អ្នកបឹងកក់និងបុរីកីឡាធ្វើកូដកម្មដាក់ញត្តិសុំឲ្យដោះលែងអ្នកតំណាងពីរនាក់

អ្នកបឹងកក់ និងអ្នកបុរីកីឡាប្រមាណ២០០នាក់ រួមគ្នាធ្វើកូដកម្មដោយដើរជាក្បួនពីភូមិរបស់ពួកគាត់ សំដៅទៅមុខទីស្ដីការគណៈរដ្ឋមន្ត្រី ដើម្បីយកញត្តិដាក់សុំកិច្ចអន្តរាគមន៍ពីសំណាក់មន្ត្រីជាន់ខ្ពស់ នៃរដ្ឋាភិបាល ឲ្យដោះលែងអ្នកតំណាងរបស់ពួកគាត់។

ដោយ វិជ័យ អានន្ទ
2012-09-07

h090712cp.mp3

សកម្មភាពអ្នកបុរីកីឡា និងអ្នកបឹងកក់ ដង្ហែក្បួនធ្វើកូដកម្មសុំឲ្យមានការដោះលែងអ្នកតំណាងរបស់ពួកគេ គឺលោកស្រី យ៉ោម បុប្ផា និងលោកស្រី ទឹម សាក់មុន្នី នៅមុខទីស្ដីការគណៈរដ្ឋមន្ត្រី កាលពីថ្ងៃទី៧ ខែកញ្ញា ឆ្នាំ២០១២។

RFA/Vichey Anandh

បន្ថែមលើនេះ ក្រុមអ្នកតវ៉ាក៏បានអំពាវនាវទៅរដ្ឋាភិបាល ឲ្យជួយដោះស្រាយបញ្ហាដីធ្លី។ ការដាក់ញត្តិនេះ ធ្វើឡើងបន្ទាប់ពីតុលាការសម្រេចឃុំខ្លួនអ្នកតំណាងរបស់ពួកគាត់ជាបន្តបន្ទាប់។

លោកស្រី ទេព វន្នី ឲ្យដឹងនៅថ្ងៃទី៧ ខែកញ្ញា ថា ការរួមគ្នាធ្វើកូដកម្មរបស់អ្នកបឹងកក់ និងអ្នកបុរីកីឡានេះ គឺដើម្បីយកញត្តិដាក់ជូនឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី លោក សុខ អាន ក្នុងបំណងសុំឲ្យលោកជួយធ្វើកិច្ចអន្តរាគមន៍ឲ្យតុលាការសាលាដំបូងរាជធានីភ្នំពេញ ឲ្យដោះលែងតំណាងចំនួនពីរនាក់ គឺលោកស្រី យ៉ោម បុប្ផា ជាសកម្មជនតវ៉ាដីធ្លីនៅតំបន់បឹងកក់ និងលោកស្រី ទឹម សាក់មុន្នី ជាសកម្មជនតវ៉ានៅតំបន់បុរីកីឡា។

លោកស្រី ទេព វន្នី មានប្រសាសន៍បន្តថា លោកស្រី យ៉ោម បុប្ផា និងលោកស្រី ទឹម សាក់មុន្នី មិនបានប្រព្រឹត្តខុសដូចការចោទរបស់តុលាការនោះឡើយ៖ «ដាក់ញត្តិជូនទៅដល់ឧបនាយករដ្ឋមន្ត្រី សុខ អាន ទទួលបន្ទុកនៃទីស្ដីការគណៈរដ្ឋមន្ត្រី ដើម្បីឲ្យគាត់ជួយអន្តរាគមន៍ទៅតុលាការក្រុង ធ្វើការដោះលែងទៅដល់លោកស្រី យ៉ោម បុប្ផា និងលោកស្រី ទឹម សាក់មុន្នី ព្រោះពួកគាត់មិនមែនជាជនល្មើសដូចដែលតុលាការក្រុងបានចោទនោះទេ ចាស ព្រោះគាត់ជាសកម្មជនដីធ្លី ហើយបញ្ហាចាប់ខ្លួនរបស់ពួកគាត់នេះ គឺដោយសារបញ្ហាបឹងកក់ និងនៅតំបន់បុរីកីឡា តែម្ដង។ ខ្ញុំគិតថា ព្រោះគាត់ជាថ្នាក់ដឹកនាំមួយ ដែលពួកខ្ញុំអាចសង្ឃឹម និងជឿជាក់ថាពួកគាត់នឹងអាចមានសមត្ថភាពជួយពួកខ្ញុំ ក្នុងនាមពួកខ្ញុំជាប្រជាពលរដ្ឋ ពួកខ្ញុំនឹងព្យាយាមដើរដាក់ញត្តិគ្រប់ទីកន្លែងទាំងអស់ ដើម្បីរកកិច្ចអន្តរាគមន៍ ដើម្បីឲ្យពួកគាត់បានចេញក្រៅឃុំ»។

