អាស៊ាន ត្រូវការពេលវេលាច្រើនទៀត ដើម្បីទាក់ទាញអ្នកវិនិយោគ ស.រ.អា

ការទាក់ទាញអ្នកវិនិយោគសហរដ្ឋអាមេរិកមកប្រទេសសមាជិកអាស៊ាន (ASEAN) អាចនឹងត្រូវការពេលវេលាច្រើនទៀត បើសិនជាប្រទេសសមាជិកអាស៊ានមិនទាន់ដោះស្រាយបញ្ហាប្រឈមចំពោះបរិយាកាសវិនិយោគ និងអាជីវកម្ម ដូចជា បញ្ហាហេដ្ឋារចនាសម្ព័ន្ធ អំពើពុករលួយ ច្បាប់ និងបញ្ហារដ្ឋបាល។

ដោយ អាន ស៊ីថាវ
2012-09-17

H091712AS

ទោះជាយ៉ាងណាក៏ដោយ សហរដ្ឋអាមេរិក ជាដៃគូរដ៏សំខាន់សម្រាប់អាស៊ាន។ តែមិនទាន់មានការវិនិយោគនៅតំបន់អាស៊ានបានគ្រប់ជ្រុងជ្រោយនៅឡើយទេ។ ប្រទេសកម្ពុជារំពឹងថា នឹងទាក់ទាញអ្នកវិនិយោគពីសហរដ្ឋអាមេរិក បានច្រើនជាងប្រទេសសមាជិកអាស៊ានដទៃ លុះត្រាតែកម្ពុជាធានាឲ្យភាពប្រសើរឡើងនូវកិច្ចព្រមព្រៀងវិនិយោគ ឬបរិយាកាសអាជីវកម្មជាដើម។

តំបន់អាស៊ានក្លាយទីតាំងសំខាន់សម្រាប់អ្នកវិនិយោគបរទេស ដែលមានចំនួនប្រជាជនជាង ៦០០ លាននាក់។ ដើម្បីដោះស្រាយបញ្ហានេះ ប្រទេសអាស៊ានបានបង្កើតក្រុមប្រឹក្សាការពិភាក្សារវាងផ្នែកឯកជនក្នុងការលើកកម្ពស់ផ្នែកវិនិយោគរវាងតំបន់អាស៊ាន។

ក្រុមប្រឹក្សាពិគ្រោះយោបល់ផ្នែកអាជីវកម្មរបស់អាស៊ាន (ASEAN-BAC) បានបង្កើតឡើងដោយប្រមុខរដ្ឋាភិបាលអាស៊ាន ក្នុងកិច្ចប្រជុំកំពូលអាស៊ានលើកទី៧ នៅប្រទេសប្រ៊ុយណេ កាលពីឆ្នាំ ២០០១ ដែលមានគោលបំណងសំខាន់ គឺលើកកម្ពស់ភាពជាដៃគូររវាងរដ្ឋាភិបាល និងផ្នែកឯកជន ដើម្បីសម្រេចឲ្យបាននៅសហគមន៍សេដ្ឋកិច្ចអាស៊ាន នៅឆ្នាំ២០១៥។ ក្រុមប្រឹក្សានេះ ដោះស្រាយនិងឆ្លើយតបទៅផ្នែកឯកជន ចំពោះបញ្ហាទាំងឡាយណា សម្រាប់ការអនុវត្តន៍កិច្ចសហប្រតិបត្តិការសេដ្ឋកិច្ចអាស៊ាន ហើយផ្នែកឯកជន ក៏អ្នកផ្ដល់ ឬកំណត់វិស័យអាទិភាពសម្រាប់ប្រមុខរដ្ឋាភិបាលអាស៊ានដែរ។

