អ្នកបឹងកក់ព្យាយាមដាក់ញត្តិទៅអ្នកស្រី ប៊ុន រ៉ានី ករណីនគរបាលប្រើហិង្សាលើស្ត្រី
h081512in.mp3
ពួកគេចោទប្រកាន់មន្ត្រីទាំងនោះថា បានប្រើអំពើហិង្សាទៅលើស្ត្រីបឹងកក់ ដែលបណ្ដាលអោយនារីម្នាក់រលូតកូន។ ប៉ុន្តែ ការប៉ុនប៉ងនោះត្រូវបរាជ័យ ដ្បិតមន្ត្រីដែលមានសមត្ថកិច្ចការពារសន្តិសុខ បានរុញច្រានពួកគេអោយចេញពីទីនោះជាបន្ទាន់។
អ្នកបឹងកក់ដែលទទូចចង់ដាក់ញត្តិដោយផ្ទាល់ទៅស្ត្រីទី១របស់កម្ពុជា គឺភរិយាលោកនាយករដ្ឋមន្ត្រី ហ៊ុន សែន បានបង្ខំចិត្តដើរចេញពីទីតាំងដែលពួកគេបានប្រមូលផ្ដុំនៅក្រោមដើមពោធិ៍ លើសួនច្បារវិមានឯករាជ្យ ខាងមុខផ្ទះលោកនាយករដ្ឋមន្ត្រី ទៅតាមបញ្ជារបស់កម្លាំងសមត្ថកិច្ចរាជធានីភ្នំពេញ។
អ្នកស្រី ប៊ុន រ៉ានី ភរិយាលោកនាយករដ្ឋមន្ត្រី ហ៊ុន សែន ត្រូវរាជបណ្ឌិតសភាកម្ពុជា ផ្តល់តម្លៃថាជាស្ត្រីទី១របស់កម្ពុជា និងត្រូវព្រះករុណាសម្ដេចព្រះបរមនាថ នរោត្តម សីហមុនី ឡាយព្រះហស្តលេខាផ្តល់គោរមងារថា គតិព្រឹទ្ធបណ្ឌិត កាលពីខែកក្កដា ឆ្នាំ២០១១។
តំណាងអ្នកភូមិបឹងកក់បានដើរចេញបណ្ដើរ ស្រែកសុំអន្តរាគមន៍បណ្ដើរថា គេចង់ប្រាប់ពីបញ្ហារបស់ពួកគេទៅអ្នកស្រី ប៊ុន រ៉ានី ហ៊ុន សែន ដោយគេសង្ឃឹមថាស្ត្រីដូចគ្នានឹងយល់ពីទឹកចិត្តស្ត្រីដូចគ្នា ជាពិសេសគឺយល់ពីទឹកចិត្តម្ដាយ។
តំណាងអ្នកបឹងកក់ម្នាក់អ្នកស្រី គង់ ចន្ថា បានអោយដឹងថា អ្នកស្រីតែងបានឮថា ស្ត្រីទី១ គឺភរិយាលោកនាយករដ្ឋមន្ត្រី តែងយកចិត្តទុកដាក់ចំពោះបញ្ហាស្ត្រី និងលើកតម្កើងស្ត្រី ទើបស្ត្រីបឹងកក់គិតថា ស្ត្រីទី១របស់កម្ពុជានឹងអាចជួយដោះស្រាយបញ្ហាពួកគាត់បាន។ អ្នកស្រី គង់ ចន្ថា បន្តថា ការសុំរបស់អ្នកបឹងកក់ គឺដោយសារតែករណីអំពើហិង្សាលើពួកគាត់ រហូតដល់មានស្ត្រីម្នាក់បានរលូតកូនផង ពុំត្រូវបានមន្ត្រីគ្រប់ជាន់ថ្នាក់យកចិត្តទុកដាក់ដោះស្រាយឡើយ។ អ្នកស្រី គង់ ចន្ថា បានចាត់ទុកការប្រើអំពើហិង្សាគ្រប់រូបភាពទៅលើស្ត្រី គឺជាការប្រមាថចំពោះភរិយាលោកនាយករដ្ឋមន្ត្រី ដែលតែងលើកឡើងពីការលើកស្ទួយសិទ្ធិស្ត្រី។