ទាក់ទងនឹងការដាក់ញត្តិនេះ លោកស្រី ទេព វន្នី អះអាងថា បើទោះបីកន្លងមក ការដាក់ញត្តិនេះធ្លាប់បរាជ័យយ៉ាងណាក៏ដោយ លោកស្រីនៅតែជឿជាក់ថា ប្រមុខរដ្ឋាភិបាលនឹងយកបញ្ហានេះពិនិត្យឡើងវិញ និងដោះស្រាយជូនអ្នកភូមិជាមិនខាន។

លើសពីនេះ លោកស្រី ទេព វន្នី បញ្ជាក់បន្ថែមថា ការព្យាយាមប្រមូលគ្នាតវ៉ាម្ដងហើយ ម្ដងទៀតឥតឈប់ឈរនេះ ជាសារមួយបង្ហាញដល់រដ្ឋាភិបាលឲ្យដឹងថា មន្ត្រីក្រោមឱវាទរបស់គាត់មិនស្ដាប់ការចាត់ចែងរបស់រដ្ឋាភិបាលនោះទេ ព្រោះពួកគេតែងរកលេសផ្សេងៗ ដើម្បីលេបយកដីចំនួន១២,៤៤ហិកតារ របស់អ្នកភូមិបឹងកក់ ដែលរដ្ឋាភិបាលបានសម្រេចផ្ដល់ឲ្យនោះ។

ចំណែកអ្នកបុរីកីឡា ក៏សង្ឃឹមថា ប្រមុខរដ្ឋាភិបាលនឹងដឹងថា ក្រុមហ៊ុនផានអ៊ីមិច ដែលសន្យាថាសង់អគារចំនួន១០ ជូនអ្នកភូមិ ជារឿងមិនពិត ដោយហេតុថាក្រុមហ៊ុននេះសង់អគារត្រឹម៨អគារ ខុសពីការសន្យារបស់ខ្លួនជាមួយអ្នកភូមិ។

លោកស្រី ទេព វន្នី បង្ហាញជំនឿចិត្តរបស់ខ្លួនថា លោកនាយករដ្ឋមន្ត្រី ហ៊ុន សែន នឹងដោះស្រាយបញ្ហានេះជូនអ្នកភូមិ បើសិនលោកបានដឹងពីបញ្ហានេះច្បាស់លាស់៖ «ហើយខ្ញុំជឿជាក់ថា គាត់ធ្លាប់រំដោះប្រជាពលរដ្ឋចេញពីជំនាន់ ប៉ុល ពត សម្ដេចគឺទេវតាមួយប្រស់មនុស្សឲ្យរស់រាប់លាននាក់ អ៊ីចឹងខ្ញុំជឿជាក់ថាគាត់នឹងជួយពួកខ្ញុំ រំដោះពួកខ្ញុំឲ្យផុតពីទុក្ខកម្មនៅតំបន់បឹងកក់ នេះ ឲ្យរួចផុតដូចកាលដែលរំដោះប្រជាពលរដ្ឋកាលពីឆ្នាំ១៩៧៩ ដូចគ្នា»។