របាយការណ៍ដែលសិក្សាដោយសាកលវិទ្យាល័យជាតិសិង្ហបុរីអំពីសក្ដានុពល និងភាពប្រកួតប្រជែងវិនិយោគរវាងអាស៊ានប្រចាំឆ្នាំ ២០១២ ថា តំបន់អាស៊ានមានចំណុចខ្លាំងក្នុងការទាក់ទាញវិនិយោគ។ របាយការណ៍ដដែលបញ្ជាក់ថា ជាង ៣៦% នៃអាជីវកម្ម បានបង្ហាញថា ប្រទេសអាស៊ាននឹងផ្ដល់ចំណុចល្អបំផុត សម្រាប់ការវិនិយោគផ្ទាល់ពីបរទេស ហើយ ៨៨% នៃអាជីវកម្មមានគម្រោងនឹងបង្កើនការវិនិយោគយ៉ាងហោចណាស់ក្នុងប្រទេសសមាជិកអាស៊ានមួយចំណោមប្រទេសអាស៊ានទាំង ១០។

លទ្ធផលអង្កេតបានបង្ហាញថា ប្រទេសសមាជិកអាស៊ាន ដែលផ្ដល់លទ្ធភាពល្អបំផុតសម្រាប់ស្ថាប័នវិនិយោគផ្ទាល់ពីបរទេស មានប្រទេសសិង្ហបុរី វៀតណាម ម៉ាឡេស៊ី ថៃ ឥណ្ឌូណេស៊ី ឡាវ និងភូមា ឬមីយ៉ាន់ម៉ា។ ដោយឡែកប្រទេស ហ្វីលីពីន ប្រ៊ុយណេ និងប្រទេសកម្ពុជា ស្ថិតនៅលំដាប់ថ្នាក់ចុងក្រោយ សម្រាប់ការទាក់ទាញវិនិយោគផ្ទាល់ពីបរទេស ក្នុងរយៈពេលបីឆ្នាំខាងមុខ។

ការអង្កេតបានបង្ហាញទៀតថា បញ្ហាប្រឈមដែលបង្កផលលំបាកដល់បរិយាកាសអាជីវកម្ម និងវិនិយោគក្នុងរង្វង់អាស៊ានជាទូទៅ មានដូចជា ហេដ្ឋារចនាសម្ព័ន្ធ និងច្បាប់ជាដើម ហើយប្រទេសសមាជិកអាស៊ានដែលកម្រិតទាបបំផុតនៃបញ្ហាប្រឈមទាំងនោះ គឺប្រទេសសិង្ហបុរី និងប្រទេសប្រ៊ុយណេ។

ទីប្រឹក្សាពាណិជ្ជកម្មសហរដ្ឋអាមេរិក លោក អគ្គរដ្ឋទូត រ៉ុង ខឺត (Ron kirt) មានប្រសាសន៍ថា ការទាក់ទាញការវិនិយោគ នៅប្រទេសកម្ពុជា លុះត្រាតែប្រទេសកម្ពុជាកែលំអបញ្ហាទាំងឡាយ ដែលទាក់ទងនឹងការគោរពកិច្ចព្រមព្រៀងវិនិយោគ ដោយលោកមានប្រសាសន៍បន្ថែមថា អត្ថប្រយោជន៍មួយ ដែលយើងមើលឃើញនៅក្នុងចំណោមប្រទេសអាស៊ាន គឺការផ្លាស់ប្ដូរសេដ្ឋកិច្ចបិទ មកជាប្រទេស ដែលប្រកាន់យកសេដ្ឋកិច្ចបើកចំហទៅកាន់ទីផ្សារខាងក្រៅ និងជាសង្គមមួយ ប្រកបដោយប្រជាធិបតេយ្យជាដើម។

លោក រ៉ុង ខឺគ មានប្រសាសន៍បន្ថែមថា ចំណុចសំខាន់ដែលប្រទេសកម្ពុជាអាចទាក់ទាញចំនួនអ្នកវិនិយោគ ស្ថិតនៅលំដាប់ខ្ពស់ជាងប្រទេសសមាជិកអាស៊ានដទៃទៀត គឺប្រទេសត្រូវមានការយកចិត្តទុកដាក់ចំពោះច្បាប់ កម្លាំងពលកម្ម និងបញ្ហាផ្សេងទៀត ទាក់ទងនឹងបរិយាកាសវិនិយោគឲ្យកាន់តែប្រសើរ។

