យុវជន​អាស៊ាន​ទាមទារ​ឲ្យ​មេដឹកនាំ​ចេញ​គោលនយោបាយ​សម្រាប់​យុវជន

តំណាង​យុវជន​មក​ពី ៥​ប្រទេស រួម​មាន​ប្រទេស​កម្ពុជា ថៃ វៀតណាម ហ្វីលីពីន និង​ប្រទេស​ភូមា ឬ មីយ៉ាន់ម៉ា បាន​ជួប​ប្រជុំ​គ្នា​នៅ​ដើម​សប្ដាហ៍​នេះ ដើម្បី​រក​យុទ្ធសាស្ត្រ​តស៊ូ​មតិ​សុំ​ឲ្យ​រដ្ឋាភិបាល​នៃ​ប្រទេស​ក្នុង​សហគមន៍​អាស៊ាន ងាក​មក​ចាប់​អារម្មណ៍​ចំពោះ​គោលនយោបាយ​របស់​យុវជន។
ដោយ ទេព សុរ៉ាវី
2012-11-15
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

បណ្ដាញ​យុវជន​នៅ​តាម​សហគមន៍​មួយ​ចំនួន​នៅ​បណ្ដា​ប្រទេស​ជា​សមាជិក​អាស៊ាន​ចំនួន ២៥​រូប មក​ពី​ប្រទេស​ចំនួន ៥ បាន​មក​ចូល​រួម​ក្នុង​កិច្ច​ប្រជុំ​រួម​គ្នា​នៃ​ក្រុម​យុវជន​ស្ម័គ្រ​ចិត្ត​រយៈពេល ២​ថ្ងៃ ដើម្បី​ស្វែង​រក​យុទ្ធសាស្ត្រ​ឲ្យ​រដ្ឋាភិបាល​អាស៊ាន បញ្ចូល​កម្លាំង​ចលករ​យុវជន​ទៅ​ក្នុង​សកម្មភាព​របស់​អាស៊ាន។

កិច្ច​ប្រជុំ​ដែល​ធ្វើ​ឡើង​កាល​ពី​ថ្ងៃ​ទី​១២ ដល់​ថ្ងៃ​ទី​១៣ ខែ​វិច្ឆិកា នៅ​រាជធានី​ភ្នំពេញ បាន​បញ្ចប់​ទៅ​បន្ទាប់​ពី​ក្រុម​យុវជន​នៃ​ប្រទេស​អាស៊ាន សម្រេច​បន្ត​ការ​ទាមទារ​ឲ្យ​មេដឹកនាំ​នៃ​ប្រទេស​ជា​សមាជិក​អាស៊ាន ចេញ​គោលនយោបាយ​យុវជន​អាស៊ាន យក​ចិត្ត​ទុក​ដាក់​ចំពោះ​យុវជន និង​ផ្ដល់​ឱកាស​ឲ្យ​យុវជន​ចូល​រួម​ក្នុង​កិច្ចការ​អាស៊ាន។

អ្នក​សម្របសម្រួល​ពង្រឹង​សិទ្ធិ​អំណាច​យុវជន​នៃ​អង្គការ​កម្មវិធី​អភិវឌ្ឍន៍​ធនធាន​យុវជន លោក លួន ធន ឲ្យ​ដឹង​នៅ​ថ្ងៃ​ទី​១៥ ខែ​វិច្ឆិកា ថា រដ្ឋាភិបាល​នៃ​ប្រទេស​អាស៊ាន រួម​ទាំង​កម្ពុជា​ផង នៅ​មិន​ទាន់​ផ្ដល់​ឱកាស​ឲ្យ​យុវជន​ចូល​ប្រឡង​ក្នុង​កិច្ចការ​អាស៊ាន​នៅ​ឡើយ​ទេ។ ម្យ៉ាង​សំឡេង​របស់​យុវជន​នៅ​មិន​ទាន់​មាន​ភាព​ស្មើ​គ្នា​ក្នុង​ជួរ​រដ្ឋាភិបាល។

លោក​បន្ត​ថា អាស៊ាន​គឺ​ជា​ចំណុច​កណ្ដាល​នៃ​ប្រជាជន​អាស៊ាន ហើយ​យុវជន​មាន​ច្រើន​នៅ​ក្នុង​ចំណោម​ប្រជាជន​ទាំង​នោះ ដូច្នោះ​ក្រុម​យុវជន​ស្នើ​សុំ​ឲ្យ​រដ្ឋាភិបាល​អាស៊ាន ងាក​មក​ផ្ដោត​លើ​តម្រូវការ​យុវជន​ឲ្យ​បាន​ច្រើន៖ «ឲ្យ​គាត់​ទទួល​ស្គាល់​នូវ​អ្វី​ជា​កម្លាំង​យុវជន។ យុវជន​មាន​សំឡេង​ក្នុង​ជួរ​រដ្ឋាភិបាល ឬ​ជួរ​រដ្ឋាភិបាល​របស់​អាស៊ាន ហើយ​ឲ្យ​អាស៊ាន​ងាក​មក​រក​យុវជន​ខ្លះ​ដែរ ដើម្បី​ឲ្យ​យើង​មាន​កន្លែង​មួយ​សម្រាប់​យុវជន​បាន​អង្គុយ​ឲ្យ​មាន​គោលនយោបាយ​មួយ​ស្តី​អំពី​យុវជន​ច្បាស់លាស់»

