ពលទាហានមួយរូបដែលសុំមិនបញ្ចេញឈ្មោះកំពុងប្រចាំការនៅលើខ្នងភ្នំប្រាសាទព្រះវិហារបានមានប្រសាសន៍កាលពីរសៀលថ្ងៃសៅរ៍ ទី៧ ខែវិច្ឆិកា ថា មេបញ្ជាការយោធាជាន់ខ្ពស់ខ្មែរដែលគ្រប់គ្រងកម្លាំងនៅជុំវិញតំបន់ប្រាសាទព្រះវិហារ គឺលោកឧត្តមសេនីយ៍ឯក ជា តារា បានជួបប្រជុំជាមួយមេបញ្ជាការយោធភូមិភាគទី២របស់ថៃ គឺលោកឧត្តមសេនីយ៍ វីរៈលីត ចនសាំរីទ្ធ នៅឯបន្ទាយក្រហមរបស់ថៃកាលពីរសៀលថ្ងៃសុក្រ ដើម្បីស្វែងរកការយោគយល់គ្នាខាងយោធាដោយបញ្ញត្តិមិនឲ្យមានការបន្ថែមកងទ័ព ការចល័តនិងការជីកលេណដ្ឋានថ្មីនៅតាមតំបន់ដែលប្រឈមមុខដាក់គ្នាជាដើម។
ពលទាហានដដែលបានឲ្យដឹងថា ៖ «ម្សិលមិញឯកឧត្តម ជា តារា និងគណៈប្រតិភូយើងមួយក្រុម ទៅសំណេះសំណាលគ្នានៅសាលាក្រហម ប្រធានភូមិភាគ២វាមក។ បង្កើនកិច្ចសហប្រតិបត្តិការឲ្យបានល្អ មិនថែមមិនថយ មិនចល័តទេ អត់មានជីកលេណដ្ឋានឬកកាយស្អីៗដែរតាមជួរមុខលើបន្ទាត់ព្រំដែនហ្នឹង អត់មានទេ»។
ការជួបប្រជុំរវាងមេបញ្ជាការយោធាខ្មែរ-ថៃនេះបានធ្វើឡើងក្នុងខណៈដែលគេមើលឃើញថា រវាងប្រទេសទាំងពីរបានបាត់បង់ទំនាក់ទំនងខាងការទូតដែលអាចនឹងធ្វើឲ្យស្ថានភាពកំពុងប្រឈមមុខដាក់គ្នាដោយយោធានៅក្នុងរឿងព្រំដែនស្ថិតក្នុងការព្រួយបារម្ភនោះ។
ទោះយ៉ាងណាមេបញ្ជាការកងពលធំអន្តរាគមន៍លេខ៣នៃកងយោធពលខេមរភូមិន្ទ ដែលកំពុងគ្រប់គ្រងកងទ័ពខ្មែរជុំវិញតំបន់ប្រាសាទព្រះវិហារ គឺលោកឧត្តមសេនីយ៍ទោ ស្រី ឌឹក បានមានប្រសាសន៍ថា ស្ថានភាពប្រឈមមុខដាក់គ្នាដោយយោធានៅជុំវិញតំបន់ប្រាសាទព្រះវិហារនៅមានភាពជាធម្មតាទេ។
លោក ស្រី ឌឹក បានមានប្រសាសន៍ថា បើទោះបីជាកិច្ចការទូតនៃប្រទេសទាំងពីរបានឈានដល់មន្ត្រីស្ថានទូតចាកចេញរៀងៗខ្លួនហើយក៏ដោយ ក៏រវាងទាហាននិងទាហាននៅតែទាក់ទងគ្នាជាធម្មតានៅឡើយ។
លោក ស្រី ឌឹក បានបញ្ជាក់ថា ៖ «វាអត់ទាន់មានស្ថានភាពអ្វីប្រែប្រួល នៅក្នុងស្ថានភាពស្ងប់ស្ងាត់នៅឡើយ។ ការទាក់ទងគ្នារវាងទាហាននិងទាហានធម្មតា គេក៏បានសុំជួបយើង យើងក៏ជួបគេទៅ ហើយក៏បានទាក់ទងជាធម្មតា។ ឯរឿងនយោបាយទុកឲ្យរដ្ឋាភិបាលប្រទេសទាំងពីរជាអ្នកដោះស្រាយ ហើយកងទ័ពនៅក្នុងស្ថានភាពធម្មតា មានការអី និយាយគ្នា»។
រហូតមកដល់ថ្ងៃសៅរ៍ ទី៧ ខែវិច្ឆិកា ស្ថានភាពកងទ័ពខ្មែរ-ថៃដែលកំពុងប្រឈមមុខដាក់គ្នាក្នុងរឿងព្រំដែនចាប់ពីតំបន់ជប់គគីរ ស្រុកបន្ទាយអំពិល, តំបន់ប្រាសាទតាមាន់, ប្រាសាទតាក្របី, អូរស្មាច់, ច្រកជាំសាង៉ាំ ស្រុកអន្លង់វែង ខេត្តឧត្តរមានជ័យ រហូតដល់តំបន់ប្រាសាទព្រះវិហារ ត្រូវបានរាយការណ៍ថា មានភាពស្ងប់ស្ងាត់ជាធម្មតាទេ ប៉ុន្តែនៅប្រាសាទព្រះវិហារបានស្ងាត់ភ្ញៀវឡើងទៅកម្សាន្តប៉ុន្មានថៃ្ងមកនេះ៕