អាជ្ញាធររតនគិរី រងការចោទថារារាំងការជួបប្រជុំរបស់ពលរដ្ឋសហគមន៍
h072512sr.mp3
អ្នកឃ្លាំមើលសិទ្ធិមនុស្សសមាគម អាដហុក (Adhoc) ខេត្តរតនគិរី នៅថ្ងៃពុធ ទី២៥ ខែកក្កដា ឆ្នាំ២០១២ ឲ្យដឹងថា មន្ត្រីអាជ្ញាធរស្រុកវ៉ឺនសៃ មានចេតនាធ្វើឲ្យរំខាន និងព្យាយាមរារាំងមិនឲ្យមានការជួបប្រជុំមួយ រវាងពលរដ្ឋសហគមន៍ និងមន្ត្រីសមាគម អាដហុក ក្នុងកម្មវិធីផ្សព្វផ្សាយអប់រំពីបញ្ហាច្បាប់ និងសិទ្ធិសេរីភាពក្នុងការបញ្ចេញមតិរបស់ពលរដ្ឋ។
នៅព្រឹកថ្ងៃពុធ ទី២៥ ខែកក្កដា មន្ត្រីសមាគម អាដហុក ចំនួនពីរនាក់ បានរៀបចំកិច្ចប្រជុំប្រចាំខែមួយ នៅគេហដ្ឋានមួយរបស់តំណាងសហគមន៍ មានប្រជាពលរដ្ឋប្រមាណ ១៥នាក់ មកពីភូមិនានាក្នុងឃុំភ្នំកុក ស្រុកវ៉ឺនសៃ ចូលរួម។
អ្នកសម្របសម្រួលសមាគម អាដហុក ខេត្តរតនគិរី លោក ប៉ែន ប៊ុណ្ណារ៍ មានប្រសាសន៍បញ្ជាក់ថា ប៉ូលិសប៉ុស្តិ៍រដ្ឋបាលឃុំចំនួនពីរនាក់ បានទាមទាររកច្បាប់អនុញ្ញាតិក្នុងកិច្ចប្រជុំនេះ និងបានគំរាមថា នឹងយកដីកាហាមឃាត់ពីអាជ្ញាធរស្រុក មិនឲ្យបើកកិច្ចប្រជុំនេះ បើទោះបីលោកបានបញ្ជាក់ និងបង្ហាញឯកសារចេញដោយរដ្ឋមន្ត្រីក្រសួងមហាផ្ទៃ លោក ស ខេង បានណែនាំថា រាល់កិច្ចប្រជុំសហគមន៍ ឬការប្រជុំផ្សព្វផ្សាយអប់រំ សិក្ខាសាលា ឬវេទិកាសាធារណៈមិនតម្រូវឲ្យសុំច្បាប់អនុញ្ញាតិយ៉ាងណាក្តី។
លោកបន្តថា អាជ្ញាធរឃុំបានទូរស័ព្ទមកលោកមិនឲ្យបើកកិច្ចប្រជុំនេះដូចគ្នា ហើយនេះគឺជាការរំលោភធ្ងន់ធ្ងរដល់សេរីភាពជួបប្រជុំរបស់ពលរដ្ឋ និងរំលោភសេចក្តីណែនាំរបស់ក្រសួងមហាផ្ទៃទៀតផង៖ «ប្រាប់យើងថា ស្រុកនឹងចេញដីកាបញ្ឈប់អញ្ចឹងណា ហើយគាត់ទៅយក។ វាជាការគាបសង្កត់ វាជាការរំលោភសិទ្ធិធ្ងន់ធ្ងរណាស់។ បើយើងនិយាយទៅចំពោះការជួបប្រជុំគ្នារបស់សហគមន៍ ដែលប្រមុខរាជរដ្ឋាភិបាលយើងកំពុងដឹកនាំប្រទេសទៅកាន់របបប្រជាធិបតេយ្យ បែរជាអាជ្ញាធរថ្នាក់ក្រោមហ្នឹង ធ្វើរបៀបអញ្ចឹងណា»។