លោក រ៉ុង ខឺគ៖ «ហេតុផលសំខាន់ដែលប្រទេសកម្ពុជាចង់ទាក់ទាញអ្នកវិនិយោគិនរបស់សហរដ្ឋអាមេរិកស្ថិតនៅលំដាប់ទីមួយនោះ គឺប្រទេសកម្ពុជាត្រូវដោះស្រាយបញ្ហាប្រឈម នានាដែលអ្នកវិនិយោគជាទូទៅត្រូវការនោះមានដូចជា តម្លាភាព នីតិរដ្ឋ ការការពារ ពលកម្មជំនាញ និងទីតាំងល្អជាដើម»។

លោកមានប្រសាសន៍បន្តថា អ្នកវិនិយោគនានាមិនចង់ឲ្យមានការរើសអើងនានា ចំពោះការវិនិយោគនៅក្នុងប្រទេសណាមួយ ហើយប្រសិនជាប្រទេសកម្ពុជាអាចដោះស្រាយបញ្ហាទាំងនោះបាន ការវិនិយោគរបស់សហរដ្ឋអាមេរិកមាននិន្នាការនិងកើនឡើង នៅប្រទេសកម្ពុជា។

រដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធិ មានប្រសាសន៍ថា ទំនងអាស៊ាន និងសហរដ្ឋអាមេរិកបានចាប់ផ្ដើមរយៈពេលយូរឆ្នាំមកហើយ។ ប៉ុន្តែ មិនទាន់មានវេទិកាពិភាក្សាអំពីបរិយាកាសអាជីវកម្មឬវិនិយោគនៅឡើយទេ។ លោក ចម ប្រសិទ្ធិ បានបញ្ជាក់ថា នៅពេលដែលប្រទេសកម្ពុជាធ្វើជាប្រធានអាស៊ាននេះ បានរៀបចំវេទិកាធុរកិច្ចអាស៊ាន (Business Forum) សហរដ្ឋអាមេរិក ដែលបានធ្វើឡើងខែឧសភា ២០១២ កន្លងទៅ។

សហរដ្ឋអាមេរិក និងអាស៊ាន ជាដៃគូរពាណិជ្ជកម្មសំខាន់រវាងគ្នាទៅវិញទៅមក ដោយលោកបញ្ជាក់ថា ប្រទេសអាស៊ានទាំង ១០ បច្ចុប្បន្នកំពុងក្លាយទីដៅសំខាន់សម្រាប់ការវិនិយោគរបស់អ្នកវិនិយោគិនសហរដ្ឋអាមេរិក ដោយលោកបញ្ជាក់ថា ទាំងផ្នែកឯកជន និងរដ្ឋាភិបាល ត្រូវមានការពិភាក្សាក្នុងការលើកកម្ពស់បរិយាកាសវិនិយោគរវាងអាស៊ាន។

លោក ចម ប្រសិទ្ធិ ៖ «ពីមួយឆ្នាំទៅមួយឆ្នាំ ពីការប្រជុំមួយទៅការប្រជុំមួយទៀត យើងបានឃើញមានបញ្ហាជាច្រើន ហើយយើងមិនត្រូវលើកបញ្ហាដដែលៗ មកទេ។ ពីមុនយើងមានការជួបជុំគ្នារវាង ផ្នែកឯកជន យើងស្ដាប់អ្នកនិយាយ ហើយយើងកត់ទុក ហើយយើងជម្រាបលា។ ឆ្នាំក្រោយ យើងកត់ទុក និងនិយាយលាដដែល។ កត្តានេះបញ្ជាក់ថា យើងមិនអាចរកដំណោះស្រាយបានទេ។ ប៉ុន្តែ ពេលនេះ យើងអង្គុយពិភាក្សាដើម្បីរកដំណោះស្រាយ»។

