ស្នងការរងខេត្តបន្ទាយមានជ័យទទួលបន្ទុកបញ្ហាព្រំដែន លោក សំ ជិត បានមានប្រសាសន៍ប្រាប់វិទ្យុអាស៊ីសេរីថា សមត្ថកិច្ចនិងកម្លាំងប្រដាប់អាវុធការពារព្រំដែនខ្មែរនៅតែដាក់តាមគោលដៅនីមួយៗដើម្បីការពារទប់ស្កាត់មិនឲ្យមានការឈ្លានពានពីភាគីថៃទេ។
លោក សំ ជិត បានឲ្យដឹងថា ៖ «យើងនៅតែមានការប្រុងប្រយ័ត្នតាមព្រំដែន ទោះថា យើងវាមិនមានអីដែលប្រែប្រួលដែរក្រោយពីការផ្ទុះអាវុធទាំងអស់ហ្នឹង មិនមែនអីប្លែកដែរ»។
ការអះអាងនេះគឺបានធ្វើឡើងបន្ទាប់ពីថៃកាលពីយប់ថ្ងៃសុក្រ ទី៣ ខែតុលា បានចល័តកងទ័ពរបស់ខ្លួនយ៉ាងគគ្រឹកគគ្រេងតាមរថយន្តនិងមានអាវុធតូចធំនៅតាមបណ្ដោយព្រំដែនដែលជារូបភាពគំរាមមួយធ្វើឲ្យមានការព្រួយបារម្ភដល់ស្ថានការណ៍សន្តិសុខនៅតាមព្រំដែន។
សមាជិកក្រុមប្រឹក្សាឃុំអូរបីជាន់ លោកស្រី ដាវី បានថ្លែងថា អាជ្ញាធរឃុំបានបើកកិច្ចប្រជុំមួយជាបន្ទាន់កាលពីថ្ងៃសៅរ៍ ទី៤ តុលា ដើម្បីដាក់ផែនការមួយចំនួនទប់ស្កាត់និងការពារសុវត្ថិភាពប្រជាពលរដ្ឋខ្មែរដែលឆ្លងដែនចូលទៅធ្វើការនៅលើទឹកដីថៃ។
លោកស្រី ដាវី បានមានប្រសាសន៍ថា ៖ «យើងប្រជុំ ប្រជុំពីការងារខាងឃុំហ្នឹង ហើយនិងរៀបចំផែនការការពារសុវត្ថិភាពរបស់ប្រជាពលរដ្ឋឡើងចេញចូលទៅថៃហ្នឹង»។
លោកស្រីបានបញ្ជាក់ថា ការកោះប្រជុំគឺនៅក្រោយពីទាហានឈុតខ្មៅថៃបានបាញ់ប្រហារទៅលើកងទ័ពកម្ពុជានៅតំបន់ភ្នំទ្រព្យ ខេត្តព្រះវិហារ។
អភិបាលរងស្រុកថ្មពួក លោក ញឹក ឈួន បានថ្លែងថា អាជ្ញាធរស្រុកនឹងចុះធ្វើការអប់រំនៅថ្ងៃអាទិត្យនេះដល់ប្រជាពលរដ្ឋខ្មែរដែលរស់នៅតាមបណ្ដោយព្រំដែនដើម្បីកុំឲ្យមានការព្រួយបារម្ភ ហើយធ្វើដំណើរចាកចេញពីផ្ទះសម្បែង។
លោកអភិបាលស្រុកបានបញ្ជាក់ថា អាជ្ញាធរកម្ពុជានៅតែបន្តការការពារយ៉ាងប្រុងប្រយ័ត្ននិងមិនអនុញ្ញាតឲ្យភាគីថៃចូលមកឈ្លានពានឡើយ។
លោក ញឹក ឈួន បានថ្លែងបន្តថា ក្រៅពីកងទ័ពថៃបានធ្វើសកម្មភាពចល័តទ័ពជាមួយនឹងរថយន្តគ្រឿងសព្វាវុធយ៉ាងគគ្រឹកគគ្រេងនៅតាមក្រវាត់ព្រំដែនថៃ កាលពីយប់ថ្ងៃសុក្រ នៅច្រកប្រាសាទត្បែង ថៃបានយករថពាសដែកចំនួន៤គ្រឿងនិងគ្រឿងសព្វាវុធមួយចំនួនទៀតដាក់ត្រៀមនៅទីនោះផងដែរ។
រដ្ឋាភិបាលខ្មែរកាលពីថ្ងៃសៅរ៍បានចេញសេចក្ដីថ្លែងការណ៍បញ្ជាក់ជុំវិញការបាញ់ប្រហារគ្នាមួយឈុតនៅព្រលានឥន្ទ្រី តំបន់ភ្នំទ្រព្យ ខេត្តព្រះវិហារ កាលពីល្ងាចថ្ងៃសុក្រកន្លងទៅ ថា បង្កឡើងដោយភាគីទាហានឈុតខ្មៅថៃ ហើយបានទាមទារឲ្យថៃបញ្ឈប់កុំឲ្យមានហេតុការណ៍បាញ់ប្រហារនេះបន្តទៅទៀត។
គួរបញ្ជាក់ថា ការផ្ទុះអាវុធរយៈពេលប្រហែលជា១០នាទីដែលបង្កឡើងដោយទាហានឈុតខ្មៅថៃបានបង្ខំឲ្យកងទ័ពរដ្ឋាភិបាលខ្មែរបើកការបាញ់ការពារខ្លួនបកទៅវិញ បណ្ដាលឲ្យរងរបួសទាំងសងខាង ក្នុងនោះកងទ័ពខ្មែររងរបួសម្នាក់និងទាហានឈុតខ្មៅថៃរងរបួសចំនួន២នាក់៕