លោក លួន ធន បញ្ជាក់​ថា ប្រសិន​បើ​រដ្ឋាភិបាល​អាស៊ាន ចាប់​អារម្មណ៍​យុវជន យុវជន​អាច​នឹង​ក្លាយ​ជា​ចលករ​ស្នូល​នៃ​ការ​បង្កើត​តម្លៃ​ប្រជាជាតិ​អាស៊ាន សេចក្ដី​ថ្លៃថ្នូរ និង​ការ​អភិវឌ្ឍ​ប្រកប​ដោយ​និរន្តរភាព៖ «យុវជន​គឺ​ជា​កម្លាំង​ចលករ​មួយ​ដ៏​ពិសេស ព្រោះ​គាត់​គ្មាន​និន្នាការ ហើយ​យុវជន​នឹង​ក្លាយ​ជា​ថ្នាក់​ដឹកនាំ​មួយ​នៅ​ថ្ងៃ​ក្រោយ ហើយ​កម្លាំង​យុវជន​នៅ​អាស៊ាន គឺ​អាច​ប្តូរ​នូវ​សកម្មភាព​មួយ​ដែល​កាន់​ភាព​ល្អ​ប្រពៃ​បាន ព្រោះ​និន្នាការ​របស់​យុវជន ខ្ញុំ​ឃើញ​គំនិត​របស់​គាត់​ផុលផុស​ឡើង គឺ​សុទ្ធ​តែ​ចង់​បង្កើត​តម្លៃ​របស់​ខ្លួន តម្លៃ​ប្រជាជាតិ​អាស៊ាន និង​ឲ្យ​វា​មាន​ភាព​ថ្លៃថ្នូរ ឲ្យ​មាន​ភាព​អភិវឌ្ឍន៍​ប្រកប​ដោយ​និរន្តរភាព»

ប្រទេស​កម្ពុជា​មាន​យុវជន​ចំនួន ៣៣​ភាគរយ គឺ​ស្មើ​នឹង​ជាង ៤​លាន​នាក់​នៃ​ប្រជាជន​សរុប​ប្រមាណ ១៤​លាន​នាក់។ បណ្ដាញ​ក្រុម​យុវជន​អាស៊ាន ធ្លាប់​បាន​ចេញ​សេចក្ដី​ថ្លែងការណ៍​រួម​គ្នា​ម្ដង​រួច​មក​ហើយ ទៅ​ថ្នាក់​ដឹកនាំ​អាស៊ាន កាល​ពី​ខែ​មីនា កន្លង​ទៅ។ សេចក្ដី​ថ្លែងការណ៍​រួម​នោះ​ផ្ដោត​សំខាន់​ទៅ​លើ​ការ​អប់រំ​របស់​យុវជន ការ​អភិវឌ្ឍ​ប្រកប​ដោយ​និរន្តរភាព និង​ចំណុច​ជា​ច្រើន​ទៀត​ដែល​ពាក់ព័ន្ធ​នឹង​ការ​ប្រឈម​របស់​យុវជន​នៅ​តំបន់​អាស៊ាន។

កិច្ច​ប្រជុំ​កំពូល​អាស៊ាន​លើក​ទី​២១ កិច្ច​ប្រជុំ​កំពូល​ពាក់ព័ន្ធ​ជា​ច្រើន​ទៀត រួម​ទាំង​កិច្ច​ប្រជុំ​អាស៊ី​បូព៌ា នឹង​ចាប់​ធ្វើ​ពី​ថ្ងៃ​ទី​១៥ ដល់​ថ្ងៃ​ទី​២០ ខែ​វិច្ឆិកា ឆ្នាំ​២០១២។ កិច្ច​ប្រជុំ​នេះ មេដឹកនាំ​អាស៊ាន ជា​ពិសេស​ប្រធានាធិបតី​សហរដ្ឋអាមេរិក លោក បារ៉ាក់ អូបាម៉ា (Barack Obama) នឹង​ចូល​រួម ហើយ​អង្គការ​សង្គម​ស៊ីវិល រួម​ទាំង​បណ្ដាញ​យុវជន គ្រោង​នឹង​ដាក់​ញត្តិ ឬ​ចេញ​សេចក្ដី​ថ្លែងការណ៍​រួម​ទៅ​ថ្នាក់​ដឹកនាំ​ទាំង​នោះ ដើម្បី​ជំរុញ​ឲ្យ​ការ​ទាមទារ​របស់​ពួកគេ​មាន​ប្រសិទ្ធភាព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល