ុន បញ្ឈប់ការបង្ខំកម្មករឱ្យឆ្លាក់រូបអំពីថ្ម ដោយគិតកម្រៃទាបជាងម៉ោងដែលពួកគេចង់បាន។
លោក ទេព ចយ ជាអនុប្រធានសហជីពកម្មករនិយោជិក នៅក្នុងក្រុមហ៊ុនចម្រុះសិប្បករអង្គរ។ លោកបានមានប្រសាសន៍ថា ក្រុមកម្មករដែលធ្វើកូដកម្មនេះ បន្ទាប់ពីពួកគេបានស្នើសុំឱ្យអ្នកគ្រប់គ្រងរបស់ក្រុមហ៊ុន ចេញមុខចរចាគ្នាទៅលើថ្លៃឈ្នួលឆ្លាក់រូបថ្មនេះចំនួន៣លើកមកហើយ ក៏ប៉ុន្តែ តំណាងក្រុមហ៊ុន មិនព្រមជួបចរចាអំពីផលប្រយោជន៍កម្មករ។
លោក ទេព ចយ៖ «ទី១ គឺព្រហ្មបាយ័ន មុខបួន។ សហជីពកម្មករនិយោជិកហ្នឹង គឺចង់បាន៦៥ម៉ោង ដោយឡែកក្រុមហ៊ុន គឺឱ្យខ្ញុំតែ៤០ម៉ោងកន្លះទេ។ រូបទី២ គឺស្ដេចដំរីធំ ផ្នែកខាងកម្មករនិយោជិកសហជីព ទាមទារចំនួន១៥ម៉ោង តែក្រុមហ៊ុនគាត់ឱ្យតែ១១ម៉ោង អ៊ីចឹងខុសគ្នា ហើយទី៣ កូនដំរីតូច សហជីពកម្មករនិយោជិកទាមទារ១៣ម៉ោង ដល់ពេលខាងក្រុមហ៊ុន គាត់ឱ្យតែ៨ម៉ោង។ ពេលណាដែលពួកខ្ញុំធ្វើម៉ោងកាន់តែតិច កម្រៃតិចហើយ។ ពេលណាដែលពួកខ្ញុំធ្វើការងារកាន់តែច្រើន ម្នាក់ៗ៣០០-៤០០ម៉ោង អ៊ីចឹង យកមកគុណលុយកាំប្រាក់របស់ពួកខ្ញុំ វាអាចបានលុយច្រើន។ ប្រសិនបើខ្ញុំស៊ីប្រាក់ខែហ្វិក (ថេរ) របស់ក្រុមហ៊ុន ខ្ញុំធ្វើបានតាមគោលការណ៍ក្រុមហ៊ុន តែអាហ្នឹងខ្ញុំស៊ីកម្រៃ»។
សមត្ថកិច្ចក្រុងសៀមរាប បានហៅការធ្វើកូដកម្មរបស់ក្រុមកម្មករទាំងនោះថា មិនមានច្បាប់អនុញ្ញាតទេ។
កាលពីថ្ងៃទី១០ ខែកញ្ញា កន្លងទៅ សាលាក្រុងសៀមរាប បានចេញសេចក្តីជូនដំណឹងមួយដល់សហជីពកម្មករនោះ ដោយមិនអនុញ្ញាតឱ្យធ្វើកូដកម្ម ដែលគ្រោងទុកនៅក្នុងបរិវេណក្រុមហ៊ុនចម្រុះសិប្បករអង្គរ ឬក៏កន្លែងផ្សេងទៀតជាដាច់ខាត ពីព្រោះវាអាចប៉ះពាល់ដល់សណ្ដាប់ធ្នាប់សាធារណៈ និងសន្តិសុខ ព្រមទាំងជះឥទ្ធិពលមិនល្អទៅដល់ភ្ញៀវទេសចរទៀតផង។
កាលពីព្រឹកថ្ងៃពុធ បន្ទាប់ពីក្រុមកម្មករបានធ្វើកូដកម្ម អាជ្ញាធរក្រុងសៀមរាប បានសុំកម្មករផ្អាកសកម្មភាពសិន ដើម្បីរង់ចាំការដោះស្រាយដែលនឹងធ្វើការចរចាគ្នានៅសាលាក្រុង នៅវេលារសៀលថ្ងៃដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