ទាក់ទិនការចោទប្រកាន់នេះ មេឃុំភ្នំកុក លោក លី នឿន បានបដិសេធថាលោកមិនបានហាមឃាត់ ឬរារាំងកិច្ចប្រជុំនោះទេ ក៏ប៉ុន្តែលោកបានសួររកហេតុផលនៃកិច្ចប្រជុំ ដើម្បីពិនិត្យមើលថា តើកិច្ចប្រជុំនោះមានទម្រង់បែបណាតែប៉ុណ្ណោះ។ លោកបន្តថា កិច្ចប្រជុំរវាងអង្គការក្រៅរដ្ឋាភិបាលជាមួយសហគមន៍នៅក្នុងទីតាំងសហគមន៍ គឺអាចធ្វើបានដោយមិនចាំបាច់សុំច្បាប់ពីអាជ្ញាធរនោះទេ៖ «បើធ្វើវេទិកាសាធារណៈ គាត់ឲ្យផ្អាកសិន។ ខ្ញុំប្រាប់គាត់វិញថា គាត់នឹងធ្វើគ្រាន់តែសកម្មជនរបស់គាត់ទេ ធ្វើក្នុងផ្ទះ។ គាត់ថាធ្វើបានអញ្ចឹង អញ្ចឹងខ្ញុំប្រាប់វិញមិនមែនថាទៅគំរាមទេ»។
ដូចគ្នានេះដែរ អធិការប៉ូលិសស្រុកវ៉ឺនសៃ លោក ទឺ នូថង មានប្រសាសន៍បញ្ជាក់ថា ប៉ូលិសនៅមូលដ្ឋានមិនបានរឹតបន្តឹងសេរីភាពជួបប្រជុំរបស់ពលរដ្ឋនោះទេ ក៏ប៉ុន្តែប៉ូលិសត្រូវតែត្រួតពិនិត្យរាល់សភាពការណ៍ដែលអាចប៉ះពាល់សណ្ដាប់ធ្នាប់សាធារណៈ ឬសន្តិសុខសង្គម៖ «យោងតាមបញ្ជាអភិបាលស្រុក គាត់ថាទៅសួរនាំមើល គាត់ធ្វើមានអ្វីខ្លះអញ្ចឹងណា! មិនឃាត់ទេ ឥឡូវគាត់ធ្វើវិញតើ ប៉ុន្តែធ្វើនៅផ្ទះយកសកម្មជនគាត់មួយភូមិពីរនាក់ បីនាក់អញ្ចឹងទេ»។
កាលពីថ្ងៃអាទិត្យ ទី២២ ខែកក្កដា ឆ្នាំ២០១២ កន្លងទៅ សកម្មជននៃមជ្ឈមណ្ឌលសិទ្ធិមនុស្សកម្ពុជា បានចោទប្រកាន់អាជ្ញាធរខេត្តរតនគិរី ថា បានរំលោភទៅលើសេចក្តីណែនាំរបស់ក្រសួងមហាផ្ទៃ ស្ដីពីគោលការណ៍ការរៀបចំវេទិកាសាធារណៈរបស់អង្គការសង្គមស៊ីវិល ដោយទាមទារឲ្យអង្គការនេះសុំច្បាប់អនុញ្ញាតិពីអាជ្ញាធរខេត្ត ដើម្បីប្រារព្ធវេទិកាសាធារណៈមួយនៅឃុំសេដា ស្រុកលំផាត់ គ្រោងធ្វើនៅចុងខែកក្កដា នេះ។
ក្រសួងមហាផ្ទៃបានចេញសេចក្តីណែនាំលេខ០៥២ ចុះថ្ងៃទី២៤ ខែមករា ឆ្នាំ២០០៨ ទាក់ទិនទៅនឹងគោលការណ៍ស្ដីពីពិធីជួបប្រជុំរបស់ប្រជាពលរដ្ឋ កម្មវិធីអប់រំផ្សព្វផ្សាយ សិក្ខាសាលា ឬការប្រារព្ធវេទិកាសាធារណៈ ដោយមិនតម្រូវឲ្យសុំច្បាប់អនុញ្ញាតិនោះទេ គឺគ្រាន់តែជូនដំណឹងមកអាជ្ញាធរមូលដ្ឋានមុន៧ថ្ងៃ នៃការប្រារព្ធពិធីតែប៉ុណ្ណោះ។ ជាពិសេស បានរៀបចំច្បាប់ស្ដីពីបាតុកម្មសន្តិវិធីកាលពីឆ្នាំ២០០៩ ឲ្យមន្ត្រីអាជ្ញាធរខេត្ត-ក្រុងនានាអនុវត្ត ដើម្បីធានាទៅលើសេរីភាពនៃការជួបប្រជុំរបស់ប្រជាពលរដ្ឋ និងអង្គការសង្គមស៊ីវិល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