ញត្តិរបស់អ្នកភូមិបឹងកក់ ដែលបម្រុងនឹងដាក់ជូនអ្នកស្រី ប៊ុន រ៉ានី ហ៊ុន សែន នោះ បានបញ្ជាក់ថា ពួកគេចង់បានអន្តរាគមន៍ចំពោះការប្រើអំពើហិង្សាពីសំណាក់កងកម្លាំងប្រដាប់អាវុធចម្រុះរបស់អាជ្ញាធរមានសមត្ថកិច្ច ដែលដឹកនាំដោយលោក ភួង ម៉ាល័យ ស្នងការរងរាជធានីភ្នំពេញ និងលោក សុខ ពេញវុធ អភិបាលរងខណ្ឌដូនពេញ។ អ្នកភូមិបានរំលឹកថា កាលពីថ្ងៃទី២៧ ខែមិថុនា កន្លងមក នៅក្នុងការប៉ះទង្គិចមួយរវាងអ្នកភូមិដែលតវ៉ា និងក្រុមមន្ត្រីសមត្ថកិច្ច បានបណ្ដាលអោយស្ត្រីវ័យ២៥ឆ្នាំ ឈ្មោះ បូវ ស្រីស្រស់ ត្រូវរលូតកូន។
ហើយទាក់ទងដល់ករណីនេះ អ្នកភូមិបានចោទប្រកាន់លោក ម៉ាល័យ ស្នងការរងនគរបាលរាជធានីថា បានប្រើប្រាស់ពាក្យសម្ដីមិនសមរម្យប្រមាថមើលងាយស្ត្រីរងគ្រោះថែមទៀត។ អ្នកស្រី បូវ ស្រីស្រស់ បានដាក់ពាក្យបណ្ដឹងទៅសាលាដំបូងរាជធានីភ្នំពេញ កាលពីថ្ងៃ៣១ ខែកក្កដា ឆ្នាំ២០១២ ប្ដឹងចោទប្រកាន់លោក ភួង ម៉ាល័យ និងលោក សុខ ពេញវុធ អភិបាលរងខណ្ឌដូនពេញ ពីបទមនុស្សឃាតដោយចេតនា។
បងស្រីនារីរងគ្រោះ គឺអ្នកស្រី បូវ ស្រីពៅ មានប្រសាសន៍ថា ការដាក់លិខិតជាច្រើនដងទៅអោយមន្ត្រីខុទ្ទកាល័យ គឺហាក់ពុំមានប្រសិទ្ធភាពឡើយ ហេតុនេះគាត់ចង់ដាក់លិខិតដោយផ្ទាល់ទៅដល់អ្នកស្រី ប៊ុន រ៉ានី។
ស្នងការរងនគរបាលរាជធានីភ្នំពេញ លោក ម៉ាល័យ ពុំអាចសុំការអធិប្បាយចំពោះការចោទប្រកាន់នេះបានទេ ដោយលោកបានឆ្លើយយ៉ាងខ្លីថា លោកកំពុងជាប់រវល់។
ចំណែកលោក សុខ ពេញវុធ អភិបាលរងខណ្ឌដូនពេញ ក៏ពុំបានឆ្លើយតបទៅកាន់អ្នកភូមិនៅពេលអ្នកភូមិចោទប្រកាន់លោកដែរ ប៉ុន្តែជារឿយៗនៅពេលមានការតវ៉ាគេតែងឃើញអ្នកភូមិ និងលោក សុខ ពេញវុធ តែងប៉ះទង្គិចពាក្យសម្ដីទៅវិញទៅមក។
កាលពីសប្ដាហ៍មុន ក្រុមអង្គការ សមាគមចំនួន២៦ បានចេញលិខិតចំហមួយទៅលោកនាយករដ្ឋមន្ត្រី ហ៊ុន សែន លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ លោក កែប ជុតិមា អភិបាលរាជធានីភ្នំពេញ និងអ្នកស្រី អ៊ឹង កន្ថាផាវី ប្រធានក្រុមប្រឹក្សាជាតិកម្ពុជា ដើម្បីស្ត្រី និងជារដ្ឋមន្ត្រីក្រសួងកិច្ចការនារី។ ពួកគេបានស្នើសុំអោយដកហូតតំណែងរបស់ស្នងការរងនគរបាលរាជធានីភ្នំពេញ លោក ភួង ម៉ាល័យ ដែលបានប្រើពាក្យសម្ដីប្រមាថមើលងាយអ្នកស្រី បូវ ស្រីស្រស់។