លោក ចម ប្រសិទិ្ធ បន្ថែមថា រាល់ការពិភាក្សាទាំងនោះ ចាំចាច់ត្រូវរកដំណោះស្រាយឲ្យបានប្រកបដោយប្រសិទ្ធភាព ដែលជាពេលវេលាសមស្របរបស់ប្រទេសអាស៊ាននិងសហរដ្ឋអាមេរិក។

របាយការណ៍ដែលសិក្សាដោយសាកលវិទ្យាល័យជាតិសិង្ហបុរីស្ដីអំពីសក្ដានុពល និងភាពប្រកួតប្រជែងវិនិយោគ រវាងអាស៊ានប្រចាំឆ្នាំ ២០១២ ដដែល បានបង្ហាញថា ឧបសគ្គមួយចំនួននៃបរិយាកាសអាជីវកម្មនៅក្នុងប្រទេសសមាជិកអាស៊ាន មានដូចជា អំពើពុករលួយ ដែលកើតមានក្នុងប្រទេសឥណ្ឌូនេស៊ី ម៉ាឡេស៊ី ហ្វីលីពីន ថៃ ភូមា ឬមីយ៉ាន់ម៉ា និងបញ្ហាទាក់ទងនឹងច្បាប់ផ្សេងៗ កើតមានក្នុងប្រទេសឥណ្ឌូនេស៊ី ឡាវ ម៉ាឡេស៊ី ហ្វីលីពីន និងប្រទេសថៃ។ ហើយបញ្ហាទាក់ទងនឹងច្បាប់ និងបែបបទរដ្ឋបាលកើតមាននៅក្នុងប្រទេសកម្ពុជា ម៉ាឡេស៊ី វៀតណាម ភូមា ឬមីយ៉ាន់ម៉ា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

តើអាស៊ានត្រូវការពេលប៉ុន្មានឆ្នាំទៀតដើម្បីទាញអ្នកវិនិយោគអាមេរិកាំងបាន?។តើអាស៊ានកើតតាំងពីពេលណាមក?។

Sep 18, 2012 04:13 AM

Vuth Lee

ពី Lowell, Massachusetts,U.S.A

For decades, Hun Sen's government's media has spreaded propaganda that Cambodia is a democratic nation. Is Cambodia truly a democratic country? is Hun Sen truly a multi-party-democratic leader? Are Khmers free from supression? A wise and frugal government which shall restrain men from injuring one another, which leave them otherwise free to regulate their own pursuits of industry and improvement, and shall not take from the mouth of labor the rice it has earned. This is the sum of good government. On the other hand, Hun Sen government's workers(officers) love wealth greater than people liberty and it does not create peace, commerce, and honest friendship with U.S.A. yet. SO, don't expect U.S.A's entrepreneurs going to come to Cambodia doing their business at this time. Why? The United States of America(U.S.A.)is the forefather of democracy and its people are enjoying their truly democratic way of lives everyday.

Sep 18, 2012 03:27 AM

អ្នកអានអនាមិក

មិនពិបាកទេបើអស់លោកចង់បានការវិនិយោកពីលោកខាងលិចជាពិសេស
ពីសហរដ្ឋអាមេរិច ច្បាប់មើលទៅល្អហើយ តែជាក់ស្តែងអំពើពុករលួយនៅ
តែមាន វាហាក់ដូចជាអន្ទងគេមកដាក់លុយហើយ ចាប់ផ្តើមរិតកអញ្ជឹង៕

Sep 18, 2012 02:29 AM

អ្នកអានអនាមិក

អាស៊ានគ្មានបានការ កើតមកគ្រាន់តែល្អមើល។បើកើតមកគ្រាន់តែល្អមើល បើទោះជាស្លាប់ទៅវិញក៏មិនស្ដាយ។ពលរដ្ឋខ្មែរជាពលករ ពលការិនី ត្រូវគេធ្វើបាបដូចសត្វធាតុ មិនដែលមានមុខអាស៊ានសោះ មានតែតាមរយះការទូត។

Sep 18, 2012 02:21 AM