លោកស្រី យ៉ោម បុប្ផា ត្រូវចៅក្រមស៊ើបសួរសាលាដំបូងរាជធានីភ្នំពេញ លោក តែ សំអាង ចេញដីកានាំខ្លួន និងដីកាបង្គាប់ឲ្យចាប់ខ្លួននៅថ្ងៃតែមួយ កាលពីថ្ងៃទី៤ ខែកញ្ញា ឆ្នាំ២០១២ ពីបទប្រើអំពើហិង្សាដោយចេតនា មានស្ថានទម្ងន់ទោស។ នៅថ្ងៃដដែលនោះ លោកស្រី យ៉ោម បុប្ផា ត្រូវចៅក្រមស៊ើបសួរសាលាដំបូងសម្រេចឃុំខ្លួនបណ្ដោះអាសន្ននៅពន្ធនាគារព្រៃស។ ក្រោយការចាប់ខ្លួនលោកស្រី យ៉ោម បុប្ផា មួយថ្ងៃ លោកស្រី ទឹម សាក់មុន្នី ត្រូវសាលាដំបូងរាជធានីភ្នំពេញ កោះហៅឲ្យចូលខ្លួនបំភ្លឺពីបទប្រកាសព័ត៌មានមិនពិត និងសម្រេចឃុំខ្លួន នៅថ្ងៃទី៥ ខែកញ្ញា។

ទោះយ៉ាងណា រដ្ឋលេខាធិការនៃទីស្ដីការគណៈរដ្ឋមន្ត្រី លោក ប៊ុន អ៊ុយ បានយល់ព្រមចេញមកទទួលញត្តិពីអ្នកភូមិទាំងពីរនោះហើយ ប៉ុន្តែលោកមិនធានាថា បញ្ហានេះនឹងត្រូវរដ្ឋាភិបាលលើកយកទៅដោះស្រាយ ឬយ៉ាងណានោះឡើយ។

ជាមួយគ្នានេះ អង្គការសង្គមស៊ីវិលចំនួន១១ បានចេញសេចក្ដីថ្លែងការណ៍រួមគ្នា សុំឲ្យតុលាការឈរលើគោលការណ៍ឯករាជ្យ សើរើពិនិត្យឡើងវិញចំពោះការចាប់ខ្លួនសកម្មជនតវ៉ាដីធ្លី នៃតំបន់បឹងកក់ និងតំបន់បុរីកីឡា និងសុំឲ្យដោះលែងពួកគេសិន ដើម្បីឲ្យពួកគេមានលទ្ធភាពរកមេធាវីការពារក្ដីរបស់ពួកគេ ឲ្យបានត្រឹមត្រូវតាមច្បាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (2)

ចុចត្រង់នេះដើម្បីបន្ថែមយោបល់របស់អ្នក

KonKhmer1Jivit

ពី USA

These protestors were become accustomed to the stupid judiciary system in Srok Khmer. Vanny Tep, thought Hun Sen didn't know what was going on therefore things were out of order. In my opinion, Hun Sen knew but he allowed that to happen to you all because he wanted you ( Boeng Kok and Bori KeiLa)had lesson learnt. I wish you the best and hope your effort will paid off.

Sep 07, 2012 12:26 PM

CheyVorman007

ពី AngKor Wat

គិតសប់ៗទៅគួរអោយសសើរយួន មានសណ្តាប់ធ្នាប់ល្អណាស់
ចូលមកដល់ស្រុកខ្មែរសម្ងំរស់នៅស្ងាត់ៗគ្មានចេះរំខានរាជរដ្ឆា
ភិបាលម្តងណា ខ្មុំស្រឡាញ់ណាស់ They are agood citizen!ឯងអាងតែជាខ្មែរម្ចាស់ស្រុកនិយាយគ្នាស្តាប់
មិនបាន លុយមានតិចតួចហ្នឹងនាំគ្នាទៅរកន្លែងថ្មីនៅទៅចាំ
គេគិតគូររកថ្ងៃទៅដេញទៀត ស្មានថាខ្មុំអ្នកធំហ្នឹងស្រួលណាស់
ទៅហ៏សព្វថ្ងៃ?ផ្ទះធំពេលយប់ខ្លាចខ្មោចខ្លាចចោរប្លន់ ពេលដេក
បើកបង្អួចមិនបានមុសវាខាំបើកម៉ាស៊ីនត្រជាក់ពេកសុខភាពមិន
ល្អខ្លាញ់វាកើនឡើងច្រើនហើយត្រូវធើ្វការងារជាតិដ៏ធំទៀត
បាកតិចណាស់ហ៏?គិតដល់ចំណុនេះផង យកគំរូពលរដ្ឆយួនហ្ន

Sep 07, 2012 10:29 AM