មកដល់ពេលនេះ គឺពុំទាន់មានចំណាត់ការណាមួយត្រូវធ្វើឡើងឆ្លើយតបនឹងការស្នើនេះឡើយ។ កន្លងមក រដ្ឋមន្ត្រីក្រសួងកិច្ចការនារី អ្នកស្រី អ៊ឹង កន្ថាផាវី ធ្លាប់មានប្រសាសន៍ថា ក្រសួងពុំដែលព្រងើយកន្តើយចំពោះអំពើហិង្សាលើនារីភេទឡើយ។ ប៉ុន្តែ ចំពោះអំពើហិង្សានៅក្នុងបញ្ហាជម្លោះដីធ្លី គឺជាតួនាទីរបស់មន្ត្រីមានសមត្ថកិច្ច ដែលត្រូវដោះស្រាយ។ អ្នកស្រី អ៊ឹង កន្ថាផាវី បន្តថា មានការលំបាកក្នុងការសន្និដ្ឋានថា តើក្រុមស្ត្រីដែលចេញតវ៉ានៅតាមដងផ្លូវក្នុងរាជធានីភ្នំពេញនោះ បានប្រកាន់ធម៌អហិង្សាបានគ្រប់ពេលវេលា។
តំណាងអ្នកភូមិបឹងកក់ម្នាក់ទៀតអ្នកស្រី ទេព វន្នី មានប្រសាសន៍ថា ការសម្រេចចិត្តចេញតវ៉ារបស់ស្ត្រីនៅបឹងកក់ គឺចង់បង្ហាញអោយដឹងថា នោះជាការតវ៉ាដោយអហិង្សា ព្រោះស្ត្រីពុំមានសមត្ថភាពទៅប្រើហិង្សាដូចបុរសឡើយ។
នាយិកាអង្គការសីលការ អ្នកស្រី ធិតា ឃិះ មានប្រសាសន៍ថា ករណីនេះអ្នកស្រី ប៊ុន រ៉ានី និងអ្នកស្រី អ៊ឹង កន្ថាផាវី ដែលមានតួនាទីក្នុងការលើកតម្លៃស្ត្រីខ្មែរ គួរតែពិចារណាបង្កើនការអប់រំក្នុងចំណោមមន្ត្រីមានសមត្ថកិច្ចអោយយកចិត្តទុកដាក់បន្ថែមទៅលើការគោរពសិទ្ធិស្ត្រី ទាំងកាយវិការ និងពាក្យសម្ដី។
បើទោះជាយ៉ាងណា នៅក្នុងការដាក់ញត្តិនៅព្រឹកថ្ងៃពុធ ទី១៥ ខែសីហា អ្នកបឹងកក់បានបដិសេធមិនប្រគល់ញត្តិទៅអោយលោក គង់ ចំរើន មន្ត្រីខុទ្ទកាល័យលោកនាយករដ្ឋមន្ត្រី ដែលតែងរង់ចាំទទួលញត្តិរបស់ក្រុមអ្នកតវ៉ា នៅក្រោមដើមពោធិ៍ខាងមុខវត្តបទុមវតី នោះឡើយ។ ដោយសំអាងថា គេពុំដែលទទួលបានដំណោះស្រាយពីការដាក់ញត្តិនៅទីនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
Oh ! Come on, Ung Kantha Thavy,laws in Cambodia do not have morale in there. Anyway, the arm force beat up the pregnant ladies causing miscarriage is not tolerable. No matter what,both of you( Ung Kantha Thavy and Bun Rany Hun Sen) are mothers. Don't you see women abuse. Does Cambodia of wonder have women protection laws. Normally,women never beat the men first. Or both of you beat you husbands first? Think about it , do something,say something to prevent this from happening again.It's your duty isn't it?
Aug 16, 2012 10:03 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
